1 Timoti 3:1-16
3 Weh Ah wahn tel yu now da chroo: If wahn man di chrai haad fi kwalifai fi bee wahn oavaseeya, ih waahn du wahn gud werk.
2 Di oavaseeya fi liv eena soch a way dat peepl noh ga no reezn fi fain faalt wid ahn. Ih onli fi ga wan waif. Ih fi ga self-kanchroal eena evriting. Ih fi bee wahn sensabl man weh wel aaganaiz.* Ih mos lov fi welkom peepl ahn bee kain tu dehn, an ih mos noa how fi teech gud.
3 Ih noh fi bee wahn jronkad, ner bee vailent. Ih noh fi bee sombadi weh aalwayz waahn evriting ih oan way, an ih noh fi laik kwaaril. Ih noh fi lov moni.
4 Ih fi tek di leed eena* ih hows ahn mek shoar evriting di goh gud. Ih chiljren dehn fi bee wilin fi obay ahn bihayv dehnself gud.
5 (Kaaz if wahn man noh noa how fi tek di leed eena* ih oan hows, den da how ih wahn tek kayr a di kangrigayshan a Gaad?)
6 Ih noh fi bee wahn nyoo bileeva, bikaaz ih mait geh tu prowd ahn fays di saym jojment laik di Devl.
7 Pahn tap a dat, ih fi ga wahn gud repyutayshan monks peepl owtsaida di kangrigayshan, soh dat ih noh wahn feel shaym fronta dehn ahn geh kech eena wan a di Devl chrap.
8 Saym way soh, di ministeeryal servant dehn fi bee seeryos. Dehn noh fi bee too-fays,* ner jrink tu moch wain, ner bee greedi fi moni er mateeryal tingz.
9 Dehn fi hoal aan tu di fayt, weh da di hoali seekrit* fahn Gaad, wid wahn kleen kanshans.
10 Bot fers, yu mos tes dehn fi si if dehn kwalifai, an if nobadi kyaahn fain no faalt wid dehn, den dehn ku serv az wahn ministeeryal servant.
11 Saym way soh, di uman dehn fi bee seeryos tu. Dehn noh fi slanda nobadi. Dehn fi ga self-kanchroal ahn bee faytful eena evriting.
12 Wahn ministeeryal servant onli fi ga wan waif, an ih fi tek di leed ahn mek shoar dat ih chiljren bihayv gud, ahn dat evriting goh gud eena ih hows.
13 Kaaz if di man dehn weh di serv, di serv eena wahn gud way, den dehn wahn ga wahn gud repyutayshan ahn dehn wahn free fi taak wid kanfidens bowt dehn fayt eena Krais Jeezas.
14 Ah hoap fi kohn si yu soon, bot if sohnting kip mi bak, Ah di rait dehnya ting tu yu
15 soh dat yu wahn ku noa how yu fi kandok yuself eena Gaad hows, weh da di kangrigayshan a di livin Gaad, ahn wahn sopoat ahn wahn fongdayshan fi di chroot.
16 Di hoali seekrit bowt hoo wahn wership Gaad wid aala dehn haat da wahn grayt seekrit fi chroo: ‘Jeezas mi kom eena di werl az wahn hyooman, Gaad mi aksep ahn az raichos wen ih mek ahn wahn spirit agen, ih mi apyaa tu di aynjel dehn, peepl preech bowt ahn monks di nayshan dehn, peepl eena di werl bileev eena ahn, an Gaad welkom ahn op da hevn eena gloari.’
Futnoat
^ Er “wahn man weh ga gud jojment ahn weh wel aaganaiz.”
^ Er “Ih fi manij.”
^ Er “how fi manij.”
^ Lit., “dobl tong.”
^ Er “saykrid seekrit.” Si di Glasari, “Hoali seekrit.”
