2 Korintyanz 5:1-21
5 Wi badi da laik wahn hows,* er tent, weh deh ya pahn di ert. Wee noa dat if dis hows geh tayr dong,* Gaad wahn gi wi wahn hows da hevn weh wahn laas fareva.
2 Wi groan wail wi liv eena dis hows pahn di ert, kaaz wi reeli waahn liv eena* di wan fahn hevn,*
3 soh dat wen di taim kohn fi mek wi liv een deh,* wi noh wahn lef widowt wahn hows.*
4 Wi groan wail wi deh eena dis tent bikaaz da laik wi di bak wahn hevi berdn. Wi noh waahn lef dis hows, bot wi waahn liv eena di neks wan, soh dat evalastin laif wahn swala op dis badi weh ku ded.
5 Now da Gaad mi pripyaa wi fi dat wen ih gi wi di spirit az wahn garantee a weh wahn kohn.*
6 Soh wi aalwayz shoa lata korij, ahn wi noa dat wail wi ga wi hoam eena dehnya badi, wi noh deh wid di Laad,
7 kaaz wi di liv akaadn tu fayt ahn noh akaadn tu weh wi ku si.
8 Bot wi shoa lata korij, ahn wi wuda prifaa fi mek wi hoam wid di Laad insteda deh eena dehnya badi.
9 Soh weda er nat wi deh hoam wid hihn, wi aalwayz chrai haad fi pleez ahn.
10 Kaaz aala wi haftu stan op fronta di jojment seet a di Krais, soh dat ih ku giv eech wan weh dehn dizerv fi weh dehn du wail dehn ga wahn hyooman badi, weda dehn du gud er bad.*
11 Soh sins wi noa weh ih meenz fi fyaa di Laad, wi kip aan di chrai kanvins peepl fi bileev weh wi teech, bot Gaad noa weh kaina peepl wee. An Ah hoap dat unu* noa weh kaina peepl wee tu.
12 Wi noh di rekomen wiself tu unu agen, bot wi di giv unu wahn reezn fi boas bowt wi. Den unu wahn ku ansa enibadi weh boas bowt weh peepl luk laik pahn di owtsaid insteda weh deh eena dehn haat.
13 If wi taak laik wi krayzi, da fi Gaad wi di taak. If weh wi seh mek sens, da fi unu.
14 Da di lov a di Krais moov wi fi du weh wi du, kaaz wi andastan dat wan man mi ded fi evribadi, kaaz reeli, evribadi mi don ded aredi.
15 Ahn hihn mi ded fi evribadi soh dat enibadi weh liv noh wahn liv fi dehnself nohmoh, bot dehn wahn liv fi di Krais, hoo mi ded fi dehn ahn geh rayz op bak fahn di ded.
16 Soh, fahn now aan wi noh joj nobadi bays pahn weh wi ku si. Eevn if wi yoostu luk pahn Krais da way, wi noh luk pan ahn laik dat nohmoh.
17 Soh if enibadi da wan wid Krais, da persn da wahn nyoo kriyayshan. Di oal tingz gaan, bot luk ya! nyoo tingz egzis now.
18 Bot evriting kohn fahn Gaad. Da Gaad mek it pasabl fi mek wi ga pees wid hihn chroo Krais, ahn da hihn gi wi di werk fi help ada peepl mek pees wid ahn.
19 Dat meenz dat Gaad di gi peepl di chaans fi mek pees wid hihn chroo Krais, an ih noh di hoal dehn sin gens dehn. Hihn sen wi fi preech dis mesij tu peepl ahn tel dehn dat dehn ku ga pees wid Gaad agen.
20 Soh den, wee da laik ambasada weh reprizent Krais, soh da laik Gaad di bayg unu chroo wee. Soh wi di reprizent Krais wen wi bayg unu: “Mek pees wid Gaad.”
21 Krais neva sin, ahn Gaad mi aafa hihn az wahn sakrifais fi wi sin dehn, soh dat chroo hihn wi ku bee raichos fronta Gaad.
Futnoat
^ Di werd “hows” ku reprizent eeda wahn fizikal badi er wahn spirichwal badi.
^ Er “dischrai.”
^ Er “wi reeli waahn put aan.”
^ Er “wi hevnli hows.”
^ Er “fi mek wi put it aan.”
^ Er “wi noh wahn bee naykid.”
^ Er “az wahn dong payment.”
^ Er “eevl.”
^ Lit., “unu kanshans.”
