2 Timoti 4:1-22
4 Wen Krais Jeezas kohn bak, ahn wen ih rool az King a ih Kingdom, ih wahn joj di livin ahn di ded. Ah di gi yu dis koman fronta Gaad, ahn fronta Krais Jeezas:
2 Kip aan di preech di werd joorin gud taimz an joorin bad taimz. Teech peepl gud, karek dehn, ahn waan dehn, bot du it eena wahn payshent way soh dat yu ku inkorij dehn.
3 Wahn taim wahn kohn wen peepl noh wahn waahn lisn tu di gud* teechin. Dehn wahn goh afta weh dehn waahn, ahn soh dehn wahn sorong dehnself wid peepl weh onli teech dehn weh dehn waahn hyaa.*
4 Ahn dehn wahn stap lisn tu di chroot, ahn dehn wahn lisn tu faals stoari insted.
5 Bot yu mos bee sensabl eena evriting weh yu du, bayr op wen yu di fays chraiyalz, kip aan di preech di gud nyooz,* ahn finish di werk weh Gaad gi yu fi du.
6 Ai da laik wahn jrink aafrin weh sombadi poar owt pahn di alta, bikaaz da soon taim fi mek Ah lef fahn ya.
7 Ah don fait di gud fait. Ah don finish ron di rays, an Ah mi fala di fayt.
8 Di Laad da wahn raichos joj, ahn hihn wahn gi mi wahn krong az wahn riwaad pahn da day. Di krong da fi peepl weh raichos, ahn wan a dehn krong wahn bee fi mee. Hihn noh jos wahn gi mee, bot ih wahn giv evribadi weh di wayt wid aala dehn haat fi di taim wen ih wahn kom.
9 Du yu bes fi kohn si mi soon.
10 Deemas lef mi ahn gaan da Tesalonaika bikaaz ih mi lov dis sistem a tingz.* Kresens gaan da Galaysha, ahn Taitos gaan da Dalmaysha.
11 Onli Look deh ya wid mi. Bring Maak lang wid yu, bikaaz ih ku help mi eena di minischri.
12 Bot Ah mi sen Tikikos tu Efisos.
13 Wen yu kohn, bring di koat weh Ah mi lef wid Karpos da Chroawaz, ahn bring di skroal dehn, espeshali di wan dehn weh mek owta leda.
14 Alegzanda, di man weh mek tingz owta kapa, du bad tu mi oava ahn oava. Jehoava wahn pay ahn bak fi weh ih du.
15 Yu mos wach owt fi hihn tu, kaaz hihn reeli deh gens di mesij weh wi preech.
16 Di fers taim Ah mi difen miself da koat, nobadi sopoat mi, bot aala dehn lef mi. Ah pray dat Gaad noh hoal dat gens dehn.
17 Bot di Laad mi deh wid mi fi schrentn mi, soh dat Ah kuda mi preech tu peepl fahn aala di nayshan dehn bowt aal weh di werd a Gaad seh, ahn di Laad sayv mi fahn di mowt a di laiyan.
18 Di Laad wahn reskyu mi fahn evriting weh eevl, an ih wahn kip mi sayf ahn bring mi intu fi hihn Kingdom da hevn. Ah pray dat hihn geh gloari fareva an eva. Aymen.
19 Tel Priska an Akwila, an evribadi eena Onesiforos hows, heloa fi mi.
20 Erastos mi stay da Korint, bot Ah mi lef Chrofimos da Maileetos kaaz ih mi sik.
21 Du yu bes fi reech bifoa winta taim.
Yubyoolos, Pudens, Lainos, Klaadya, an aala di bradaz seh fi tel yu heloa.
22 Ah pray dat di Laad bles di gud spirit weh yu shoa, ahn dat ih kip di shoa yu kainis.
Futnoat
^ Er “helti.”
^ Er “weh tikl dehn ayz.”
^ Er “di du di werk a wahn ivanjelis.”
^ Si di Glasari, “Sistem a tingz.”
