Aks 22:1-30
22 “Mi bradaz ahn faadaz, pleez lisn az Ah eksplayn tu unu weh mi hapm.”
2 Wen di krowd a peepl hyaa dat Paal mi-di taak eena fi dehn Heebroo langwij, dehn geh kwaiyet. Den Paal tel dehn:
3 “Ai da wahn Joo an Ai mi baan da Tarsos weh deh eena Silaisya. Bot Ah mi get ejukaytid eena dis siti an Ai da-mi wan a Gamalyel styoodent. Ah mi laan fi fala evri lee deetayl a di Laa weh wi ansestaz yoostu fala, an Ah mi eega fi serv Gaad jos laik aala unu.
4 Ah yoostu persikyoot enibadi weh mi bilangz tu Di Way,* ahn dis mi kaaz dehn det; man an uman Ah mi ares ahn chroa eena jayl.
5 Di hai prees ahn di hoal Jooish kongsl ku seh dat da chroo. Az a mata a fak, Ah mi geh di letaz fahn dehn fi ares di bradaz da Damaskos, an Ah mi deh pahn mi way fi ares dehn ahn chayn dehn op ahn bring dehn da Jeroosalem fi ponish dehn.
6 “Bot wen Ah mi deh pahn mi way tu Damaskos, ahn wen Ah mi soon reech, sodn-wan rong mid-day, wahn brait lait fahn hevn flash aal rong mi,
7 an Ah jrap da grong ahn den Ah hyaa wahn vais tel mi: ‘Saal, Saal, da wai yoo di persikyoot mi?’
8 Soh Ah aks ahn: ‘Da hoo yoo, Laad?’ Ih tel mi: ‘Ai da Jeezas di Nazareen, an Ai da di wan weh yoo di persikyoot.’
9 Di man dehn weh mi deh wid mi si di lait, bot dehn neva hyaa weh di wan weh mi-di taak tu mi seh.
10 Den Ah seh: ‘Da weh Ah fi du, Laad?’ Di Laad tel mi: ‘Get op ahn goh tu Damaskos, ahn rait deh sombadi wahn tel yu evriting weh Ah waahn yu du.’
11 Di lait mi soh brait dat Ah kudn si eniting, soh di man dehn weh mi deh wid mi mi haftu hoal mi han dehn ahn leed mi tu Damaskos.
12 “Den wahn man weh mi naym Ananaiyas, weh mi fyaa Gaad an obay di Laa kohn si mi. An aala di peepl weh mi liv deh mi taak gud bowt hihn.
13 Ih kohn tu mi ahn seh: ‘Saal, mi brada, get bak yu sait!’ Ah luk op ahn rait away Ah kuda mi si ahn.
14 Ih tel mi: ‘Di Gaad a wi ansesta dehn chooz yoo fi noa fi Hihn wil ahn fi si di raichos wan ahn fi hyaa ih vais.
15 Yoo wahn bee fi hihn witnis; da yoo wahn tel di peepl bowt aala di tingz weh yu si ahn hyaa.
16 Soh weh yu di wayt fa? Get op ahn geh baptaiz. Kaal pahn di naym a Jeezas, ahn Gaad wahn fergiv yu sin dehn.’
17 “Bot wen Ah get bak da Jeroosalem, Ah mi deh da di templ di pray an Ah si wahn vizhan.
18 Ah si di Laad, an ih tel mi: ‘Hori op ahn get owta Jeroosalem, kaaz di peepl noh wahn aksep weh yu tel dehn bowt mi.’
19 Den Ah seh: ‘Laad, dehn noa dat Ai yoostu goh tu wan sinagag afta di ada fi ares ahn beet di wan dehn weh bileev eena yoo.
20 Ahn wen dehn mi-di kil Steeven, hoo yoostu witnis bowt yu, Ai mi dehdeh di agree wid dehn, an Ah mi-di main di kloaz a di wan dehn weh mi-di kil ahn.’
21 Bot stil di Laad tel mi: ‘Get op ahn goh, kaaz Ai wahn sen yu tu di peepl a di ada nayshanz weh deh faar fahn ya.’”
22 Now di krowd mi-di lisn tu Paal gud til ih seh dehndeh werdz, den dehn staat hala: “Dis man noh fit fi liv pahn ert, kil ahn!”
23 Now bikaaz di krowd mi stay di hala ahn chroa dehn koat bowt di plays ahn chroa dos eena di ayaa,
24 di aami komanda sen aadaz fi mek dehn bring Paal tu di ayrya weh di soaljaz stay soh dat dehn ku beet Paal til ih tel dehn weh ih du. Di komanda mi waahn du dis fi fain owt wai di peepl mi waahn kil Paal.
25 Bot wen dehn mi tai ahn op fi beet ahn wid wahn wip, Paal aks di aami aafisa weh mi-di stan op kloas tu ahn: “Ih gens di laa fi beet wahn Roaman sitizn widowt ga wahn koat kays fers?”
26 Wel, wen di aami aafisa hyaa dis, ih gaahn tu di aami komanda ahn tel ahn: “Da weh yu wahn du now? Kaaz dis man da wahn Roaman sitizn.”
27 Soh di aami komanda gaahn tu Paal an aks ahn: “Tel mi, yoo da wahn Roaman sitizn?” Paal tel ahn: “Yes Ai da wahn Roaman sitizn.”
28 Di aami komanda tel ahn: “Ai mi pay wahn lata moni fi bee wahn Roaman sitizn.” Paal tel ahn: “Wel, Ai baan az wahn Roaman sitizn.”
29 Soh rait away di soalja dehn weh mi wahn beet Paal ahn kweschan ahn lef ahn loan; ahn di aami komanda mi geh frayd wen ih riyalaiz dat Paal da-mi wahn Roaman sitizn ahn dat hihn mi gat ahn chayn op.
30 Soh di neks day, bikaaz di aami komanda mi reeli waahn noa wai di Jooz mi-di akyooz Paal, ih tek aaf di chayn dehn fahn Paal an ih koman di cheef prees dehn ahn di Jooish Sopreem Koat fi gyada tugeda. Den ih kehr Paal tu dehn, an ih mek ih stan op fronta aala dehn.
Futnoat
^ Dis di rifaa tu di way wahn Kristyan liv ahn tu ih teechinz.
