Aks 12:1-25
12 Rong da taim deh, Herod di king staat tu persikyoot som a di bradaz eena di kangrigayshan.
2 Hihn tel ih soalja dehn fi tek wahn soad ahn kil Jaymz, hoo da-mi Jan breda.
3 Ahn wen Herod si dat di Jooz mi onli hapi fi hyaa dat, ih tel ih soalja dehn fi goh ares Peeta tu. (Dis mi hapm joorin di dayz a di Festival a di Bred Widowt Ees.)
4 Fi hihn soalja dehn ares Peeta ahn put ahn eena prizn, an ih put foa groop a soalja fi gyaad Peeta. Eech groop mi ga foa soalja. Ih du dat kaaz ih mi waahn kehr ahn* fronta di peepl afta di Paasoava.
5 Soh wail Peeta mi deh eena prizn, di kangrigayshan mi kip aan di pray tu Gaad far ahn wid dehn hoal haat.
6 Now, di nait bifoa Herod mi wahn kehr Peeta owt fronta di peepl, Peeta mi-di sleep, an ih mi deh chayn op bitween too soalja, ahn sohn gyaad mi deh da di front doa di kip wach oava di prizn.
7 Bot Jehoava aynjel apyaa, ahn wahn lait shain eena di prizn sel. Den di aynjel shayk Peeta ahn wayk ahn op; ih tel ahn: “Hori get op!” Ahn di chayn dehn jrap rait aafa Peeta han dehn.
8 Di aynjel tel ahn: “Geh redi ahn put aan yu sandalz.” Soh Peeta du weh ih tel ahn fi du. Fainali, di aynjel tel ahn: “Put aan yu jakit ahn stay rait bihain mi.”
9 Ahn Peeta lef di prizn sel, an ih stay rait bihain di aynjel. Ih neva noa dat weh di aynjel mi-di du mi reel. In fak, hihn mi eevn tink dat hihn mi-di si wahn vizhan.
10 Dehn gaahn paas di fers ahn di sekant gyaad stayshan, den dehn reech di aiyan gayt weh kehr dehn owt tu di siti, ahn di gayt oapm op aal bai ihself fi mek dehn paas chroo. Wen dehn kom owt, dehn gaahn dong wahn schreet, ahn rait away di aynjel lef ahn.
11 Ahn wen Peeta riyalaiz weh mi-di hapm, ih seh: “Now Ah noa fi shoar dat Jehoava sen ih aynjel fi reskyu mi fahn Herod ahn fahn evriting weh di Jooz mi-di ekspek fi hapm tu mi.”
12 Afta Peeta riyalaiz weh mi jos hapm, ih gaan da Mayri hows. Shee da-mi Jan ma, di saym Jan weh dehn mi aalso kaal Maak. Wen ih get deh, wahn groop a disaipl mi gyada tugeda, ahn dehn mi-di pray.
13 Wen ih nak pahn di doa a di mayn gayt, wahn servant gyal weh mi naym Roada kohn da di doa.
14 Wel, wen shee rekonaiz Peeta vais, shee mi soh hapi dat ih neva eevn oapm di gayt. Insted, shee ron bak eensaid ahn tel di disaipl dehn dat Peeta mi-di stan op bai di gayt.
15 Dehn tel ahn: “Roada, yoo owta yu main.” Bot shee insis dat shee mi hyaa Peeta vais. Den dehn seh: “Da wahn aynjel* dehdeh man!”
16 Now, Peeta mi deh owtsaid di nak ahn nak pahn di doa. Wen dehn oapm it, dehn si ahn an dehn mi sopraiz.
17 Bot ih mek sain wid ih han ahn tel dehn fi bee kwaiyet, an ih tel dehn evriting bowt how Jehoava mi reskyu ahn fahn prizn. Den ih tel dehn: “Goh tel Jaymz ahn di ada bradaz bowt dehnya tingz.” Afta dat, ih lef ahn chravl tu wahn nada plays.
18 Now wen maanin kom, wahn big komoashan mi-di hapm monks di soalja dehn kaaz dehn neva noa weh gaan aan wid Peeta.
19 Soh Herod saach aal oava di plays far ahn, an ih kudn fain ahn. Ih kweschan di gyaad dehn ahn gi di koman fi mek dehn geh ponish. Afta dat, Herod lef Judeeya ahn gaan da Seezareeya ahn spen sohn taim deh.
20 Now ih mi beks bad* wid di peepl fahn Taiya ahn Saidan. Dehnya peepl yoostu bai food fahn di lan weh Herod rool oava, soh dehn kohn wid wan perpos ahn bayg Blastos, di persn in chaaj a di king hows, fi help dehn, soh dehn taak wid di king kaaz dehn mi waahn mek pees.
21 Wan day wen di peepl mi gyada tugeda, Herod put aan ih raiyal roab ahn sidong pahn di jojment seet ahn staat tu taak tu di peepl.
22 Den di peepl staat tu showt: “Fi hihn vais song laik di vais a wahn gaad, noh laik wahn man vais!”
23 Rait away di aynjel a Jehoava mek sohn wermz eet op Herod an ih ded, kaaz ih neva gi di gloari tu Gaad.
24 Di werd a Jehoava mi kantinyu fi spred, ahn wahn lata peepl staat tu bileev.
25 Afta Baarnabas ahn Saal kehr di tingz weh dehn mi kalek fi di bradaz da Jeroosalem, dehn gaahn bak da Antiyak ahn kehr Jan Maak lang wid dehn.
