2 Timoti 1:1-18
1 Dis leta da fahn mee, Paal, wahn apasl a Krais Jeezas akaadn tu di wil a Gaad. Hihn sen mi az wahn apasl fi tel peepl bowt di pramis a di laif weh kohn chroo Krais Jeezas.
2 Ah di rait dis leta tu Timoti, hoo da laik wahn son tu mi weh Ah onli lov:
Ah pray dat Gaad, wi Faada, ahn wi Laad Jeezas Krais shoa yu grayt kainis,* mersi, ahn pees.
3 Ah tank Gaad, hoo Ah di serv wid wahn kleen kanshans jos laik weh mi ansesta dehn yoostu du. Soh den, Ah aalwayz memba yu eena mi pryaaz day ahn nait.
4 Wen Ah memba yu tyaaz, ih mek Ah waahn si yu bad soh dat mi haat ku geh ful op wid jai.
5 Ah memba how yu chros Gaad wid aala yu haat jos laik yu grani Lois ahn yu ma Yoonis. An Ah shoar dat yoo ga di saym fayt laik dehn.
6 Sayka dis, Ah di rimain yu fi bee eega fi yooz di gif weh Gaad gi yu wen Ah mi apoint yu.
7 Di hoali spirit weh Gaad mi gi wi noh mek wi feel kowad, bot ih gi wi powa, lov, ahn gud jojment.
8 Soh noh bee shaym fi preech bowt wi Laad, ahn noh bee shaym a mee, wahn prizna fi fi hihn sayk, bot bee wilin fi sofa fi di gud nyooz ahn chros dat Gaad wahn gi yu di powa fi bayr op.
9 Hihn sayv wi, an ih kaal wi fi bee hoali peepl, noh sayka weh wee mi du, bot bikaaz a ih oan perpos ahn grayt kainis. Gaad shoa wi da grayt kainis chroo Jeezas Krais fahn lang taim.
10 Ih mi playn fi si Gaad grayt kainis wen wi Sayvya, Krais Jeezas, mi kohn. Hihn mi geh rid a det ahn hihn shoa wi chroo di gud nyooz how fi ga laif ahn how fi ga wahn badi weh noh wahn ratn.
11 Gaad mi apoint mi fi preech da gud nyooz ahn fi bee wahn apasl ahn wahn teecha.
12 Dat da wai Ah di sofa dehnya tingz, bot Ah noh feel shaym, bikaaz Ai noa di Gaad weh Ah bileev eena. An Ah shoar dat hihn ku protek evriting weh Ah giv ahn til da day kohn.
13 Kip di fala di standad a gud* werdz weh yu mi hyaa fahn mi, ahn kantinyu fi shoa yu fayt ahn lov laik wahn persn hoo da wan wid Krais Jeezas.
14 Protek da chrezha wid di help a di hoali spirit weh deh eena wi.
15 Yu noa dat aala di peepl da Aysha ton weh fahn mi, eevn Faijelos ahn Hermajeneez ton weh fahn mi.
16 Ah pray dat di Laad Gaad ga mersi pahn evribadi weh liv eena Onisiforos hows, bikaaz hihn inkorij mi lata taim an ih neva shaym a mi bikaaz Ah deh eena prizn.
17 Insteda dat, wen hihn mi kohn da Roam, hihn mi luk fi mi an ih neva stap til ih fain mi.
18 Ah pray dat wi Laad Jehoava shoa ahn mersi pahn da day. Yoo noa bowt aala di tingz weh hihn mi du fi mi da Efisos.
