Aks 15:1-41
-
Di heetid aagyument da Antiyak bowt serkomsizhan (1, 2)
-
Paal ahn Baarnabas gaan da Jeroosalem fi setl di ishu bowt serkomsizhan (3-5)
-
Di eldaz an apasl dehn meet tugeda (6-21)
-
Wahn leta fahn di govanin badi (22-29)
-
Kip weh fahn blod (28, 29)
-
-
Di leta mi reeli inkorij di kangrigayshan dehn (30-35)
-
Paal ahn Baarnabas gaahn dehn oan way (36-41)
15 Now sohn man kohn dong fahn Judeeya ahn staat tu teech di bradaz, dehn seh: “Anles unu geh serkomsaiz laik weh di Laa a Moaziz seh fi du, Gaad noh wahn sayv unu.”
2 Wel, Paal ahn Baarnabas get eena wahn heetid aagyument wid dehn fi wahn wail. Soh afta dat, di bradaz disaid fi sen Paal, Baarnabas, ahn som a di ada bradaz tu di apaslz an eldaz da Jeroosalem fi setl dis ishu.*
3 Soh afta di kangrigayshan gaahn wid dehn haafway, Paal, Baarnabas, ahn di ada bradaz kantinyu pahn dehn way tu Foneesha ahn Samayrya; dehn mi-di tel di bradaz bowt humoch peepl a di nayshanz ton tu Gaad, ahn di bradaz mi onli hapi fi hyaa dat.
4 Wen dehn reech Jeroosalem, dehn mi geh wahn waam welkom fahn di kangrigayshan, di apaslz, ahn di eldaz, ahn dehn tel dehn bowt aala di tingz weh Gaad mi du chroo dehn.
5 Bot som a di bradaz weh yoostu bee Farisee bifoa, bot weh da-mi bileevaz now, get op fahn dehn seet ahn seh: “Di bileeva dehn weh da noh Jooz haftu geh serkomsaiz, ahn dehn need fi fala di Laa a Moaziz.”
6 Soh di apaslz ahn di eldaz gyada tugeda fi diskos dis mata.
7 Bot afta dehn si dat dehn kudn mek no hedway, Peeta get op ahn tel dehn: “Mi bradaz, unu wel ahn noa dat owta aala wee, Ai da-mi di fers wan weh Gaad chooz fi preech di gud nyooz tu peepl weh da noh Jooz soh dat dehn ku bileev.
8 Ahn Gaad da di wan weh noa weh deh eena peepl haat, soh wen hihn gi dehn di hoali spirit jos laik how wee mi get it, ih shoa dehn dat hihn aksep dehn.
9 Gaad noh si no difrens bitween wee ahn di peepl weh da noh Jooz, bot hihn kleen dehn haat bikaaz a dehn fayt.
10 Soh now, da wai unu di tes Gaad laik dis? Unu di chrai put wahn hevi berdn pahn di disaiplz. Memba dat noh eevn wee ner wi ansesta dehn kuda mi bak it.
11 Pahn di ada han, wee weh da Jooz ga fayt dat wee di geh sayv chroo di grayt kainis* a di Laad Jeezas jos laik di peepl weh da noh Jooz.”
12 Wid dat evribadi geh kwaiyet, ahn dehn staat tu lisn tu Baarnabas ahn Paal az dehn taak bowt how Gaad mi du aal kaina sain ahn miraklz chroo dehn fi di peepl weh da noh Jooz.
13 Afta dehn finish taak, Jaymz seh: “Mi bradaz, unu lisn tu mi.
14 Simiyan jos tel wi dat now Gaad di aksep peepl a di nayshanz ahn kaal dehn bai fi hihn naym.
15 Ahn weh di prafit dehn mi rait agree wid dis; dehn seh:
16 ‘Afta dehnya tingz Ah wahn kohn bak an Ah wahn bil op bak di hows a Dayvid weh mi faal dong; Ah wahn pik op aala di pees dehn ahn put dehn bak tugeda,
17 soh dat di peepl weh servaiv ku serv Jehoava lang wid di peepl a di nayshanz. Dehnya da di peepl weh Ai kaal bai mai naym, Jehoava seh, ahn da mee di du dehnya tingz,
18 an Ai disaid fi du dehnya tingz fahn lang taim.’
19 Soh den, eena mai opinyan, wi shudn mek chrobl fi di peepl weh da noh Jooz ahn weh di chrai serv Gaad,
20 bot wi ku rait tu dehn fi kip weh fahn eniting weh ga fi du wid aidol, fahn sekshwal imoraliti,* fahn eni animal weh geh schrangl,* ahn fahn blod.
21 Fahn way bak, eena evri siti peepl mi aalwayz di preech bowt Moaziz, bikaaz pahn evri sabat eena di sinagag dehn, peepl reed di ting dehn weh hihn mi rait.”
22 Den di apaslz ahn di eldaz, lang wid di hoal kangrigayshan, disaid fi sen too bradaz fahn monks dehn tu Antiyak, lang wid Paal ahn Baarnabas. Dehn mi sen Joodas, weh dehn kaal Baarsabas, ahn Sailas; dehnya too man mi ga sohn seeryos rispansabiliti monks di bradaz.
23 Dehn rait dis leta ahn sen it wid dehn:
“Dyaa bradaz, wee di apaslz ahn di eldaz weh da unu felo bradaz sen greetinz tu wi bradaz weh da noh Jooz eena Antiyak, Siriya, ahn Silaisya.
24 Bradaz, wi geh fi hyaa dat som a di peepl fahn ya di kaaz unu chrobl ahn di chrai kanfyooz unu* wid weh dehn seh, bot wee neva gi dehn eni kaina inschrokshanz fi du dat.
25 Aala wi disaid fi sen too bradaz tu unu lang wid wi dyaa bradaz, Baarnabas ahn Paal.
26 Dehnya bradaz put dehn laif* eena daynja fi di sayk a di naym a wi Laad Jeezas Krais.
27 Soh den, wi di sen Joodas ahn Sailas tu unu soh dat apaat fahn dis leta, dehn wahn ku ripoat tu unu di saym tingz weh deh een deh.
28 Di hoali spirit help wi fi disaid dat wi noh need fi put wahn ekschra berdn pahn unu. Bot unu need fi fala dehnya tingz:
29 Unu fi kip weh fahn eniting weh ga fi du wid aidol, fahn blod, fahn eni animal weh geh schrangl,* ahn fahn sekshwal imoraliti.* Tingz gwehn gud fi unu if unu kip weh fahn dehnya tingz. Unu tek kayr!”
30 Soh wen dehnya bradaz lef fahn Jeroosalem, dehn gaan da Antiyak ahn dehn gyada op wahn hoal groop a disaiplz ahn gi dehn di leta.
31 Afta dehn reed di leta, evribadi mi ful op a jai ahn dehn mi feel inkorij.
32 Ahn Joodas ahn Sailas, hoo da-mi aalso prafits, mi inkorij ahn schrentn di bradaz wid sohn taak.
33 Afta dehn mi spen sohn taim deh wid dehn, di bradaz tel dehn gudbai ahn dehn gaahn bak da Jeroosalem.
34 *——
35 Bot Paal ahn Baarnabas stay da Antiyak, ahn dehn mi-di preech ahn teech lang wid sohn ada bradaz bowt di gud nyooz a di werd a Jehoava.
36 Now afta sohn dayz, Paal tel Baarnabas: “Mek wi goh bak tu aala di siti dehn weh wi mi preech di werd a Jehoava, ahn si how di bradaz di du.”
37 Baarnabas mi-di insis fi kehr Jan, weh dehn kaal Maak, lang wid dehn.
38 Bot Paal neva gree wid dat, kaaz Jan mi lef dehn wen dehn mi deh da Pamfilya, insteda gaahn help dehn preech.
39 Wel, sayka dis, big aagyument brok owt, ahn di too a dehn gaahn dehn oan way; Baarnabas kehr Maak wid ahn an sayl tu Saipros.
40 Bot Paal mi chooz Sailas fi goh wid ahn, an afta di bradaz mi pray tu Jehoava fi tek kayr a ahn, ih gaan.
41 Hihn mi chravl chroo Siriya ahn Silaisya di schrentn di kangrigayshan dehn.
Futnoat
^ Er “aagyument.”
^ Si di Glasari, “Grayt kainis.”
^ Di Greek werd da por·neiʹa. Si di Glasari, “Sekshwal imoraliti.”
^ Er “fahn eni animal weh dehn kil widowt jrayn ih blod.”
^ Er “unu soal.”
^ Er “soal.”
^ Er “fahn eni animal weh dehn kil widowt jrayn ih blod.”
^ Di Greek werd da por·neiʹa. Si di Glasari, “Sekshwal imoraliti.”
^ Si di futnoat da Machyu 17:21.
