1 Samwel 8:1-22
8 Wen Samwel mi geh oal, ih put ih son dehn fi serv az joj fi di Izrelait dehn.
2 Ih fersbaan mi naym Joawel, an ih sekant son mi naym Abaijah, ahn dehn mi serv az joj da Beeyer-sheeba.
3 Bot ih son dehn da neva laik hihn. Dehn yoostu laik lai ahn cheet fi mek moni, dehn yoostu tek braib, ahn dehn da-mi sohn korop joj.
4 Afta wahn wail, aala di Izrelait elda* dehn gyada tugeda ahn gaahn si Samwel da Rayma.
5 Dehn tel ahn: “Lisn! Yu son dehn da noh laik yoo, ahn yoo oal aredi. Soh pleez pik wahn king fi bee wi joj, jos laik weh aala di ada nayshan dehn du.”
6 Bot Samwel neva laik it ataal wen dehn tel ahn: “Gi wi wahn king fi joj wi.” Soh den Samwel pray tu Jehoava,
7 ahn Jehoava tel Samwel: “Lisn tu evriting weh di peepl tel yu; kaaz da noh yoo dehn di rijek, da mee. Dehn noh waahn mek Ai bee dehn king.
8 Dehn di du di saym ting weh dehn mi-di du aal di wail, fahn di day wen Ah bring dehn owta Eejip op tu now. Dehn stodi lef mee fi goh serv ada gaadz, ahn now dehn di chreet yoo di saym way.
9 Now lisn tu dehn, bot gi dehn wahn seeryos waanin. Tel dehn weh di king weh rool oava dehn wahn ga di rait fi diman fahn dehn.”
10 Soh Samwel tel di peepl weh mi-di aks ahn fi wahn king evriting weh Jehoava seh.
11 Ih tel dehn: “Dis da weh di king weh rool oava unu wahn ga di rait fi diman fahn unu: Ih wahn tek unu son ahn put dehn eena ih chariyat dehn ahn mek dehn bee fi hihn haasman, ahn som a dehn wahn haftu ron fronta ih chariyat dehn.
12 Ih wahn mek som a dehn bee cheef oava wahn towzn man ahn cheef oava fifti man. Ahn som a dehn wahn plow ih lan, haavis ih kraps, mek wepan far ahn fi wen ih goh da waar, ahn mek paats fi ih chariyat dehn.
13 Ih wahn tek unu daata ahn put dehn fi kuk, bayk, ahn mek perfyoom.
14 Ih wahn tek di bes pees a unu lan, unu grayp aachad, an unu aliv aachad, an ih wahn gi dehn tu fi hihn slayv dehn.
15 Ih wahn tek ten persent* a unu grayn haavis an unu grayp haavis, an ih wahn giv it tu fi hihn koat ofishal dehn ahn fi hihn slayv dehn.
16 An ih wahn tek unu mayl ahn feemayl slayv, unu dongki, ahn di bes a unu kyatl, an ih wahn yooz dehn fi fi hihn werk.
17 Ih wahn tek ten persent a unu flak, an unu wahn bee fi hihn slayv.
18 Di day wahn kohn wen unu wahn krai fi help sayka di king weh unu pik fi unuself, bot Jehoava noh wahn ansa unu.”
19 Bot di peepl rifyooz fi lisn tu Samwel, ahn dehn tel ahn: “Noh man, wee don mek op wi main aredi. Wee waahn wahn king fi rool oava wi.
20 Den wi wahn bee jos laik di res a nayshan dehn, ahn wi king wahn joj wi ahn leed wi ahn fait wi waar dehn fi wi.”
21 Afta Samwel hyaa evriting weh di peepl ga fi seh, ih ripeet weh dehn seh fi mek Jehoava hyaa.
22 Den Jehoava tel Samwel: “Lisn tu dehn, ahn pik wahn king fi rool oava dehn.” Ahn den Samwel tel di Izrelait man dehn: “Aala unu shuda goh bak da unu oan siti.”
