2 Korintyanz 2:1-17
2 Ah disaid dat Ah noh wahn mek unu feel sad wen Ah kohn vizit unu agen.
2 Kaaz if Ah mek unu feel sad, den hoo wahn dehdeh fi mek Ah feel hapi? Onli dehn wan weh feel sad aredi sayka mee.
3 Dat da wai Ah mi rait tu unu, soh dat wen Ah kohn unu noh wahn mek Ah feel sad, bot unu wahn mek Ah rijais. Kaaz Ah noa fi shoar dat di saym tingz weh bring mee jai da di saym tingz weh bring aala unu da saym jai tu.
4 Kaaz Ai mi sofa lata chribyulayshan ahn payn eena mi haat fi rait mi laas leta tu unu, an Ah mi krai anaal. Bot Ah neva rait it tu unu fi mek unu feel sad. Ah mi rait it tu unu fi mek unu noa humoch Ah lov unu.
5 Now, Ah noh waahn seh tu moch bowt dis, bot sombadi mi mek unu feel sad. Ih neva mek Ai feel sad, bot ih mek unu feel sad.
6 Di disiplin weh moas a unu mi giv ahn da inof ponishment far ahn.
7 Now unu shuda fergiv ahn fahn unu haat ahn giv ahn komfert, soh dat ih noh geh soh sad dat ih giv op.*
8 Soh pleez mek shoar ih noa dat unu lov ahn.
9 Ahn dis da wahn nada reezn wai Ah mi rait tu unu: fi si if unu wuda shoa unuself fi bee obeedyant eena evriting.
10 If unu fergiv enibadi fi eniting, Ai fergiv dehn tu. Ahn wateva Ai fergiv (if Ah fergiv eniting) da fi help unu, an Ah du it fronta Krais.
11 Ih impoatant fi fergiv wan anada soh dat Saytan kyaahn smaat wi owt,* kaaz wee don noa weh kaina chriks hihn yooz fi chrap wi.*
12 Now wen Ah mi reech da Chroawaz fi preech di gud nyooz bowt di Krais, wahn doa oapm op tu mi weh mi gi mi wahn apachooniti fi du moa eena di Laad werk.
13 Bot Ah neva fain no rileef bikaaz mi brada Taitos neva dehdeh. Soh Ah tel evribadi bai, an Ah gaan da Masidoanya.
14 Bot Ah tank Gaad, bikaaz hihn aalwayz leed wi eena wahn vikchri maach lang wid Krais, ahn hihn di yooz wee fi spred* di nalij a Gaad evriway; da nalij da laik di smel a wahn sweet perfyoom.
15 Wail wi di preech bowt Krais, wi da wahn sweet smel tu Gaad monks peepl weh wahn geh sayv ahn monks peepl weh wahn geh dischrai.
16 Fi peepl weh wahn geh dischrai, wee da di smel a det weh leed tu det. Fi peepl weh wahn geh sayv, wee da di smel a laif weh leed tu laif. Ahn da hoo kwalifai fi du da werk?
17 Da wee kwalifai, bikaaz wi noh di mek moni aafa* di werd a Gaad laik weh lata peepl di du. Wee preech wid wahn sinsyaa haat az falowaz a Krais fronta Gaad, kaaz da Gaad sen wi.
Futnoat
^ Er “soh dat sadnis noh swala ahn.”
^ Er “win owt oava wi.”
^ Er “noa weh hihn di plan op gens wi.”
^ Er “fi help peepl andastan.”
^ Er “wi noh di sel.”
