1 Tesaloanyanz 1:1-10
1 Dis leta da fahn mee, Paal, lang wid Silvaynos* ahn Timoti. Wi di rait dis leta tu di kangrigayshan da Tesalonaika weh da wan wid Gaad, wi Faada, ahn wid di Laad Jeezas Krais.
Wi pray dat Gaad, wi Faada, shoa unu grayt kainis* ahn giv unu pees.
2 Wi aalwayz tank Gaad wen wi pray fi unu.
3 Bikaaz fronta Gaad, wi Faada, wi neva ferget di werk weh unu mi du bikaaz a unu fayt eena Gaad ahn bikaaz a unu lov, ahn how unu mi bayr op anda chroblz bikaaz unu ga hoap eena wi Laad Jeezas Krais.
4 Bradaz, wi noa dat Gaad lov unu ahn hihn pik unu.
5 Bikaaz wen wi mi preech di gud nyooz tu unu, da neva jos wid werdz, bot wi mi kohn tu unu wid wahn powaful mesij ahn wid hoali spirit. Ahn wee mi ga schrang fayt dat weh wi mi tel unu da chroo, jos laik how unu noa weh kaina peepl wi yoostu bee fi unu oan gud.
6 An unu mi fala fi wee egzampl ahn di Laad egzampl tu, kaaz unu mi aksep Gaad werd wid di jai weh kohn fahn di hoali spirit eevn doa unu mi-di fays lata chraiyalz.
7 Sayka dat, unu da-mi wahn gud egzampl tu aala di bileeva dehn da Masidoanya an Akaya.
8 Fi tel unu di chroot, da neva onli peepl fahn Masidoanya an Akaya mi hyaa di werd a Jehoava fahn unu, bot peepl fahn evriway hyaa bowt unu fayt eena Gaad, soh wi noh need fi seh notn.
9 Kaaz peepl fahn dehndeh plays kip aan di tel wi bowt how wee mi fers meet unu ahn how unu mi ton weh fahn unu aidol dehn soh dat unu ku bee slayv fi di livin ahn chroo Gaad.
10 An unu di wayt fi Gaad Son, Jeezas, hoo hihn mi rayz op bak fahn di ded. Hihn wahn kohn fahn hevn ahn reskyu wi fahn di raat a Gaad weh di kom.
