2 Peeta 3:1-18
3 Mi dyaa bradaz ahn sistaz, dis da di sekant leta weh Ah di rait tu unu. Ahn jos laik eena di fers wan, Ah di rimain unu bowt sertn tingz weh wahn help unu fi tink eena wahn seeryos way,
2 soh dat unu noh ferget eniting weh di hoali prafit dehn eena di paas mi seh,* ahn soh dat unu noh ferget di teechinz a fi wee Laad ahn Sayvya weh unu mi hyaa fahn di apasl dehn.*
3 Dis da di fers ting weh unu need fi noa: Eena di laas dayz unu wahn ga peepl weh mak gud tingz ahn weh du bad tingz jos fi satisfai fi dehn oan selfish dizaiyaz.
4 Dehn wahn seh: “Krais mi pramis fi kohn bak fi deh wid wi, soh da wehpaat ih deh?* Fi wee ansesta dehn liv ahn ded, ahn fahn da taim til now notn chaynj; evriting stan di saym way how ih mi stan sins di kriyayshan a di werl.”
5 Da bikaaz dehn chooz fi ignoar dis fak: Di skai egzis fahn way bak, ahn bai di werd a Gaad, di ert mi kom op owta di waata ahn deh eena waata.
6 Ahn da dehnya saym tingz mi dischrai di peepl bak den. Dis mi hapm wen waata mi kova di hoal ert.
7 Ahn Gaad mi seh eena fi hihn werd dat di hevnz ahn di ert weh di egzis now di wayt fi di day a jojment wen hihn wahn bon op di hevnz ahn di ert wid faiya, wen hihn wahn dischrai peepl weh wikid.
8 Bot mi dyaa bradaz ahn sistaz, noh ferget dat eena Jehoava sait wan day da laik wahn towzn yaaz ahn wahn towzn yaaz da laik wan day.
9 Jehoava noh wahn tek ih oan sweet taim fi mek fi hihn pramis dehn kohn chroo, laik weh som peepl tink, bot hihn payshent wid unu bikaaz ih noh waahn nobadi geh dischrai, bot ih waahn evribadi geh di chaans fi ripent.
10 Bot Jehoava day wahn kohn jos laik wahn teef. Ahn joorin da taim deh, di hevnz wahn geh dischrai, an ih wahn song laik wahn lowd naiz. Di tingz weh mek op di hevnz ahn di ert wahn geh hat hat ahn geh dischrai. Di ert ahn di tingz pan it wahn bon op.
11 Sins dehnya tingz wahn geh dischrai eena dis way, tink bowt weh kaina persn unu sopoas tu bee. Unu need fi bee di kaina peepl weh kip dehn kandok hoali ahn shoa dat dehn faytful tu Gaad.
12 An unu need fi deh pahn unu gyaad ahn noh ferget dat di day a Jehoava di kom an ih deh kloas.* Joorin da taim deh, faiya wahn dischrai di hevnz, ahn di tingz weh mek op di hevnz ahn di ert wahn melt eena di heet!
13 Bot bays pahn weh Gaad pramis wi, wee di luk faawod tu di nyoo hevnz ahn wahn nyoo ert, wehpaat raichosnis wahn deh fareva.
14 Soh den mi dyaa bradaz ahn sistaz, du unu bes soh dat eena di en Gaad wahn joj unu az wahn kleen peepl weh noh ga notn fi du wid dis werl ahn weh ga wahn gud rilayshanship wid hihn.
15 Aalso, di payshens weh di Laad shoa ku help evribadi geh salvayshan, jos laik weh wi dyaa brada, Paal, mi rait tu unu bays pahn di wizdom weh Gaad giv ahn.
16 In fak, hihn mi rait bowt dehnya tingz eena aala ih leta dehn. Bot som peepl weh noh ga gud andastandin bowt tingz ahn weh noh ga schrang fayt chrai twis weh Paal mi-di seh, jos laik weh dehn du wid di res a di Skripchaz, bot dehnya peepl jos di leed dehnself tu fi dehn oan dischrokshan.
17 Soh den, mi dyaa bradaz ahn sistaz, sins unu noa aala dis heda taim, deh pahn unu gyaad. If nat, dehndeh saym peepl ku leed unu aschray wid fi dehn wikid kandok ahn kaaz unu fi faal fahn di salid fongdayshan weh unu di stan op pan.
18 Insteda dat, unu fi liv eena wahn way weh unu wahn ku laan moa bowt wi Laad ahn Sayvya Jeezas Krais ahn geh moa a fi hihn grayt kainis.* Soh den, mek evribadi giv ahn di gloari now ahn fareva. Aymen.
Futnoat
^ Er “hoali prafit dehn eena di paas mi prafesai.”
^ Lit., “fahn unu apasl dehn.”
^ Er “Wehpaat Krais prezens deh?” Si di Glasari, “Prezens.”
^ Er “An unu need fi wayt wid eeganis fi di day a Jehoava weh di kom ahn weh deh kloas.”
^ Si di Glasari, “Grayt kainis.”
