2 Timoti 2:1-26
2 Soh den mi son, yu fi kantinyu schrentn yuself wid di grayt kainis* weh Krais Jeezas shoa.
2 Yu fi teech di faytful man dehn di tingz weh Ah mi teech yu, ahn weh lata peepl seh da chroo. Den dehnya man wahn kwalifai fi teech dehnya tingz tu ada peepl.
3 Sins yoo da wahn chroo soalja a Krais Jeezas, yu fi bayr op eevn anda sofarin.
4 Wahn man weh serv az wahn soalja noh get involv* eena ada werk fi chrai mek wahn livin,* bikaaz ih waahn pleez di persn weh sain ahn op fi jain di aami.
5 An eevn wen sombadi kompeet eena wahn gaym,* ih noh geh di praiz* anles ih fala di rool dehn.
6 Di faama weh werk haad wahn bee di fers wan fi eet fahn di froots weh ih mi plaant.
7 Aalwayz tink bowt weh Ah di tel yu, ahn di Laad wahn mek yu andastan aala dehnya ting beta.
8 Memba dat Jeezas Krais mi rayz op bak fahn di ded, ahn hihn mi kohn fahn Dayvid famili lain. Dat da di gud nyooz weh Ah preech.
9 Sayka di gud nyooz, Ah di sofa an Ah deh eena prizn laik wahn kriminal. Bot di werd a Gaad noh chayn op.
10 Dat da wai Ah kip aan di bayr op anda evriting fi di sayk a di peepl weh Gaad chooz, soh dat dehn ku geh salvayshan chroo Krais Jeezas tu, lang wid di gloari weh wahn laas fareva.
11 Weh Ah di tel yu now da chroo: If wi ded tugeda, fi shoar wi wahn liv tugeda tu.
12 If wi kip aan di bayr op ahn noh giv op, wi wahn rool tugeda laik king tu. If wi disoan hihn, hihn wahn disoan wi tu.
13 Eevn if wee noh faytful, hihn wahn kantinyu fi bee faytful, kaaz hihn kyaahn disoan ihself.
14 Kip di rimain di bradaz bowt dehnya ting, ahn teech dehn fronta Gaad dat dehn noh fi fait oava werdz. Dehn kaina aagyument noh help nobadi, dehn onli hert* enibadi weh lisn tu dehn.
15 Du yu bes fi pleez Gaad az wahn werkman weh noh ga notn fi shaym fa, an az sombadi weh di teech di werd a di chroot eena di rait way.
16 Bot ton weh fahn foolish taak weh goh gens Gaad, bikaaz dat wahn leed peepl ferda ahn ferda away fahn Gaad.
17 Da kaina taak spred laik wahn soar weh mek di flesh rong it ratn. Haiminayos ahn Faileetos taak laik dat.
18 Dehn don ton weh fahn di chroot di seh dat di rezorekshan don hapm aredi, ahn dehn dischrai di fayt a sohn peepl.
19 Bot eevn soh, Gaad mi lay wahn salid fongdayshan weh stay schrang, ahn dis da di seel weh stamp pan it: “Jehoava noa hoo bilangz tu hihn,” an, “Evribadi weh kaal pahn di naym a Jehoava haftu rijek tingz weh noh raichos.”
20 Now eena wahn big hows yu ku fain dish weh mek owta goal ahn silva, ahn peepl yooz dehn onli pahn speshal okayzhan. Bot yu ku fain dish weh mek owta wud ahn klay tu, ahn peepl yooz dehn fi eniting an evriting.
21 Soh if wahn persn kip faar fahn peepl weh da laik dish weh geh yooz op laik dat, den ih wahn bee laik di dish weh geh yooz onli pahn speshal okayzhan. Ih wahn bee hoali, yoosful tu ih oana, ahn redi fi du lata gud.
22 Yu mos ron weh fahn di dizaiyaz weh yong peepl gat. Bot yu mos chrai haad fi bee moa raichos, ahn fi ga fayt, lov, ahn pees. Du dehndeh tingz lang wid peepl weh kaal pahn di Laad owta wahn kleen haat.
23 Pahn tap a dat, yu mos rijek eni foolish aagyument oava tingz weh noh impoatant, kaaz yu noa dat dehn aalwayz en op eena kwaaril.
24 Ahn wahn slayv a di Laad noh haftu kwaaril, bot ih fi bee jentl tuwaadz evribadi, aybl fi teech gud ahn kanchroal ihself wen peepl du ahn rang.
25 Wahn slayv a di Laad fi bee jentl wen ih di teech enibadi weh noh gree wid weh ih teech. Aftaraal, maybi Gaad wahn alow dehn fi ripent* soh dat dehn ku geh di karek andastandin a di chroot.
26 Wans dehn geh di karek andastandin a di chroot, dehn ku eskayp di Devl chrap, kaaz dehn wahn riyalaiz dat di Devl mi kech dehn jos fi mek dehn du weh hihn waahn.
Futnoat
^ Si di Glasari, “Grayt kainis.”
^ Lit., “noh geh tangl op.”
^ Dis ku aalso bee “eena aadineri, evriday laif.”
^ Lit., “eena di gaym dehn.” Dis inklood lata difrent spoats.
^ Lit., “krong.”
^ Er “dischrai.”
^ Er “fi chaynj dehn main.”
