2 Korintyanz 8:1-24
8 Now mi bradaz ahn sistaz, wi waahn mek unu noa bowt di grayt kainis* weh Gaad mi shoa tu di kangrigayshan dehn da Masidoanya.
2 Wail dehn mi-di sofa anda wahn grayt tes, dehn mi shoa lata jai ahn dehn mi wilin fi giv eevn doa dehn mi soh poa.
3 Dehn mi giv aal weh dehn kuda mi giv, eevn moa dan weh dehn kuda mi afoad. Mee miself da wahn witnis a dis.
4 Dehn mi kohn tu wi pahn dehn oan ahn dehn mi bayg wi oava ahn oava fi di privilij fi gi wahn doanayshan soh dat dehn kuda tek paat eena di rileef minischri fi di hoali peepl.
5 Ahn dehn mi du moa dan weh wi mi ekspek. Dehn mi werk haad wid aala dehn haat fi serv di Laad, ahn dehn mi help wi akaadn tu Gaad wil.
6 Soh wi mi inkorij Taitos fi finish kalek unu doanayshan weh unu mi wilin fi giv, sins da hihn mi staat da werk monks unu.
7 Soh, unu di du gud eena evriting. Unu ga schrang fayt, unu ku ekspres unuself gud, an unu ga lata nalij. Unu werk haad eena evriting weh unu du an unu shoa di saym lov weh wi ga fi unu. Saym way soh, unu fi kantinyu werk haad fi bee wilin fi giv.
8 Ah noh di seh dat az wahn koman, bot Ah di seh dat fi mek unu noa dat ada peepl di werk haad eena evriting weh dehn di du, ahn fi tes if unu ga chroo chroo lov.
9 Kaaz unu noa bowt di grayt kainis a wi Laad Jeezas Krais. Eevn doa hihn mi rich, hihn mi geh poa soh dat unu ku bee rich sayka weh hihn poa.
10 Ahn dis da mai opinyan: Dis wahn benifit unu, bikaaz wahn yaa agoa unu neva onli staat tu du it bot unu mi shoa dat unu reeli waahn du it tu.
11 Soh now, unu fi finish di werk weh unu mi staat. Den unu wahn ku giv akaadn tu weh unu ku afoad, bikaaz unu wilin fi giv.
12 Gaad pleez wid wahn gif weh kohn fahn di haat, bikaaz ih waahn peepl giv akaadn tu weh dehn ku afoad, noh weh dehn kyaahn afoad.
13 Ah noh waahn mek it eeziya fi ada peepl ahn mek it haad fi unu.
14 Bot Ah waahn mek evriting balans owt, soh dat di ekschra weh unu gi wahn ku kova weh ada peepl need. Ahn di ekschra weh dehn gi wahn ku kova weh unu need. Den evribadi wahn geh weh dehn need.
15 Da jos laik weh rait dong eena di Skripchaz: “Di persn weh mi ga lat neva ga tu moch, ahn di persn weh mi ga lee bit neva lef wid tu lee bit.”
16 Now wi tank Gaad bikaaz ih mek Taitos bee reeli kansaan bowt unu, jos laik how wee ga di saym kansaan fi unu.
17 Hihn lisn tu di inkorijment weh wi mi giv ahn, ahn hihn soh eega dat ih mek op ih main fi kohn vizit unu.
18 Bot wi di sen wahn brada fi goh lang wid hihn tu. Da wahn brada weh geh prayz fahn aala di kangrigayshan dehn bikaaz a aal weh ih di du fi di gud nyooz.
19 Noh onli dat, bot di kangrigayshan dehn apoint hihn fi goh lang wid wi wen wi kehr di doanayshan. Wi wahn shayr owt da gif fi bring gloari tu wi Laad, ahn wen wi du dat wi wahn shoa dat wi redi fi help ada peepl.
20 Soh wi di chrai haad fi mek shoar dat nobadi fain faalt wid how wi manij di doanayshan weh unu mi wilin fi giv.
21 Kaaz wi ‘chrai wi bes fi bee aanis eena evriting weh wi du, noh onli fronta Jehoava bot fronta peepl tu.’
22 Bisaidz dat, wi di sen wahn nada wan a wi bradaz lang wid dehn tu. Dis brada proov tu wi oava ahn oava dat wi ku chros ahn, an wi fain dat ih wilin fi werk haad fi help owt eena lata wayz. Ahn now ih wahn werk haada sayka di schrang kanfidens weh ih gat eena unu.
23 If unu ga eni kweschan bowt Taitos, hihn da di wan weh werk lang wid mi fi benifit unu. Er if unu ga eni kweschan bowt wi bradaz weh gwehn lang wid hihn, aala dehn da apasl fi di kangrigayshan dehn ahn dehn bring gloari tu Krais.
24 Soh unu fi shoa dat unu reeli lov dehn wid aala unu haat ahn shoa di kangrigayshan dehn wai wi boas bowt unu.
Futnoat
^ Si di Glasari, “Grayt kainis.”
