Aks 1:1-26
1 Dyaa Tiyofilos, eena di fers buk weh Ah mi rait yu, Ah mi tel yu bowt aala di tingz weh Jeezas mi du ahn teech bowt
2 til di day ih gaan op da hevn. Bifoa ih mi gaan op da hevn doh, di hoali spirit mi gaid ahn fi giv inschrokshanz tu ih apasl dehn weh hihn mi pik.
3 Afta hihn mi sofa, ih apyaa tu dehn lata taimz fi kanvins dehn dat hihn mi alaiv. Dehn mi si ahn fi 40 dayz, ahn hihn mi taak wid dehn bowt di Kingdom a Gaad.
4 Ahn wail Jeezas mi meet wid dehn, ih gi dehn dis koman: “Unu noh fi lef Jeroosalem, bot unu mos wayt fi di gif weh di Faada pramis unu, ahn weh Ah mi tel unu bowt;
5 kaaz Jan mi baptaiz wid waata, bot eena wahn fyoo dayz, Ai wahn baptaiz unu wid hoali spirit.”
6 Soh wen dehn mi gyada tugeda, dehn aks ahn: “Laad, yoo wahn gi bak di kingdom tu Izrel rait now?”
7 Hihn tel dehn: “Onli mai Faada ga di atariti fi set taimz ahn dayz wen tingz wahn hapm, soh unu noh need fi wori bowt dat.
8 Bot unu wahn geh powa wen di hoali spirit kohn pahn unu, an unu wahn gi wahn witnis bowt mee da Jeroosalem, eena aala Judeeya ahn Samayrya, an aal oava di ert.”
9 Afta Jeezas seh dehnya tingz, ahn wail dehn mi stil di luk aan, ih staat tu goh op da hevn. Den wahn klowd kova ahn, an dehn kudn si ahn agen.
10 Dehn mi stil di gayz eena di skai wail ih mi-di goh op, wen sodn-wan too man eena wait kloaz apyaa rait saida dehn,
11 ahn tel dehn: “Unu man fahn Gyalilee, wai unu di luk op eena di skai? Dis Jeezas weh don gaan op eena di skai wahn kohn bak eena di saym way how unu si ih gaan op.”
12 Den dehn lef fahn di Mongt a Alivz ahn gaahn bak da Jeroosalem, weh mi deh bowt haaf mail fahn deh.*
13 Wen dehn reech, dehn gaan opstayz eena di room wehpaat dehn mi-di stay. Da mi Peeta, Jan, Jaymz, Anjru, Filip, Tamas, Bartalamyoo, Machyu, an Alfyos son weh mi naym Jaymz, ahn Saiman di eega wan, ahn Jaymz son weh mi naym Joodas.
14 Aala dehn mi yoonaitid, ahn dehn mi kantinyu fi pray tugeda lang wid sohn laydi, ahn wid Jeezas ma Mayri, an ih breda dehn.
15 Wahn day, bowt 120 bradaz ahn sistaz mi deh tugeda di pray wen Peeta get op ahn seh:
16 “Bradaz, di prafesi weh Dayvid mi seh chroo di hoali spirit bowt Joodas mi haftu kohn chroo. Hihn mi seh dat Joodas mi wahn gaid di soalja dehn fi ares Jeezas,
17 bikaaz hihn da-mi wahn apasl jos laik wee, ahn hihn mi shayr eena dis minischri tu.
18 (Soh den, dis man mi bai wahn feel wid di blod moni weh ih mi get ahn da rait pahn dis feel ih mi jrap pan ih hed, an ih stomok bos oapm an aala ih gots kom owt.
19 Aala di peepl da Jeroosalem mi geh fi noa bowt it, soh dehn mi kaal di feel Akeldama eena fi dehn langwij, weh meen, “Feel a Blod.”)
20 Kaaz eena di buk a Saamz ih seh, ‘Mek ih hows stay emti, ahn noh mek nobadi liv eena it’ ahn den ih seh, ‘Mek sombadi els tek ih pozishan az wahn oavaseeya.’*
21 Soh den, sombadi els need fi tek fi hihn plays; wan a di man dehn weh mi deh wid wi joorin di taim wen wi Laad Jeezas mi deh monks wi.
22 Dis man wuda mi haftu deh rong fahn di taim Jan mi baptaiz Jeezas til di taim Gaad kehr ahn op da hevn. Da persn need fi bee wahn witnis bowt Jeezas rezorekshan.”
23 Soh dehn sojes too man, Joazef, weh dehn kaal Barsabas ahn hoo dehn mi noa az Jostos tu, ahn Mataiyas.
24 Den dehn pray ahn seh: “Wi Gaad, Jehoava, yoo noa weh deh eena evribadi haat, soh pleez shoa wi wich wan a dehnya man yu pik
25 fi bee wahn apasl ahn fi shayr eena dis minischri weh Joodas mi abandan fi du weh hihn mi waahn.”
26 Soh dehn saach fi wahn sain fahn Gaad fi noa hoo fi pik,* ahn Mataiyas naym kom op. Soh hihn geh pik fi bee wahn apasl lang wid di ada 11 apasl.
Futnoat
^ Dis da-mi di distans weh wahn persn kuda mi chravl pahn di Sabat.
^ Dat meenz fi mek sombadi els tek ih plays az wahn oavaseeya eena di kangrigayshan.
^ Dehn mi yooz wahn metod weh mi alow Gaad fi shoa wat da-mi fi hihn wil eena di mata.
