1 Samwel 5:1-12
5 Afta di Filisteen dehn kyapcha di chroo Gaad Aak* fahn Ebeneezer, dehn kehr it da Ashdod.
2 Di Filisteen dehn kehr di chroo Gaad Aak eena Daygon templ ahn dehn put it rait saida di stachu a Daygon.
3 Wen di peepl fahn Ashdod get op erli di neks maanin, Daygon mi deh flat pan ih fays fronta Jehoava Aak. Soh dehn pik op Daygon ahn put ahn bak weh ih bilangz.
4 Wen dehn get op erli di neks maanin, Daygon mi deh flat pan ih fays fronta Jehoava Aak agen. Ahn Daygon hed an ih too han mi kot aaf ahn dehn mi deh pahn di floa da di doa. Onli di paat a di badi weh luk laik wahn fish* mi lef eena wan pees.
5 Dat da wai tu dis day, Daygon prees dehn an enibadi els weh goh eena Daygon templ da Ashdod noh waak pahn di spat da di doa wehpaat Daygon stachu mi jrap.
6 Jehoava mi atak di peepl weh liv da Ashdod fi ponish dehn. Ih mek dehn an aala di peepl weh liv eena di ayrya rong Ashdod kech hemroydz.*
7 Wen di peepl fahn Ashdod si weh mi-di hapm, dehn seh: “Noh mek di Aak weh bilangz tu Izrel Gaad stay ya wid wi, kaaz hihn di ponish wee ahn wi gaad Daygon.”
8 Soh dehn sen fi di Filisteen laad dehn ahn dehn gyada aala dehn tugeda an aks dehn: “Weh wi shuda du wid di Aak weh bilangz tu di Gaad a Izrel?” Ahn dehn tel dehn: “Kehr di Aak weh bilangz tu Izrel Gaad da Gat.” Soh dehn kehr di Aak weh bilangz tu Izrel Gaad da Gat.
9 Afta dehn kehr it deh, Jehoava ponish di siti, an evribadi weh liv deh mi-di panik. Hihn mek evribadi weh liv eena di siti kech hemroydz.
10 Soh dehn sen di chroo Gaad Aak da Ekron, bot az soon az di chroo Gaad Aak reech da Ekron, di peepl fahn Ekron staat tu hala: “Dehn bring di Aak weh bilangz tu Izrel Gaad ya fi kil wee ahn wi peepl!”
11 Den dehn sen fi di Filisteen roola dehn ahn gyada aala dehn tugeda ahn tel dehn: “Kehr di Aak weh bilangz tu Izrel Gaad fahn ya. Sen it bak weh ih bilangz soh dat wee ahn wi famili dehn noh ded.” Kaaz evribadi eena di siti mi frayd dat dehn mi wahn ded, sayka weh di chroo Gaad mi-di ponish dehn bad,
12 ahn di peepl weh neva ded mi kech hemroydz. Ahn di peepl eena di siti mi luk tu hevn ahn baal fi help.
