2 Tesaloanyanz 2:1-17
2 Bot bradaz, wi waahn taak tu unu bowt di taim wen wi Laad Jeezas Krais wahn kohn bak ahn wen ih wahn gyada wi op tugeda fi deh wid hihn. Ahn soh wi di aks unu
2 fi noh geh kanfyooz eena di way unu tink, ahn noh geh fraitn bai eni teechin* weh luk laik ih kohn fahn Gaad, er bai eni mesij weh sombadi tel unu, er bai eni leta weh luk laik ih kohn fahn wee di seh dat di day a Jehoava deh ya.
3 Noh mek nobadi chrik unu* eena eni kaina way, bikaaz bifoa da day kom, peepl wahn ribel gens Gaad fers,* ahn di Wikid Man wahn mek evribadi noa da hoo hihn. Hihn da di wan weh wahn geh dischrai.
4 Hihn da wahn enimi an ih put ihself haiya dan evri soa-kaal gaad er evriting weh peepl wership. An ih sidong eena di templ a Gaad fronta evribadi laik if hihn da wahn gaad.
5 Unu noh memba dat Ah yoostu tel unu bowt dehndeh saym tingz wen Ah mi stil deh wid unu?
6 Ahn now unu noa da wat di stap di Wikid Man, kaaz wen di rait taim kom, evribadi wahn noa da hoo hihn.
7 Ahn yes, di wikidnis a dis man, weh da wahn seekrit, don di werk, bot da wikidnis wahn stay az wahn seekrit til di wan weh di stap ahn noh deh ya nohmoh.
8 Den fi shoar evribadi wahn noa hoo da di Wikid Man, hoo di Laad Jeezas wahn dischrai bai di spirit a ih mowt ahn bring tu notn joorin di taim wen ih shoa dat ih kohn bak fi deh wid ih peepl dehn.
9 Bot wen di Wikid Man apyaa, ih wahn kohn wid di powa a Saytan, ahn dis man wahn du aal kaina powaful werk ahn wandaz* ahn sainz fi fool op peepl,
10 an ih wahn yooz evri kaina wikidnis fi fool ada peepl. Fi dehn ponishment da fi geh dischrai bikaaz dehn neva lov di chroot weh kuda mi sayv dehn.
11 Dat da wai Gaad alow wahn faals teechin fi fool dehn op soh dat dehn ku bileev di lai.
12 Laik dat, aala dehn wahn geh joj bikaaz dehn neva bileev di chroot, bot insted, dehn mi tek plezha eena wikidnis.
13 Bot bradaz, wi haftu aalwayz tank Gaad fi unu. Jehoava lov unu bikaaz fahn di biginin hihn mi mek unu hoali sayka ih spirit ahn sayka unu fayt eena di chroot, ahn soh ih pik unu fi geh sayv.
14 Hihn kaal unu fi geh sayv chroo di gud nyooz weh wi preech, soh dat wi ku geh di saym gloari weh wi Laad Jeezas Krais get.
15 Soh den, bradaz, stan op schrang ahn kip di hoal aan tu dehn tingz weh unu laan, weda unu mi hyaa wahn mesij fahn wi er unu mi geh wahn leta.
16 Pahn tap a dat, Gaad wi Faada lov wi, ahn bikaaz a ih grayt kainis* ih gi wi komfert weh laas fareva an ih gi wi wahn wandaful hoap. Wi pray dat hihn ahn wi Laad Jeezas Krais
17 komfert unu haat ahn mek unu schrang soh dat unu aalwayz du gud werk ahn seh gud tingz.
Futnoat
^ Er “bai wahn spirit.” Si di Glasari, “Spirit.”
^ Er “nobadi leed unu aschray.”
^ Er “bifoa da day kom, di apastayt dehn wahn haftu kohn fers.” Si di Glasari, “Apastayt.”
^ Er “miraklz.”
^ Si di Glasari, “Grayt kainis.”
