2 Korintyanz 13:1-14
13 Dis da di terd taim Ah di geh redi fi goh vizit unu. Wi noa di difrent skripcha dehn weh seh dat ‘if yu waahn proov if sohnting da chroo, kehr wan er too moa peepl lang wid yu.’
2 Eevn doa Ai noh dehdeh wid unu rait now, da laik Ah dehdeh wid unu fi di sekant taim. Ah di waan dehn wan weh mi sin eena di paas an Ah di waan di res a unu tu. Ah di waan unu heda taim dat if Ah eva kohn bak agen non a unu wahn eskayp disiplin.
3 Kaaz unu waahn Ah shoa unu proof dat Krais di taak chroo mee. Ahn Krais noh week tuwaadz unu, bot ih shoa unu ih grayt powa.
4 Hihn mi ded pahn di stayk laik wahn week hyooman, bot ih alaiv sayka Gaad powa. Wee week jos laik how hihn mi week, bot wi wahn liv tugeda wid hihn bikaaz a Gaad powa weh di werk eena unu.
5 Unu mos kip di chek unuself fi noa if unu di hoal aan tait tu di fayt. Unu fi kip di proov tu unuself weh kaina peepl unu. Unu noh noa dat Jeezas Krais da wan wid unu? If nat, den Gaad noh pleez wid unu.
6 Ah hoap unu noa dat Gaad pleez wid wee.
7 Wi pray tu Gaad dat unu noh du notn rang. Wi goal da noh fi shoa dat ada peepl pleez wid wi. Bot wi waahn unu du weh rait eevn if ada peepl noh pleez wid wi.
8 Kaaz wi kyaahn du notn gens di chroot, wi onli ku promoat di chroot.
9 Wi aalwayz hapi wen unu powaful, eevn wen wee week. Ahn wi di pray dat unu karek unu tinkin agen.
10 Dat da wai Ah rait dehndeh tingz tu unu wail Ah noh dehdeh, soh dat wen Ah dehdeh wid unu, Ah noh wahn haftu bee haad pahn unu wen Ah yooz di atariti weh di Laad gi mi; Ah wahn yooz it fi bil unu op ahn noh fi tayr unu dong.
11 Fainali, mi bradaz ahn sistaz, kantinyu fi bee hapi, fi karek unu tinkin, fi aksep komfert, fi tink di saym way, ahn fi liv eena pees; ahn di Gaad a lov ahn pees wahn deh wid unu.
12 Greet wan anada wid wahn hoali kis.
13 Aala di hoali peepl seh fi tel unu heloa.
14 Ah pray dat di Laad Jeezas Krais shoa aala unu grayt kainis,* ahn dat di lov a Gaad deh wid aala unu ahn dat unu geh di benifits a di hoali spirit.
Futnoat
^ Si di Glasari, “Grayt kainis.”
