1 Tesaloanyanz 3:1-13
3 Soh wen wi kudn wayt nohmoh fi hyaa fahn unu, wi mi tink ih wuda bee beta dat wi stay bai wiself da Atenz
2 ahn sen Timoti tu unu. Hihn da wi brada ahn wahn servant a Gaad weh di preech di gud nyooz bowt di Krais. Wi sen ahn fi schrentn unu ahn komfert unu soh dat unu fayt geh schranga.
3 Den laik dat, nobadi fayt wahn geh week* sayka dehndeh chribyulayshan. Kaaz unu noa dat wi haftu sofa dehndeh kaina ting.
4 Kaaz wen wi mi deh wid unu, wi mi tel unu heda taim dat wi wuda sofa sayka chribyulayshan, ahn dat da egzakli weh hapm, jos laik weh unu don noa.
5 Dat da wai, wen Ah kudn wayt nohmoh, Ah sen Timoti fi fain owt if unu stil faytful, bikaaz Ah mi frayd dat maybi di Devl temp unu, ahn den aala wi haad werk mi wahn bee fi notn.
6 Bot Timoti jos kohn bak fahn unu an ih tel wi gud nyooz bowt unu fayt ahn lov, ahn how unu aalwayz rijais wen unu memba di hapi taimz wi mi spen tugeda. An ih tel wi dat unu waahn si wi bad, jos laik how wee waahn si unu tu.
7 Bradaz, wen wi di goh chroo sofarin ahn chribyulayshan, wi geh komfert bikaaz a unu ahn di fayt weh unu shoa.
8 Now dat wi noa dat unu di stan op schrang eena di Laad, wi feel rifresh.
9 Wi tank Gaad fi unu, bikaaz unu mek wi rijais wahn lat.
10 Evri day an evri nait wi bayg Gaad eena pryaa fi mek wi si unu fays ahn fi help unu wid wat unu need fi schrentn unu fayt.
11 Now wi pray dat Gaad, wi Faada, ahn wi Laad Jeezas oapm di way fi mek wi kohn si unu.
12 Pahn tap a dat, wi hoap dat wi Laad mek unu lov fi wan anada ahn fi evribadi els groa moa ahn moa, jos laik how wee lov unu.
13 Den laik dat, hihn ku mek unu schrang an unu ku bee inosent ahn hoali fronta Gaad wi Faada joorin di taim wen wi Laad Jeezas kohn bak* wid aala ih hoali wan dehn.
