2 Tesaloanyanz 1:1-12
1 Dis leta da fahn mee, Paal, lang wid Silvaynos,* ahn Timoti. Wi di rait dis leta tu di kangrigayshan weh deh da Tesalonaika weh da wan wid Gaad, wi Faada, ahn wid di Laad Jeezas Krais.
2 Wi pray dat Gaad, wi Faada, ahn di Laad Jeezas Krais shoa unu grayt kainis* ahn giv unu pees.
3 Bradaz, wi aalwayz tank Gaad fi unu. Dat da di rait ting fi mek wi du, bikaaz unu fayt di groa moa ahn moa, an unu lov fi wan anada di geh schranga ahn schranga.
4 Dat da wai wi prowd fi taak bowt unu monks di kangrigayshan a Gaad, bikaaz unu di bayr op an unu di shoa dat unu ga fayt, eevn doa unu di sofa sayka persikyooshan ahn chribyulayshan.
5 Aala dat proov dat Gaad joj tingz raichos, ahn sayka dat, hihn seh dat unu dizerv fi bee paat a di Kingdom a Gaad, ahn dat da di reezn wai unu di sofa.
6 Sins Gaad raichos, hihn wahn ponish dehn wan weh mek unu sofa.
7 Bot unu weh di sofa chribyulayshan wahn geh rileef lang wid wi wen di Laad Jeezas kohn fahn hevn eena wahn faiya weh di blayz op, lang wid ih powaful aynjel dehn.
8 Den hihn wahn ponish dehn wan weh noh noa Gaad ahn dehn wan weh noh noa di gud nyooz bowt wi Laad Jeezas.
9 Wi Laad wahn joj dehn, ahn hihn wahn dischrai dehn fareva. Soh hihn noh wahn luk pahn dehn ner help dehn wid ih grayt powa.
10 Pahn di day wen di Laad kohn bak, hihn an aala ih hoali peepl wahn geh gloari, an evribadi weh ga fayt eena hihn wahn aana hihn. An unu wahn bee monks dehn, bikaaz unu bileev di tingz weh wi mi tel unu.
11 Dat da wai wi aalwayz pray fi unu an aks dat wi Gaad wuda si dat unu dizerv di laif weh ih kaal unu fa. Ahn wi aks Gaad dat, wid ih powa, hihn wuda du aal di gud weh ih waahn du fi unu, ahn dat evriting weh unu du ga sokses sayka unu fayt.
12 Ahn soh di naym a wi Laad Jeezas wuda geh gloari chroo unu, an unu wahn ku geh aana bikaaz a hihn. Da gloari kohn fahn di grayt kainis a wi Gaad ahn fahn di Laad Jeezas Krais.
