3 Jan 1:1-14
1 Dis leta da fahn mee, Jan, di elda. Ah di rait dis leta tu mi dyaa fren Gaiyos weh Ah onli lov.
2 Mi dyaa brada, Ah pray dat yu wahn ga gud helt ahn dat evriting kantinyu fi goh gud eena yu laif.
3 Ah mi onli hapi wen sohn bradaz mi kom ahn seh dat yu kantinyu fi liv akaadn tu di chroot.*
4 Notn mek Ah feel moa hapiya* dan fi hyaa dat mi chiljren kip aan di liv akaadn tu di chroot.
5 Mi dyaa brada, yu shoa dat yu faytful tu Gaad bai di tingz weh yu du fi di bradaz, eevn wen yu noh noa dehn.
6 Dehn tel di kangrigayshan ya bowt yu lov. Wen dehn goh, pleez sen dehn aaf eena wahn way weh pleez Gaad.
7 Bikaaz da sayka Gaad naym dehn mi gaan owt gaahn preech, ahn dehn neva ekspek notn fahn di peepl a di werl.
8 Soh wi haftu welkom bradaz laik dehndeh ahn bee kain tu dehn, soh dat wi ku werk tugeda fi spred di chroot.
9 Ah mi don rait wahn leta tu di kangrigayshan, bot Daiyachrifeez laik tek fers plays eena di kangrigayshan ahn hihn noh rispek notn weh kohn fahn wee.
10 Dat da wai if Ah kohn tu unu, Ah wahn mek evribadi noa aal weh hihn di du. Hihn onli di seh wikid tingz bowt wi. Pahn tap a dat, ih noh welkom di bradaz ner shoa dehn rispek. An if enibadi els waahn welkom dehn, hihn chrai stap dehn, an ih chrai chroa dehn owta di kangrigayshan.
11 Mi dyaa brada, noh fala no bad egzampl, bot fala di gud egzampl dehn. Enibadi weh du gud bilangz tu Gaad. Enibadi weh du bad noh noa Gaad.
12 Wi hyaa lata gud ting bowt Dimeechriyos fahn aala di bradaz, dat ih di liv akaadn tu di chroot. Wee di tel yu tu, ahn yu noa dat weh wee seh da chroo.
13 Ah ga lat moa weh Ah waahn tel yu, bot Ah noh waahn rait it dong.
14 Rada, Ah hoap Ah ku kohn si yu soon, ahn wi wahn taak fays-tu-fays.
Ah pray dat yu ga pees.
Aala di fren dehn weh deh ya seh fi tel yu heloa. Pleez seh heloa tu eech wan a mi fren dehn weh dehdeh tu.
