2 Korintyanz 3:1-18
3 Soh mek Ah aks unu, wi need fi rekomen wiself agen? Er wee haftu bee laik som peepl weh need rekomendayshan letaz fi prayz dehn? Er wee fi geh dehnya letaz fahn unu?
2 Unu da fi wee leta weh rait dong pahn fi wee haat, an evribadi noa it ahn reed it.
3 Kaaz ih klyaa fi si dat unu da wahn leta fahn Krais weh wee az Gaad servants rait dong. Wi neva rait it wid ink, bot wi rait it wid di spirit a di livin Gaad. Wi neva kaav it owt pahn stoan, bot wi kaav it owt pahn peepl haat.
4 Gaad gi wi da kanfidens chroo Krais.
5 Da noh wee di seh wi kwalifai fi du da werk, bot da Gaad kwalifai wi fi du it.
6 Hihn da di Wan weh kwalifai wi fi bee servants a wahn nyoo kovenant. Wi da noh servants a di Laa, bot wi da servants a di spirit. Kaaz di Laa kandem peepl tu det, bot di spirit gi peepl laif.
7 Now di Laa weh mi kaav owt pahn too stoan kandem peepl tu det. Da Laa mi kohn wid soh moch gloari dat di Izrelait dehn kudn luk pahn Moaziz fays bikaaz a di gloari weh mi-di shain pan ih fays, bot da gloari mi wahn fayd weh.
8 Soh den, if di Laa mi kohn wid gloari, unu noh tink dat di werk a di spirit ga moch moa gloari?
9 Kaaz if di Laa weh kandem peepl tu det mi ga gloari, den di werk weh leed tu raichosnis wahn ga moch moa gloari!
10 Akchwali, di Laa weh yoostu ga gloari don kohn tu notn bikaaz a di faar grayta gloari a di nyoo kovenant.
11 Kaaz if di Laa weh mi wahn disapyaa mi kohn wid gloari, den di gloari a di nyoo kovenant wahn bee eevn grayta!
12 Sins wi ga da kaina hoap, wi noh frayd fi taak op,
13 ahn wi noh di du weh Moaziz du wen hihn yoostu put wahn vayl oava ih fays soh dat di Izrelait dehn noh mait si weh wahn hapm tu di Laa weh mi wahn kohn tu notn.
14 Bot dehn main kudn andastan. Kaaz op tu now, da laik dehn main stil deh anda wahn vayl, ahn dehn kyaahn andastan di oal kovenant. Onli Krais ku help dehn tek aaf da vayl.
15 Akchwali, eevn op tu now wahn vayl stil di kova dehn haat, soh dat dehn kyaahn andastan weh Moaziz mi rait dong.
16 Bot wen sombadi ton tu Jehoava, di vayl kom aaf.
17 Jehoava da di Spirit, ahn weh di spirit a Jehoava deh, freedom deh.
18 Aala wi don tek aaf di vayl fahn wi fays, soh wi da laik miro weh riflek Jehoava gloari. Wi di chaynj fi bee laik Gaad ahn fi riflek di gloari a Gaad moa ahn moa, egzakli laik how Jehoava* chaynj wi.*
