2 Korintyanz 11:1-33
11 Eevn doa unu tink Ah di goh aan laik sombadi weh noh ga no sens, Ah wuda waahn unu put op wid mi.
2 Ah jelos oava unu jos laik how Gaad jelos oava unu. Kaaz mee miself mi pramis unu eena marij tu wan hozban, di Krais, soh dat Ah ku giv unu tu hihn az wahn hoali verjin.
3 Jos laik how di snayk mi lai tu Eev soh dat ih kuda mi fool ahn, saym way soh, Ah frayd dat sombadi korop unu main soh dat unu noh sinsyaa ahn kleen. Bot enibadi weh fala di Krais haftu bee sinsyaa ahn kleen.
4 Bikaaz, if sombadi kom ahn preech bowt wahn Jeezas ada dan di wan weh wee mi preech bowt tu unu, er if sombadi bring wahn spirit ada dan di wan weh unu mi get, er if sombadi bring wahn difrent gud nyooz ada dan weh unu mi aksep, unu redi fi aksep ahn.
5 Kaaz Ai noh tink dat fi unu apasl dehn weh goh aan laik dehn soh gud beta dan mee.
6 Eevn if Ah noh taak gud, Ah ga lata nalij. Ahn wi mi mek dat klyaa tu unu eena evri way an eena evriting.
7 Ah mi soh hapi fi preech di gud nyooz a Gaad tu unu widowt chaaj unu, an Ah mi hombl miself soh dat unu ku geh aana. Unu tink dat Ah mi sin wen Ah mi du dat?
8 Ada kangrigayshan mi help* mi, ahn da laik Ah mi teef fahn dehn soh dat Ah ku serv unu.
9 Stilyet, wen Ah mi deh wid unu an Ah neva ga weh Ah need, Ah neva mek miself wahn berdn pahn non a unu. Kaaz di bradaz weh mi kohn fahn Masidoanya mi help mi wid evriting weh Ah need. Soh Ah chrai mi bes eena evri way fi noh bee wahn berdn pahn unu, an Ah wahn kantinyu fi du dat.
10 Az lang az Ah di fala di Krais, notn wahn stap mi fahn boas bowt dat aal oava Akaya.
11 Wai Ah neva berdn unu? Bikaaz Ah noh lov unu? Gaad noa dat Ah lov unu.
12 Bot Ah wahn kantinyu fi du weh Ah di du, soh dat dehn wan weh waahn proov dat dehn eekwal tu wee noh wahn ga no reezn fi boas eena di tingz weh dehn du.*
13 Kaaz dehndeh kaina man da faals apasl, ahn dehn chrai haad fi fool op ada peepl, ahn dehn play laik dehn da Krais apasl.
14 An Ah noh sopraiz, bikaaz eevn Saytan loan play laik hihn da wahn aynjel a lait.
15 Soh da noh wahn sopraiz if fi hihn servant dehn play laik dehn da servants a raichosnis tu. Bot eena di en, dehn wahn geh egzakli weh dehn dizerv.
16 Ah di tel unu dis agen: Noh mek nobadi tink dat Ah noh ga no sens. Bot eevn if unu tink soh, aksep mi eevn if Ah taak laik Ah noh ga no sens, soh dat Ai ku boas wahn lee bit tu.
17 Ah noh di taak tu unu laik sombadi weh di fala di Laad egzampl, bot Ah di boas laik sombadi weh noh ga no sens ahn weh chros tu moch eena ihself.
18 Sins wahn lata peepl di boas bowt di tingz a dis werl,* Ai wahn boas tu.
19 Sins unu soh “waiz,” unu hapi fi put op wid peepl weh noh ga no sens.
20 Akchwali, unu put op wid enibadi weh tek unu fi slayv, er weh chaans unu, er weh tek weh unu tingz, er weh goh aan laik dehn beta dan unu, er weh slap unu eena unu fays.
21 Wi shaym fi seh dat, bikaaz dat mait mek som a unu tink wi week.
Bot if ada peepl noh shaym fi boas, den Ai noh shaym fi boas needa, eevn doa Ah mait di taak laik sombadi weh noh ga no sens.
22 Dehn da Heebroo? Ai da wan tu. Dehn da Izrelait? Ai da wan tu. Dehn da Aybraham disendant?* Mee tu.
23 Dehn da servants a Krais? Den Ah seh dis laik Ah krayzi: Ai serv Krais beta dan dehn. Ai du moa werk dan dehn an Ah gaan da jayl moa dan dehn. Ai geh beet moa taim dan Ah ku konk, ahn lata taim Ah mi nayli ded.
24 Faiv difrent taim, di Jooz lash mi 39 taimz.
25 Chree taim Ah mi geh beet wid stik. Wan taim dehn mi stoan mi. Chree taim Ah gaahn chroo shiprek. Ah spen wahn nait ahn wahn day eena di oapm see.
26 Ah chravl wahn lat. Lata taim Ah deh eena daynja fahn di riva dehn, fahn teef, fahn mi oan peepl dehn, ahn fahn peepl a di nayshanz tu. Lata taim Ah deh eena daynja eena di siti dehn, eena di wildanes, da see, ahn monks faals bradaz.
27 Pahn tap a dat, Ah haftu werk haad. Lata nait Ah noh sleep. Sohntaim Ah hongri ahn tersti. Lata taim Ah noh ga food, Ah feel koal, an Ah noh ga kloaz fi wayr.
28 Apaat fahn aala dehndeh tingz, Ah wori evri day bowt aala di kangrigayshan dehn.
29 Wen sombadi feel week, Ai feel week tu. Wen sombadi stombl, Ai geh beks.
30 If Ah haftu boas, Ah wahn boas bowt di tingz weh shoa dat Ah week.
31 Di Gaad ahn Faada a di Laad Jeezas, di Wan weh peepl wahn prayz fareva, noa dat Ah noh di tel lai.
32 Di govna a Damaskos, weh mi-di serv anda King Areetas, mi ga di siti anda lak dong fi chrai ares mi.
33 Bot di bradaz mi put mi eena wahn baaskit* ahn let mi dong chroo wahn windo eena di siti waal, ahn da rait soh Ah mi get weh fan ahn.
Futnoat
^ Er “sopoat.”
^ Er “eena di pozishan weh dehn gat.”
^ Lit., “boas akaadn tu di flesh.” Dis di rifaa tu tingz weh peepl kansaan bowt.
^ Lit., “seed.”
^ Er “schraa baaskit.”
