2 Korintyanz 6:1-18
6 Wi di werk lang wid Gaad, ahn wi bayg unu fi aksep di grayt kainis* a Gaad ahn mek gud yoos a it.
2 Bikaaz hihn seh: “Joorin wahn taim wen Ah mi bles unu Ah lisn tu unu, an eena di day a salvayshan Ah mi help unu.” Luk ya! Now da di taim fi mek Gaad shoa wi fayva. Luk ya! Now da di day a salvayshan.
3 Wi noh stombl nobadi, soh dat nobadi ku fain faalt wid wi minischri.
4 Bot eena evriting weh wi du, wi shoa dat wee da Gaad servants. Wi bayr op anda lata chraiyal, lata chribyulayshan, lata haad taim, ahn lata prablem.
5 Som peepl beet wi op, som put wi eena prizn, ahn som raiyat gens wi. Lata taimz wi haftu werk haad. Som naits wi noh sleep, ahn sohntaim wi noh eet.
6 Wi liv wahn kleen laif ahn wi noa di chroot. Wi shoa payshens ahn wi shoa kainis. Wi mek di hoali spirit gaid wi laif ahn wi shoa chroo lov.
7 Wi tel di chroot ahn wi pen pahn Gaad powa. Wi hoal di wepan dehn weh help wi du weh rait eena wi rait han* an eena wi lef han.*
8 Som peepl aana wi an adaz disrispek wi. Som kritisaiz wi an adaz prayz wi. Som peepl tink dat wi tel lai bot wi tel di chroot.
9 Peepl ak laik dehn noh noa wi, bot Gaad noa wi. Da laik wi di ded,* bot luk! wi stil livin. Eevn doa peepl ponish* wi, wi noh ded.
10 Peepl tink dat wi sad, bot wi aalwayz hapi. Dehn tink dat wi poa, bot wi mek lata peepl rich. Dehn tink dat wi noh ga notn, bot wi ga evriting.
11 Mi bradaz ahn sistaz da Korint, wi di tel unu di chroot,* ahn wi di oapm op wi haat tu unu.
12 Wi noh di hoal bak* wi lov fahn unu, bot da unu di hoal bak unu lov fahn wee.
13 Soh Ah di taak tu unu laik if unu da mi oan pikni. Jos laik how wee oapm op wi haat tu unu, unu mos oapm op unu haat tu wee tu.
14 Noh jain* unuself tugeda wid peepl weh da noh bileeva. Bikaaz weh raichosnis ga fi du wid wikidnis? Er weh lait ga fi du wid daaknis?
15 Krais ahn Beelyal* kuda eva gree? Er weh wahn bileeva* ga fi du* wid sombadi weh da noh wahn bileeva?
16 Ih pasabl fi mek aidol deh eena Gaad templ? Kaaz wee da wahn templ a di livin Gaad. Da jos laik weh Gaad seh: “Ah wahn liv monks dehn an Ah wahn waak monks dehn, an Ai wahn bee dehn Gaad ahn dehn wahn bee mai peepl.”
17 Jehoava seh, “‘Soh den, get owt fahn monks dehn, ahn separayt unuself,’ ahn den ih seh, ‘stap toch eniting weh noh kleen’; ‘an Ah wahn aksep unu.’”
18 Jehoava, di Almaiti, seh, “‘Ai wahn bee unu pa, an unu wahn bee mai chiljren.’”*
Futnoat
^ Si di Glasari, “Grayt kainis.”
^ Dis ku rifaa tu di kaina wepan weh wahn soalja wuda yooz fi atak ih enimi.
^ Dis ku rifaa tu di kaina wepan weh wahn soalja wuda yooz fi difen ihself wen ih enimi atak ahn.
^ Er “Peepl tink wi dizerv fi ded.”
^ Er “disiplin.”
^ Er “wi tel unu playn ahn schrayt.”
^ Er “di set wahn limit pahn.”
^ Er “Noh yoak.” Si di Glasari, “Yoak.”
^ Dis werd kohn fahn wahn Heebroo werd weh meen “Gud fi Notn,” an ih rifaa tu Saytan.
^ Er “wahn faytful persn.”
^ Er “ga in kaman.”
^ Lit., “son ahn daata dehn.”
