Aks 14:1-28
14 Now da Aikoanyom, Paal ahn Baarnabas gaan eena di Jooish sinagag, ahn dehn mi taak wid soh moch wizdom dat wahn lata di Jooish ahn Greek peepl mi staat tu bileev.
2 Bot di Jooz weh neva bileev ster op di peepl* a di nayshanz ahn mek dehn hayt di bradaz.
3 Soh Paal ahn Baarnabas mi spen wahn lang taim da Aikoanyom, ahn Jehoava gi dehn di powa fi preech wid korij. Hihn mi yooz dehn fi perfaam sainz ahn miraklz az proof dat di mesij weh dehn mi-di preech bowt fi hihn grayt kainis* da-mi di chroot.
4 Bot di peepl fahn di siti kudn mek op dehn main; som a dehn mi tek said wid di Jooz bot adaz mi tek said wid di apasl dehn.
5 Bikaaz a dat, di Jooz lang wid dehn roolaz ahn di peepl a di nayshanz mi staat tu luk fi Paal ahn Baarnabas kaaz dehn mi waahn shaym dehn op ahn den stoan dehn.
6 Soh wen Paal ahn Baarnabas fain owt, dehn ron gaan da Lischra ahn Derbi, too siti eena Likionya, ahn di vilij dehn rong deh.
7 Ahn dehn kantinyu fi preech di gud nyooz deh.
8 Now eena Lischra, dehn mi ga wahn man weh mi gat ih too fut kripl. Ahn hihn neva waak bifoa eena ih hoal laif.
9 Dis man mi-di sidong ahn lisn tu weh Paal mi-di preech. Ahn Paal si dat ih mi ga fayt dat ih kuda mi geh heel.
10 Soh Paal tel di man wid wahn lowd vais: “Stan op.” Soh di man jomp op ahn staat waak.
11 Ahn wen di peepl fahn Likionya si weh Paal mi du, dehn hala owt eena dehn langwij: “Di gaadz ton intu hyoomanz ahn kohn dong tu wi!”
12 Ahn dehn staat tu kaal Baarnabas Zoos, bot dehn kaal Paal Hermeez, sins Paal mi-di du moas a di taakin.
13 Now, Zoos templ mi deh kloas tu Lischra. Soh di prees fahn Zoos templ mi kehr sohn bul ahn flowaz* da di gayt dehn a di siti. Kaaz di prees ahn di peepl mi waahn aafa sakrifais tu Paal ahn Baarnabas.
14 Bot wen di apasl dehn, Baarnabas ahn Paal, hyaa bowt it, dehn tayr dehn kloaz* ahn ron tuwaadz di krowd ahn hala owt:
15 “Bradaz, wai unu di du dehnya tingz? Wee da hyoomanz jos laik unu; wi fays di saym kaina sofarin laik unu. Wi di preech tu unu bowt di gud nyooz kaaz wi waahn unu stap wership wotlis tingz ahn wership di livin Gaad, di wan weh mek di hevn ahn di ert ahn di see an evriting weh deh eena dehn.
16 Eena di paas, ih yoostu alow di nayshan dehn fi du weh dehn waahn.
17 Ahn yet, ih stil gi wahn witnis bowt ihself wen ih du aala dehn gud tingz fi unu; ih giv unu rayn fahn hevn ahn di difrent froots akaadn tu dehn seezn; ih provaid food fi mek unu eet til unu satisfai ahn hapi.”
18 Bot eevn doa dehn mi seh aala dehndeh tingz, dehn kuda mi bayli stap di krowd fahn mek di sakrifais tu dehn.
19 Bot sohn Jooz reech deh fahn Antiyak an Aikoanyom ahn kanvins di krowd fi ton gens Paal, soh dehn stoan ahn an jreg ahn owtsaida di siti. Dehn mi tink ih ded, soh dehn lef ahn deh.
20 Bot wen di disaipl dehn stan op rong ahn, ih get op ahn gaahn rait bak eena di siti. Di neks day, hihn ahn Baarnabas gaan da Derbi.
21 Afta dehn shayr di gud nyooz eena da siti ahn mek wahn lata nyoo disaiplz, dehn gaahn bak da Lischra, Aikoanyom, an Antiyak.
22 Paal ahn Baarnabas mi schrentn di bradaz* eena dehndeh siti fi stay schrang; dehn tel dehn: “Wi wahn haftu paas chroo lata chribyulayshan bifoa wi get eena di Kingdom a Gaad.”
23 Dehn mi apoint som a di bradaz fi bee eldaz eena eech kangrigayshan. Den dehn mi faas widowt eet ahn dehn pray wid dehn, ahn den lef dehn eena Jehoava han, di wan weh dehn bileev eena.
24 Den dehn gaahn chroo di ayrya a Pisidya ahn reech Pamfilya.
25 An afta dehn preech di werd a Gaad da Perga, dehn gaahn tu Atalaiya.
26 Fahn deh, dehn sayl tu Antiyak wehpaat di bradaz mi pray fi mek Gaad shoa ih grayt kainis tu Paal ahn Baarnabas soh dat dehn kuda mi du dehn werk, ahn bai now, dehn mi finish dis werk.
27 Wen Paal ahn Baarnabas get da Antiyak ahn gyada di kangrigayshan tugeda, dehn tel di bradaz bowt evriting weh Gaad mi du chroo dehn, ahn dat hihn mi oapm di way fi mek ada nayshanz aksep di fayt.*
28 Soh dehn mi stay wahn wail wid di disaipl dehn.
Futnoat
^ Er “di soalz a di peepl.”
^ Si di Glasari, “Grayt kainis.”
^ Er “reet.”
^ Dehn tayr dehn kloaz fi shoa dat dehn neva laik dat di prees ahn di peepl mi-di chreet dehn laik gaadz.
^ Er “di soalz a di disaipl dehn.”
^ Lit., “oapm di doa a fayt tu di nayshanz.”
