1 Timoti 6:1-21
6 Enibadi weh da wahn slayv shuda kantinyu fi shoa lata aana tu dehn maasta wid aala dehn haat, soh dat peepl noh taak bad bowt Gaad naym an ih teechin dehn.
2 Pahn tap a dat, wahn slayv noh fi disrispek ih maasta if ih maasta da wahn bileeva, bikaaz dehn da bradaz. Insteda dat, wahn slayv fi werk eevn haada fi ih maasta, bikaaz di peepl weh di benifit fan ih gud werk da bileevaz weh wi onli lov.
Kip aan di teech an inkorij di kangrigayshan bays pahn weh Ah di tel yu.
3 If eni man spred wahn teechin weh noh gree wid di gud* teechin weh kohn fahn wi Laad Jeezas Krais, er wid di teechin weh shoa wi how fi serv Gaad wid aala wi haat,
4 den ih tu prowd an ih noh andastan notn. Ih wahn aalwayz waahn di aagyu ahn fait oava werdz. Dehnya tingz onli mek peepl jelos ahn mek dehn kwaaril wid wan anada. Dehn mek peepl slanda* wan anada ahn noh chros wan anada.
5 Sayka dehnya tingz, peepl weh korop eena dehn main ahn hoo noh andastan di chroot aalwayz get eena aagyument oava tingz weh noh impoatant. Dehn onli di serv Gaad fi weh dehn ku get.
6 Wi geh lata gud tingz wen wi serv Gaad wid aala wi haat ahn satisfai wid weh wi gat, noh chroo?
7 Kaaz wi neva bring notn intu di werl, ahn wi kyaahn kehr notn owt wid wi needa.
8 Soh, az lang az wi ga food fi eet ahn kloaz fi wayr* wi wahn bee kantentid.
9 Bot som peepl aalwayz di tink bowt how fi geh rich. Enibadi weh du dat wahn faal intu wahn chrap. Dehn wahn en op di giv een tu temtayshan ahn goh afta lata foolish ahn hertful tingz, ahn dehn wahn geh dischrai.
10 Kaaz di lov a moni da laik wahn root weh aal kaina hertful tingz groa fram. Ahn bikaaz som peepl goh afta dis lov, dehn schray weh fahn di fayt, ahn dehn en op di kaaz dehnself wahn lata payn.*
11 Bot yoo da wahn man a Gaad, ahn yu mos stay faar fahn dehndeh tingz. Insted, yu fi chrai haad fi bee raichos ahn serv Gaad wid aala yu haat. Yu mos ga fayt ahn lov. Yu fi bayr op eena evriting an aalwayz bee jentl wid peepl.
12 Fait di gud fait fi di fayt. Hoal aan tait tu di hoap a evalastin laif weh Gaad mi kaal yu fi get ahn weh yoo yuself mi preech bowt tu lata peepl.
13 Ah di gi yu aadaz fronta Gaad, hoo kip evriting alaiv, ahn fronta Krais Jeezas, hoo mi gi wahn gud witnis fronta Ponchos Pailat.
14 Ah aada yu fi obay di komanment ahn kip yuself kleen til wen wi Laad Jeezas Krais shoa ih powa, soh dat peepl noh ga no reezn fi fain faalt wid yu.
15 Di hapi ahn Powaful Laad wahn shoa ih powa wen di rait taim kom. Hihn da King oava aal dehn wan weh rool az king ahn Laad oava aal dehn wan weh rool az laad.
16 Hihn da di onli wan a dehn weh kyaahn ded, ahn hihn liv eena wahn lait weh soh brait dat nobadi kyaahn kohn kloas tu it. Nobadi mi eva si ahn, an nobadi kyaahn si ahn. Ah pray dat hihn geh aana ahn dat fi hihn powa laas fareva. Aymen.
17 Koman* dehn peepl weh rich now eena dis sistem a tingz* noh fi bee prowd.* Mek dehn put dehn chros eena Gaad, noh eena dehn richiz weh noh laas. Kaaz Gaad gi wi evriting weh wi need ahn moa fi mek wi bee hapi.
18 Tel dehn fi du gud, yes, dehn fi werk haad fi du lata gud, ahn dehn fi bee jenaros ahn wilin fi shayr weh dehn gat.
19 If dehn du dat, dehn wahn di stoar op wahn chrezha fi dehnself, weh wahn bee laik wahn gud fongdayshan weh dehn ku bil pan eena di fyoocha, soh dat dehn wahn ku hoal aan tait tu di reel laif.
20 Timoti, yu mos protek weh Gaad gi yu. Ton weh fahn eni foolish taak weh goh gens Gaad, ahn fahn eni aidyaa weh noh gree wid di chroot. Dehn aidyaa bays pahn weh som peepl kaal “nalij,” bot da noh chroo nalij.
21 Som peepl shoa aaf da kaina nalij, ahn sayka dat, dehn schray weh fahn di fayt.
Ah pray dat Gaad shoa yu lata kainis.
Futnoat
^ Er “helti.”
^ Er “insolt.”
^ Dis ku aalso bee “shelta.” Lit., “kovarin.”
^ Er “ahn dehn stab dehnself aal oava wid lata payn.”
^ Er “Aada.”
^ Si di Glasari, “Sistem a tingz.”
^ Er “hai-maindid.”
