1 Tesaloanyanz 4:1-18
4 Fainali bradaz, wi mi teech unu how unu fi liv soh dat unu ku pleez Gaad, ahn dat da egzakli how unu di liv rait now. Soh eena di naym a di Laad Jeezas, wi aks unu ahn bayg unu fi kantinyu liv laik dat moa ahn moa.
2 Kaaz unu noa dat di inschrokshan dehn weh wi mi giv unu kohn fahn di Laad Jeezas.
3 Kaaz dis da Gaad wil, dat unu fi bee hoali ahn kip weh fahn sekshwal imoraliti.*
4 Eech wan a unu shuda noa how fi kanchroal unu oan badi soh dat unu ku kip it hoali ahn mek Gaad pleez wid unu.*
5 Unu noh fi bee laik di peepl a di nayshan dehn weh noh noa Gaad, bikaaz dehn kyaahn kanchroal dehn sekshwal dizaiyaz ahn dehn neva feel satisfai.
6 Nobadi fi haam er tek advantij a ih brada, bikaaz Jehoava wahn ponish enibadi weh du aala dehndeh tingz. Wi don tel unu bowt dis bifoa, ahn wi mi giv unu sohn schrang waanin tu.
7 Kaaz Gaad neva kaal wi fi liv wahn doti laif, bot fi liv wahn hoali laif.
8 Soh den, di persn weh rijek dehnya waanin, noh di ignoar man, bot Gaad, di wan weh giv unu ih hoali spirit.
9 Bot wi noh haftu rait tu unu bowt how fi shoa lov tu wan anada az membaz a di saym famili, kaaz Gaad di teech unu how fi shoa lov tu wan anada.
10 In fak, unu di du dat tuwaadz aala di bradaz da Masidoanya. Bot wi bayg unu, bradaz, fi kip aan di du dat moa ahn moa.
11 Chrai haad fi liv eena pees, fi main unu oan bizniz, ahn fi werk haad wid unu han, jos laik weh wi mi tel unu fi du.
12 Den, laik dat, peepl pahn di owtsaid* wahn si dat unu liv eena wahn deesent way, ahn dat unu noh need notn.
13 Pahn tap a dat, bradaz, wi waahn unu andastan weh wahn hapm tu di hoali wan dehn weh ded, soh dat unu noh feel sad laik peepl weh noh ga no hoap.
14 Bikaaz if wi ga fayt dat Jeezas mi ded ahn rayz op bak, den wi ga fayt dat rait soh Gaad wahn bring bak tu laif di disaipl dehn weh da-mi wan wid Jeezas, fi bee wid Jeezas tu.
15 Kaaz dis da weh wi tel unu chroo Jehoava werd, dat wee weh alaiv joorin di taim wen Krais kohn bak, gwehn da hevn, bot dehn wan weh mi ded wahn rayz op fers, den wee wahn rayz op afta dehn.
16 Bikaaz di Laad ihself wahn kohn dong fahn hevn wid Gaad chrompit, an ih wahn krai owt lowd wid di vais a wahn aakaynjel. An ih disaipl dehn weh mi ded wahn rayz op fers.
17 Afta dat, wee weh servaiv wahn goh lang wid dehn op eena di klowd dehn fi meet di Laad eena di skai; ahn soh wi wahn aalwayz deh wid di Laad.
18 Soh kantinyu fi komfert wan anada wid dehnya werdz.
Futnoat
^ Di Greek werd da por·neiʹa. Si di Glasari, “Sekshwal imoraliti.”
^ Er “mek peepl rispek unu.”
^ Er “peepl weh da noh paat a di Kristyan kangrigayshan.”
