2 Korintyanz 4:1-18
4 Soh den, sins Gaad ga mersi pahn wi ahn gi wi dis minischri, wi noh giv op.
2 Bot wi rijek di shaymful tingz weh peepl du eena seekrit. Wi noh chrik peepl ner korop di werd a Gaad, bot wen wi shoa peepl di chroot fahn Gaad werd, wi set wahn gud egzampl fi evribadi* fronta Gaad.
3 If wahn vayl di haid di gud nyooz weh wi preech, ih di haid it fahn peepl weh wahn geh dischrai.
4 Eena fi dehn kays, di gaad a dis werl* di blain di main a peepl weh noh ga fayt, soh dat di lait a di wandaful gud nyooz bowt di Krais, weh da di imij a Gaad, noh shain chroo pahn dehn.
5 Wi noh di preech bowt wiself, bot wi di preech dat Jeezas Krais da di Laad ahn dat wee da unu slayv fi Jeezas sayk.
6 Gaad da di wan weh seh: “Mek di lait shain owta daaknis,” ahn hihn shain wahn lait pahn wi haat fi braitn op wi haat wid di wandaful nalij a Gaad weh riflek fahn di fays a Krais.
7 Wee ga dis chrezha eensaida wi eevn doa wi da laik klay pat, ahn soh wi ga powa weh hyoomanz noh naamali gat. Da powa da noh fahn wee bot ih kohn fahn Gaad.
8 Wi mait fays lata prablemz fahn aal bowt, bot da noh laik wi kyaahn moov. Wi noh mait noa weh fi du, bot wi ga wahn way owt.*
9 Peepl mait persikyoot wi, bot Gaad noh lef wi. Peepl mait chroa wi dong, bot wi noh geh dischrai.
10 Evriway wi goh, wi fays di saym kaina det weh Jeezas mi fays. Dat shoa peepl dat wee di liv di saym kaina laif weh Jeezas mi liv.
11 Wail wi liv, wi aalwayz kohn fays-tu-fays wid det fi Jeezas sayk. Dat da fi shoa peepl dat wee di liv di saym kaina laif weh Jeezas mi liv.
12 Soh wee haftu fays det, bot dat meenz laif fi unu.
13 Di Skripchaz seh: “Ah ga fayt eena Gaad ahn dats wai Ah taak.” Wee shoa dat wi ga da saym fayt,* ahn dat da wai wee taak.
14 Wee noa dat di Wan weh mi rayz Jeezas op wahn rayz wee op fi bee tugeda wid Jeezas tu, an ih wahn put aala wee fi stan op fronta Jeezas.
15 Aala dehndeh tingz da fi fi unu sayk, soh dat moa ahn moa peepl ku geh Gaad grayt kainis* bikaaz lat moa peepl di tank Gaad, ahn dat giv ahn gloari.
16 Soh den, wi noh giv op, kaaz eevn if wi badi di ways weh, hoo wee pahn di eensaid di geh schranga ahn schranga evri day.
17 Eevn doa di chribyulayshan* weh wi fays da onli fi wahn shaat taim, ih wahn leed tu gloari fi wee, ahn da gloari faar grayta dan eniting els an ih wahn laas fareva.
18 Soh wi noh kip wi aiy pahn di tingz weh wi ku si bot pahn di tingz weh wi kyaahn si. Bikaaz di tingz weh wi ku si wahn laas onli fi wahn lee wail, bot di tingz weh wi kyaahn si wahn laas fareva.
Futnoat
^ Lit., “evri hyooman kanshans.”
^ Er “sistem a tingz.” Si di Glasari, “Sistem a tingz.”
^ Dis ku aalso bee “bot wi stil ga hoap.”
^ Er “saym spirit a fayt.”
^ Si di Glasari, “Grayt kainis.”
^ Er “chraiyal.”
