2 Korintyanz 1:1-24
1 Dis leta da fahn mee, Paal, wahn apasl a Krais Jeezas chroo Gaad wil, ahn fahn wi brada Timoti. Wi di rait tu di kangrigayshan a Gaad weh deh da Korint an tu aala di hoali peepl weh deh da Akaya.
2 Wi pray dat Gaad wi Faada ahn di Laad Jeezas Krais shoa unu grayt kainis* ahn giv unu pees.
3 Mek wi prayz di Gaad ahn Faada a wi Laad Jeezas Krais. Hihn da di Faada weh ga lata mersi ahn di Gaad weh aal komfert kohn fram.
4 Hihn komfert* wi eena aala wi chraiyalz.* Soh wee ku yooz da saym komfert weh hihn gi wi fi komfert adaz wen dehn di fays chraiyalz.*
5 Jos laik how wee sofa lata tingz sins wi di fala di Krais, saym way soh, wee geh lata komfert chroo Krais.
6 Now if wee fays chraiyalz,* da fi mek unu geh komfert ahn salvayshan. An if wee geh komfert, da fi mek unu geh komfert tu. Da komfert wahn help unu bayr op anda di saym sofarin weh wee fays.
7 Wi noa fi shoar dat jos laik how unu di sofa laik wee, rait soh unu wahn geh komfert laik wee.
8 Mi bradaz ahn sistaz, wi waahn mek unu noa bowt di chribyulayshan weh wi mi fays da Aysha. Wi mi deh anda lata presha, moa dan weh wi kuda mi bayr, ahn wi neva shoar if wi mi wahn servaiv.
9 Az a mata a fak, wi mi feel laik wi mi wahn ded. Dis mi hapm soh dat wi wudn chros wiself, bot dat wi wuda chros di Gaad weh rayz op peepl bak fahn di ded.
10 Hihn mi sayv wi fahn wahn terabl det, ahn wi ga kanfidens dat hihn wahn kantinyu fi sayv wi.
11 Unu ku help wi if unu pray fi wi tu. If lata unu pray fi wi wid aala unu haat, den Gaad wahn ansa unu pryaaz ahn help wi. Den lata peepl wahn tank Gaad fi di help weh wi get.
12 Wi ku boas wid wahn kleen kanshans dat wi liv wahn hoali laif, ahn wi sinsyaa eena wahn gaadli way wail wi deh monks di peepl a di werl, an espeshali wen wi deh monks unu. Wi noh pen pahn hyooman wizdom, bot wi pen pahn Gaad grayt kainis.
13 Kaaz wi onli di rait tu unu bowt tingz weh unu ku reed* an andastan. An Ah hoap dat unu wahn kantinyu fi andastan evriting bowt dehndeh tingz.
14 Som a unu don andastan dat wee da wahn reezn fi mek unu boas, jos laik how unu da wahn reezn fi mek wee boas eena di day a wi Laad Jeezas.
15 Soh bikaaz Ah shoar a dat, Ah mi-di plan fi kohn vizit unu fers, soh dat unu ku ga wahn nada reezn fi rijais.*
16 Ah mi-di plan fi kohn vizit unu pahn mi way tu Masidoanya, ahn fi vizit unu agen pahn mi way bak fahn Masidoanya, ahn den unu ku sen mi pahn mi way tu Judeeya.
17 Soh wen Ah mi-di mek planz fi kohn si unu, Ah mi tek it seeryos. Er unu tink dat Ah du tingz fi selfish reezn, soh dat wan minit Ah seh “yes,” ahn den di neks minit Ah seh “no”?
18 Bot unu ku chros Gaad dat weh wi di seh da chroo. Wi noh seh “yes” ahn den laytaraan seh “no.”
19 Kaaz mee, Silvaynos,* ahn Timoti mi preech tu unu bowt di Son a Gaad, hoo da Jeezas Krais. Hihn noh seh “yes” ahn den “no,” bot insted di “yes” weh hihn seh wahn aalwayz bee “yes.”
20 Kaaz noh mata humoch pramis Gaad mek, aala dehn da “yes” chroo Jeezas. Soh den, chroo hihn wi seh “Aymen” wen wi pray tu Gaad, ahn soh wi gi Gaad di gloari.
21 Bot Gaad anoint wi ahn garantee dat aala wi bilangz tu di Krais.
22 Hihn don put wahn seel pahn wee ahn gi wi di spirit weh deh eena wi haat az wahn garantee a weh wahn kom.*
23 Now Ah kaal pahn Gaad az wahn witnis gens mi,* dat Ah noh kohn da Korint yet bikaaz Ah noh waahn mek unu feel eevn wers.
24 Wee da noh maasta oava unu fayt, bot wi di werk lang wid unu fi mek unu hapi, kaaz unu di stan op schrang sayka unu oan fayt.
Futnoat
^ Si di Glasari, “Grayt kainis.”
^ Er “inkorij.”
^ Er “chribyulayshan.”
^ Er “chribyulayshan.”
^ Er “chribyulayshan.”
^ Dis ku aalso bee “weh unu don noa.”
^ Dis ku aalso bee “soh dat unu mait benifit too taimz.”
^ Silvaynos da wahn nada naym fi Sailas.
^ Er “az wahn dong payment.”
^ Er “gens mi soal.”
