Aks 10:1-48
-
Di vizhan weh Kerneelyos mi si (1-8)
-
Peeta geh wahn vizhan bowt animalz weh Gaad seh hoali (9-16)
-
Peeta gaahn vizit Kerneelyos (17-33)
-
Peeta preech di gud nyooz tu peepl fahn ada nayshanz (34-43)
-
“Gaad chreet evribadi di saym way” (34, 35)
-
-
Peepl fahn ada nayshanz geh di hoali spirit ahn geh baptaiz (44-48)
10 Now wahn man weh mi naym Kerneelyos mi liv eena Seezareeya; hihn da-mi wahn aami aafisa* eena di Italyan chroop.*
2 Hihn an evribadi eena ih hows mi wership Gaad, ahn hihn mi aalwayz di pray an ih du lata gud tingz fi poa peepl.
3 Ahn bowt rong chree aklak wahn day,* wahn aynjel kohn tu ahn eena wahn vizhan, ahn di aynjel seh: “Kerneelyos!”
4 Kerneelyos lef dehsoh jos di stayr pan ahn; ih mi onli fraitn, soh ih seh: “Yes, Laad?” Di aynjel tel ahn: “Gaad hyaa aala yu pryaaz, ahn hihn noatis how yu help owt poa peepl, an ih memba yu.
5 Soh now sen sohn man da Japa an aks fi wahn man weh naym Saiman, weh aalso naym Peeta.
6 Hihn di stay da di hows a wahn man weh aalso naym Saiman, weh mek tingz owta leda, ahn fi hihn hows deh bai di see.”
7 Az soon az di aynjel weh mi-di taak tu ahn mi lef, Kerneelyos kaal too a ih servants ahn wan a ih soalja dehn, hoo da-mi wahn rilijos man,
8 an ih tel dehn evriting ahn sen dehn da Japa.
9 Di neks day az dehn mi-di goh pahn di road ahn wen dehn mi nayli get da di siti, Peeta gaahn pahn di howstap fi pray. Dis da-mi bowt rong 12 aklak eena di aftanoon.*
10 Bot hihn geh hongri an ih mi waahn eet bad. Soh wail ih mi-di wayt fi ih food, ih si wahn vizhan.
11 Ih si hevn oapm op ahn sohnting weh luk laik wahn big linen sheet geh let dong tu di ert bai di foa kaanaz;
12 an ih mi gat aal kaina difrent animal eena it: sohn wid foa fut, sohn reptail,* ahn sohn berdz.
13 Den wahn vais tel ahn: “Peeta, get op, kil wan a dehnya animal an eet it!”
14 Bot Peeta seh: “No, Laad, Ah wuda neva du dat, kaaz Ai neva eet eniting weh noh kleen ahn weh noh hoali.”
15 Ahn di vais taak tu ahn fi di sekant taim: “Gaad don seh dehnya tingz hoali, soh stap seh dehnya tingz noh kleen.”
16 Dis hapm wahn terd taim, ahn rait away weh Peeta mi si gaahn schrayt bak da hevn.
17 Wail Peeta mi stil di chrai figa owt weh di vizhan meen, di man dehn weh Kerneelyos sen mi fain Saiman hows ahn dehn mi-di stan op bai di gayt.
18 Soh dehn aks if Saiman Peeta mi-di stay deh.
19 Ahn wail Peeta mi stil di tink bowt di vizhan, di hoali spirit seh: “Chree man di luk fi yu.
20 Soh goh dongstayz ahn goh lang wid dehn, noh tink twais bowt it, bikaaz da mee mi sen dehn.”
21 Den Peeta gaahn dongstayz ahn tel di man dehn: “Da mee unu di luk fa. Wai unu deh ya?”
22 Dehn tel ahn: “Wahn hoali aynjel mi tel Kerneelyos fi sen kaal yu fi mek yu kohn da ih hows soh dat ih ku hyaa weh yu ga fi seh. Hihn da wahn aami aafisa weh fyaa Gaad ahn weh ga wahn gud repyutayshan monks di hoal Jooish nayshan.”
23 Soh ih invait dehn fi kom eena di hows ahn dehn stay deh wid ahn az ih ges.
Di neks day ih gaahn wid dehn, ahn som a di bradaz fahn Japa mi gaahn lang wid ahn.
24 Di day afta dat ih reech da Seezareeya. Ahn Kerneelyos mi-di ekspek dehn, soh ih kaal ih relitiv dehn ahn kloas frenz tugeda.
25 Az Peeta gaan eena di hows, Kerneelyos bow dong tu ahn.
26 Bot Peeta seh: “Get op, Ai da wahn man jos laik yoo.”
27 Soh dehn gaan eena di hows tugeda ahn dehn mi-di taak lang di way; wen Peeta luk rong, ih si dat lata peepl mi-di wayt far ahn.
28 Peeta tel dehn: “Unu noa dat ih gens di laa fi mek wahn Joo taak wid wahn man fahn wahn nada rays er eevn goh op tu ahn, an yet Gaad shoa mee dat Ai noh fi seh dat nobadi noh kleen er hoali eena Gaad sait.
29 Soh den, wen yoo mi sen fi mi, Ai kohn rait away; dats wai Ai mi aks weh yoo mi waahn si mi fa.”
30 Den Kerneelyos seh: “Foa dayz agoa, Ah mi-di pray eena mi hows rong dis saym taim* ya; an Ah si wahn man wid brait kloaz di stan op fronta mi.
31 Di man tel mi: ‘Kerneelyos, Gaad hyaa yu pryaa an ih memba aal di gud tingz yu du fi poa peepl.
32 Soh, sen sohn man da Japa fi kaal Saiman Peeta. Hihn di stay eena wahn hows bai di see wid wahn man weh aalso naym Saiman, weh mek tingz owta leda.’
33 Soh rait away Ah sen fi yu, an Ah onli glad dat yu kuda mi mek it. Aala wi deh ya fronta Gaad fi hyaa weh Jehoava koman yu fi tel wi.”
34 Soh Peeta staat tu taak, an ih seh: “Now Ai andastan fi chroo dat Gaad chreet evribadi di saym way.
35 Ahn hihn aksep enibadi weh fyaa Gaad ahn du weh rait, noh mata weh nayshan dehn kohn fram.
36 Gaad sen wahn mesij, weh da-mi di gud nyooz a pees, tu di Izrelait dehn. Ih mi sen dis mesij chroo Jeezas, hoo da evribadi Laad.
37 Ahn da mesij mi geh preech chroo di hoal a Judeeya, staatin fahn Gyalilee afta Jan mi preech fi hihn mesij bowt baptizm.
38 Da mesij da-mi bowt Jeezas fahn Nazaret, ahn how Gaad mi anoint ahn wid hoali spirit ahn giv ahn powa. Ahn Gaad mi deh wid ahn; an hihn gaahn chroo di hoal ayrya wid di gud nyooz an ih mi heel peepl weh di Devl mi-di kaaz fi sofa.
39 Ahn wee mi si aala di tingz weh hihn mi du eena di ayrya weh di Jooz liv an eena Jeroosalem, ahn yet, dehn kil ahn pahn di stayk.*
40 Bot Gaad mi rayz ahn op fahn di ded pahn di terd day soh dat peepl kuda mi si ahn.
41 Bot noh evribadi mi si ahn, onli wee mi si ahn. Wee mi eet an jrink wid ahn afta Gaad mi rayz ahn op fahn di ded. Gaad mi chooz wee heda taim fi si ahn an fi witnis bowt hihn.
42 Aalso, Jeezas mi aada wi fi preech tu di peepl ahn fi giv wahn gud witnis tu dehn. Wi fi tel dehn dat Gaad chooz hihn fi joj di livin ahn di ded.
43 Aala di prafit dehn mi taak bowt hihn; dehn seh dat chroo Jeezas naym, Gaad wahn fergiv di sinz a evribadi weh ga fayt eena hihn.”
44 Wail Peeta mi stil di taak bowt dehnya tingz, di hoali spirit kohn pahn aala di peepl weh mi-di lisn tu di werd a Gaad.
45 Ahn di Jooish bileevaz* weh mi kohn lang wid Peeta mi sopraiz, bikaaz Gaad mi poar owt di hoali spirit, weh da wahn gif fahn Hihn, tu peepl fahn ada nayshanz.
46 Kaaz dehn hyaa how di peepl mi-di taak eena difrent langwij* ahn prayz Gaad. Den Peeta seh:
47 “Dehnya peepl get di hoali spirit jos laik how wee mi get it, soh now, wich wan a wi kuda eva seh dat dehn kyaahn geh baptaiz?”
48 Wid dat, ih koman fi mek dehn geh baptaiz eena di naym a Jeezas Krais. Den dehn aks ahn if ih wuda stay fi wahn fyoo dayz wid dehn.
Futnoat
^ Hihn mi in chaaj a 100 soaljaz.
^ Wahn chroop a 600 Roaman soaljaz.
^ Lit., “di naint owa.”
^ Lit., “di siks owa.”
^ Er “tingz weh kreep.”
^ Bowt 3:00 p.m.
^ Er “chree.”
^ Lit., “bileevaz weh mi geh serkomsaiz.”
^ Lit., “eena difrent tongz.”
