2 Korintyanz 9:1-15
9 Now Ah noh haftu rait tu unu bowt di minischri weh da fi di hoali peepl,
2 bikaaz Ah noa unu wilin fi help. Ah boas bowt unu tu di bradaz ahn sistaz da Masidoanya. Ah tel dehn dat unu fahn Akaya mi redi fi help fi wahn hoal yaa now. Ahn bikaaz unu soh wilin fi help, lata di bradaz ahn sistaz da Masidoanya wilin fi help tu.
3 Bot Ah di sen di bradaz soh dat wi noh boas bowt unu fi notn ahn soh dat unu ku reeli bee redi fi help, jos laik weh Ah tel dehn bowt unu.
4 Kaaz if di bradaz fahn Masidoanya wuda kohn lang wid mi ahn fain dat unu noh redi, wee wuda feel shaym sayka di kanfidens weh wi put eena unu, an unu wuda feel shaym tu.
5 Soh Ah mi tink ih wuda bee gud fi inkorij di bradaz fi goh heda mi soh dat wen Ah get deh di gif wahn bee redi, ahn dat wahn shoa dat unu giv it bikaaz unu waahn, noh bikaaz wi foas unu.
6 Dis da di point: Enibadi weh plaant lee bit a seed onli wahn reep lee bit, bot enibadi weh plaant lata seed wahn reep wahn lat.
7 Evribadi fi giv jos laik weh dehn disaid eena dehn oan haat fi giv. Dehn noh fi tink haad* fi giv, ahn nobadi fi foas dehn fi giv, bikaaz Gaad lov wen wi hapi fi giv.
8 Pahn tap a dat, Gaad ku shoa unu ih grayt kainis* moa ahn moa soh dat unu aalwayz ga inof a evriting ahn soh dat unu aalwayz ga plenti a evriting weh unu need fi du evri gud werk.
9 (Da jos laik weh rait dong eena di Skripchaz: “Hihn giv eena wahn jenaros way, an ih giv tu poa peepl. Fi hihn raichosnis wahn kantinyu fareva.”
10 Now di Gaad hoo gi lata seed fi mek peepl plaant ahn hoo gi bred fi mek peepl eet wahn giv unu di seed fi plaant. Ih wahn giv unu lata seed ahn mek unu reep moa ahn moa fahn di raichos tingz weh unu du.)
11 Gaad bles unu eena evriting soh dat unu ku giv eena aal kaina way. Ahn chroo di werk weh wi du, wi kainis inkorij peepl fi gi tanks tu Gaad,
12 bikaaz da poblik minischri da noh onli fi provaid weh di hoali peepl need, bot da aalso fi mek lata peepl tank Gaad.
13 Sins unu gi da gif, unu shoa weh kaina peepl unu. Peepl wahn prayz Gaad bikaaz unu wilin fi obay di gud nyooz weh unu preech bowt Krais ahn bikaaz unu wilin fi giv tu dehn ahn tu evribadi els.
14 Ahn dehn shoa dehn lov fi unu wen dehn pray tu Gaad wid aala dehn haat fi unu bikaaz a di grayt kainis weh Gaad shoa tuwaadz unu.
15 Mek wi gi Gaad tanks ahn prayz eevn if wi feel laik wi kyaahn fain di werdz fi seh humoch wi apreeshiayt di gif weh ih gi wi.
