2 Peeta 1:1-21
1 Dis da Saiman Peeta. Ai da wan a Jeezas Krais slayv an apasl. Ah di rait dis leta tu di wan dehn hoo bileev di saym preshos chroot weh wee bileev tu, bikaaz wi Gaad ahn wi Sayvya Jeezas Krais onli raichos:
2 Ah pray dat di hoal chroot weh unu noa bowt Gaad ahn Jeezas wi Laad wahn mek unu injai moa a Gaad grayt kainis* ahn pees.
3 Ahn da onli bikaaz a Gaad powa wee ga evriting weh wi need fi help wi liv wahn laif a dedikayshan tu hihn, ahn hihn gi wi dehnya tingz fi free. Yes, wi geh dehnya tingz bikaaz wi noa di hoal chroot bowt di Wan weh kaal wi. Ahn hihn kaal wi bikaaz hihn da wahn grayt ahn gud Gaad.
4 Dats wai hihn gi wi wahn lata wandaful pramis weh onli preshos, kaaz den wee wahn ku bee spirits jos laik hihn. Ahn hihn gi wi dehnya pramis widowt chaaj bikaaz wi ron weh fahn di koropshan eena dis werl weh kohn fahn sinful dizaiyaz.
5 Dat da wai unu fi chrai unu bes fi ga fayt ahn du weh Gaad seh da di rait ting fi du. Pahn tap a dat, chrai unu bes fi groa eena nalij
6 ahn fi ga self-kanchroal. Ahn lang wid self-kanchroal, kantinyu bayr op ahn stay laayal tu Gaad.
7 Ahn lang wid dehndeh tingz, unu fi chrai unu bes fi shoa lov, noh onli tu unu bradaz bot tu evribadi els tu.
8 Kaaz if unu aalwayz du dehnya tingz, unu wahn bee laik wahn chree weh bayr froot an unu noh wahn di aidl op unuself, kaaz unu wahn di shoa dat unu di mek gud yoos a di hoal chroot weh unu noa bowt wi Laad Jeezas Krais.
9 Kaaz enibadi weh noh ga dehnya tingz blain an ih rifyooz fi si di lait. Ih ferget dat Gaad mi mek ahn kleen fan ih sin dehn weh ih mi du eena di paas.
10 Soh bradaz, du unu bes fi stay faytful soh dat unu ku kantinyu fi bee monks di wan dehn weh Gaad kaal ahn chooz. If unu du unu bes, unu wahn definaytli geh dis privilij.
11 In fak, dis da how di doa tu di evalastin Kingdom a wi Laad ahn Sayvya Jeezas Krais wahn ku oapm op tu unu, ahn da doa wahn oapm waid.
12 Dats wai Ah aalwayz waahn rimain unu bowt dehnya tingz, eevn doa unu noa dehn gud an unu di stik tu di chroot weh unu noa.
13 Bikaaz az lang az Ai ga laif eena dis badi,* Ah see’t fit fi rimain unu bowt dehnya tingz.
14 An Ah noa dat Ah noh wahn ga dis badi* moch langa, jos laik weh wi Laad Jeezas Krais mi tel mi.
15 Bot Ah wahn du mi bes, soh dat afta Ah lef unu, unu wahn ku memba* dehnya tingz pahn unu oan.
16 Wen wi mi tel unu bowt di powa a wi Laad Jeezas Krais ahn bowt di taim wen hihn wahn kohn bak fi deh wid ih peepl,* wi neva jos di tel unu stoari weh peepl mek op, bot wi mi tel unu bowt how wi mi si fi hihn grayt gloari wid wi oan aiy dehn.
17 Hihn geh di aana ahn gloari fahn Gaad di Faada, kaaz da kaina gloari kohn fahn di Faada. Dis mi hapm wen Gaad mi tel ahn: “Dis da mai Son, di wan weh Ah onli lov, ahn di wan weh Ah pleez wid.”
18 Eevn wee mi hyaa dehnya werdz di kohn fahn hevn wen wi mi deh wid ahn pahn di hoali mongtin.
19 Dat da wai wi eevn moa kanvins dat di prafesi dehn wahn kohn chroo. Soh pay atenshan tu weh di prafit dehn mi seh, ahn put dehndeh prafesi eena unu haat, ahn mek dehn bee laik wahn lamp weh di shain eena wahn daak plays. Kantinyu fi du dis til di day staat tu kom een ahn di maanin staar kom op.
20 Kaaz aala unu noa dis impoatant fak: No prafesi weh deh eena di Skripchaz kohn fahn man.
21 Da Gaad mi yooz fi hihn hoali spirit fi gaid di prafit dehn, soh dat di mesij weh dehn mi rait dong kohn fahn hihn.
Futnoat
^ Si di Glasari, “Grayt kainis.”
^ Er “dis tabernakl.”
^ Er “dis tabernakl.”
^ Er “ku taak bowt.”
^ Er “bowt ih prezens.” Si di Glasari, “Prezens.”
