2 Korintyanz 7:1-16
7 Soh den mi dyaa frenz, sins wi ga dehndeh pramis, mek wi kip wiself kleen fahn eniting weh ku mek wi badi er wi spirit doti. An owta rispek fi Gaad, mek wi chrai wi bes fi liv wahn laif weh hoali.
2 Unu mos oapm op unu haat tu wi. Wi noh du notn bad tu nobadi, wi noh korop nobadi, ahn wi noh tek advantij a nobadi.
3 Ah noh di seh dat fi kandem unu. Kaaz laik weh Ah seh bifoa, unu deh eena wi haat weda wi liv er wi ded.
4 Ah ku taak tu unu playn ahn schrayt. Ah boas bowt unu wahn lat. Unu gi mi lata komfert; Ah feel soh hapi eevn doa wi di goh chroo lata sofarin.
5 Eevn wen wi mi reech da Masidoanya, wi* neva geh no res. Wi mi-di goh chroo aal kaina sofarin. Peepl pahn di owtsaid mi-di persikyoot wi, an eena wi haat wi mi feel frayd.
6 Bot Gaad, weh komfert enibadi weh feel diskorij, mi yooz Taitos fi komfert wi wen ih mi vizit wi.
7 Ahn wi neva geh komfert jos bikaaz hihn mi deh ya, bot sayka di komfert weh hihn mi geh fahn unu tu. Hihn mi tel wi how unu di luk faawod fi si mi, how unu mi feel reeli sad, ahn how unu ga sinsyaa kansaan fi mi. Ahn soh Ah feel eevn hapiya.
8 Eevn if di leta weh Ah mi rait tu unu mi mek unu feel sad, Ah noh feel sari bowt it. Bot eevn if Ah mi feel sari wen Ah mi fers rait it, Ah mi noa dat unu onli mi wahn feel sad fi wahn lee wail.
9 Bot now Ah rijais, noh bikaaz unu mi feel sad, bot bikaaz unu sadnis mek unu ripent. Kaaz unu mi feel sad eena wahn way weh pleez Gaad, ahn soh wi neva damij unu eena eni kaina way.
10 Wen sombadi feel sad eena wahn way weh pleez Gaad, dat mek ih ripent ahn dat leed tu salvayshan, an ih noh wahn feel sari bowt it. Bot wen sombadi feel sad laik how peepl eena di werl feel sad, dat leed tu det.
11 Ahn luk how unu mi feel sad eena wahn way weh pleez Gaad, ahn soh unu mi eega fi du weh rait. Unu mi klayr unu naym, unu mi beks oava di rang weh unu du, unu mi fyaa Gaad, unu mi eega fi ripent, unu mi staat tu serv Gaad wid aala unu haat, an unu mi set tingz schrayt. Unu mi du evriting eena di rait way fi setl di mata.*
12 Wen Ah mi rait da leta tu unu, Ah neva rait it fi hoo mi du rang er hoo dehn du di rang tu. Ah mi rait tu unu soh dat unu ku shoa dat unu wilin fi lisn tu wi fronta Gaad.
13 Dat da weh gi wi komfert.
Bot lang wid wi komfert, wi rijais eevn moa sayka how hapi Taitos mi feel bikaaz unu mi inkorij ahn.*
14 Ah noh feel no shaym oava weh Ah tel Taitos wen Ah mi boas bowt unu. Ahn jos laik how evriting weh wi tel unu da chroo, saym way soh, evriting weh wi mi boas tu Taitos bowt unu da chroo tu.
15 An ih lov unu eevn moa bikaaz ih memba how unu soh obeedyant ahn how unu mi welkom ahn wid lata rispek.
16 Ah rijais bikaaz Ah noa dat Ah ku chros unu eena evriting.*
Futnoat
^ Er “wi badi.” Lit., “wi flesh.”
^ Er “Eena evriting unu mi shoa unuself fi bee kleen eena di way unu setl di mata.”
^ Lit., “unu mi rifresh ih spirit.”
^ Dis ku aalso bee “bikaaz unu inkorij mi eena evriting weh unu du.”
