2 Korintyanz 10:1-18
10 Now mee miself, Paal, di fala di Krais, hoo jentl ahn kain, an Ah di bayg unu fi du weh Ah di tel unu. Som a unu seh dat Ah luk week wen Ah deh wid unu fays-tu-fays, bot dat Ah noh frayd fi taak tu unu playn ahn schrayt eena mi leta dehn.
2 Ah hoap dat wen Ah dehdeh wid unu, Ah noh wahn haftu karek nobadi weh feel laik wee di liv di saym way laik how peepl eena di werl liv.
3 Kaaz eevn doa wee di liv eena di werl, wi noh fait laik how peepl eena di werl fait wen dehn goh da waar.
4 Kaaz di wepan dehn weh wee fait wid da noh di kain weh peepl eena di werl fait wid. Fi wee wepan dehn ga powa fahn Gaad, soh dehn ku dischrai eni schrang plays.
5 Ahn wi dischrai eni rang tinkin an eniting weh get eena di way weh mek peepl kyaahn geh fi noa Gaad, ahn wi bring evri kaina tinkin anda kanchroal laik wahn prizna fi mek wi tinkin bee obeedyant tu di Krais.
6 Ahn wans unu shoa dat unu wilin fi obay eena evriting, den wi wahn bring ponishment pahn enibadi weh noh obay.
7 Unu joj tingz bays pahn how dehn luk pahn di owtsaid. If enibadi reeli bileev dat dehn bilangz tu Krais, dehn shuda memba dat wee bilangz tu Krais tu.
8 Ah noh feel shaym bowt di atariti weh di Laad gi wi, eevn if Ah boas lee bit tu moch bowt it. Kaaz di atariti weh di Laad gi wi da fi bil unu op, noh fi tayr unu dong.
9 Ah noh waahn unu tink dat Ah di chrai fraitn unu wid mi leta dehn.
10 Kaaz som peepl seh: “Wen ih rait tu wi, ih taak bowt impoatant tingz an ih yooz schrang werdz, bot wen ih deh ya, ih week ahn weh ih seh noh wert notn.”
11 Ah waahn mek enibadi weh tink laik dat noa dat weh wi seh eena wi leta dehn wen wi noh dehdeh da di saym ting weh wi wahn du wen wi dehdeh.
12 Kaaz wi noh waahn put wiself eena di saym klaas laik peepl weh boasi, ner kompyaa wiself tu dehn. Bot wen dehn joj dehnself akaadn tu dehn oan standadz ahn kompyaa dehnself tu dehnself, dehn shoa dat dehn noh ga no andastandin.
13 Wi noh wahn boas bowt notn owtsaida di bongjri dehn weh Gaad set fi wi. Wi onli wahn boas bowt di werk weh wi du, an onli az faar az di bongjri weh Gaad set fi wi, ahn dat inklood unu.
14 Wi neva gaan owtsaida wi bongjri wen wi mi kohn wehpaat unu deh. Aftaraal, wee da-mi di fers wan dehn fi kohn tu unu wid di gud nyooz bowt di Krais.
15 No, wi noh di boas bowt di werk weh sombadi els du owtsaida wi bongjri dehn. Bot wi hoap dat az fi unu fayt kantinyu fi groa, di werk weh wi mi du wahn kantinyu fi groa eena di teritori weh wi mi werk. Den wi werk wahn groa moa ahn moa,
16 soh dat wi ku preech di gud nyooz eena dehn konchri weh deh ferda dan unu ahn soh dat wi noh boas bowt weh sombadi els du eena fi dehn teritori.
17 “Bot if enibadi boas, mek dehn boas bowt Jehoava.”
18 Kaaz peepl weh boas bowt dehnself noh pleez Gaad, bot Jehoava da di wan weh disaid hoo hihn pleez wid.
