2 Korintyanz 12:1-21
12 Ah haftu boas, eevn if ih noh du mi no gud, bot Ah waahn taak tu unu bowt di vizhan dehn ahn di mesij dehn weh di Laad shoa wi.
2 Ah noa wahn man weh da wan wid Krais weh mi geh kehr op sodn-wan da di terd hevn bowt 14 yaaz abak. Ai noh noa if di man mi deh eena ih badi er owta ih badi wen dat hapm, bot Gaad noa.
3 Yes, Ai noa wahn man laik dat weh mi geh kehr sodn-wan da paradais. Ai noh noa if di man mi deh eena ih badi er owta ih badi wen dat hapm, bot Gaad noa.
4 Wail ih mi deh da paradais, ih mi hyaa werdz weh peepl kyaahn seh ahn weh peepl noh alow fi seh.
5 Ah wahn boas bowt da kaina man, bot Ah noh wahn boas bowt miself eksep bowt how week Ah week.
6 Kaaz eevn if Ah waahn boas, Ah noh wahn taak laik Ah noh ga no sens, kaaz Ah di tel di chroot. Bot Ah noh wahn du dat, soh dat nobadi wahn tink tu moch a mi sayka weh dehn si weh Ah du er hyaa weh Ah seh,
7 jos bikaaz Ah geh lata wandaful mesij fahn di Laad.
Soh dat Ah noh geh tu prowd, Ah ga sohnting weh kip di bada mi laik wahn prikl eena mi badi. Da laik wahn aynjel a Saytan weh kip di slap* mi op soh dat Ah noh geh tu prowd.
8 Ah bayg di Laad chree taimz fi tek it weh fahn mi.
9 Bot hihn tel mi: “Mai grayt kainis* da aal weh yu need, kaaz mai powa schranga* wen yoo week.” Soh den, Ah kwait hapi fi boas bowt how week Ah week, soh dat di powa a di Krais wahn shelta mi laik wahn tent.
10 Soh den, Ah hapi wen Ah week, wen peepl insolt mi, wen Ah noh ga evriting weh Ah need, wen peepl persikyoot mi, er wen Ah goh chroo eni kaina haad taim, fi Krais. Kaaz wen Ah week, dat da wen Ah powaful.
11 Sayka unu, Ah di goh aan laik Ah noh ga no sens, bikaaz unu shuda mi-di taak bowt aala di gud tingz weh Ah du. Bot eevn if Ai da noh notn, fi unu apasl dehn weh goh aan laik dehn soh gud noh beta dan mee eena no kaina way.
12 Ah mi proov tu unu dat Ai da wahn apasl fi chroo wen Ah mi bayr op chroo aal kaina ting ahn du lata sain ahn mirakl ahn wandaz.
13 Di onli difrens bitween unu ahn di ada kangrigayshan dehn da dat Ah neva mek miself wahn berdn pahn unu. Pleez fergiv mi fi da rang weh Ah du unu.
14 Dis da di terd taim Ah redi fi kohn vizit unu, an Ah noh wahn bee wahn berdn pahn unu. Kaaz Ah noh di kohn fi mek unu gi mi tingz, Ah di kohn fi si unu. Aftaraal, nobadi ekspek di chiljren fi sayv op fi dehn payrents, bot di payrents fi sayv op fi dehn chiljren.
15 Az fi mee, Ai wilin fi spen evriting weh Ah gat fi unu,* eevn fi giv op mi laif. If Ai lov unu soh moch, unu tink Ai dizerv fi mek unu lov mi eni les dan weh Ai lov unu?
16 Bot eevn soh, Ah neva mek miself wahn berdn pahn unu. Ahn stilyet unu seh dat Ah mi “chriki” ahn dat Ah mi yooz “chrap” fi kech unu.
17 Tel mi, Ai mi eva tek advantij a unu chroo enibadi weh Ah mi sen tu unu?
18 Ah mi inkorij Taitos fi goh vizit unu, an Ah mi sen wahn nada brada lang wid ahn. Soh tel mi, Taitos mi eva tek advantij a unu eena eni kaina way? Wee neva shoa dat wi tink an ak di saym way?
19 Unu tink dat aal dis wail wi di chrai difen wiself fronta unu? Non ataal! Wi di taak fronta Gaad ahn wi da wan wid Krais. Bot mi dyaa fren dehn, evriting weh wi du da fi schrentn unu.
20 Ah frayd dat wen Ah reech deh, fi som reezn Ah noh mait laik how Ah fain unu an Ai noh mait bee weh unu waahn Ah bee. Rada, Ah mait fain lata kwaarilin, jelosi, anga, divizhan, insoltin, gasip, praid, ahn disaada.
21 Maybi wen Ah kohn vizit unu agen, mi Gaad mait mek Ah feel shaym fronta unu, an Ah mait haftu krai oava evribadi weh mi sin bot neva ripent fi di dotinis ahn sekshwal imoraliti* ahn brayzn kandok* weh dehn praktis.
Futnoat
^ Er “beet.”
^ Si di Glasari, “Grayt kainis.”
^ Er “perfek.”
^ Er “unu soal.”
^ Di Greek werd da por·neiʹa. Si di Glasari, “Sekshwal imoraliti.”
^ Er “shaymles kandok.” Di Greek werd da a·selʹgei·a. Si di Glasari, “Brayzn kandok.”
