Aks 26:1-32
26 Agripa tel Paal: “Yu ku goh hed ahn difen yuself now.” Soh Paal rayz ih han ahn seh:
2 “King Agripa, Ah hapi dat tudeh Ah deh fronta yoo fi difen miself gens aala di akyoozayshan weh di Jooz di mek gens mi,
3 espeshali bikaaz yoo da wahn ekspert wen ih kohn tu di kostomz an aala di tingz weh di Jooz aagyu bowt. Soh Ah bayg yu fi pleez lisn tu mi ahn bee payshent wid mi.
4 “Wahn lata di Jooz noa di way Ah mi liv fan Ah mi smaal til di taim Ah kohn da Jeroosalem.
5 An if dehn mi wilin, dehn kuda tel yu dat Ai yoostu bee wahn Farisee, ahn di Farisee dehn moa schrik dan di ada Jooz wen ih kohn tu how wi obay di laa.
6 Ahn now, Ah deh pahn chraiyal bikaaz Ah ga hoap eena di pramis weh Gaad mek tu wi ansestaz.
7 Ahn di 12 chraib a wi peepl ga hoap eena dis saym pramis tu, ahn dehn noa dat dis pramis wahn kohn chroo, ahn sayka dat dehn mi-di serv Gaad day ahn nait. Yu Majesti, bikaaz Ai bileev eena dis saym pramis, di Jooz di akyooz mi.
8 “Tel mi, da wai ih soh haad fi mek unu bileev dat Gaad ku rayz op bak di ded?
9 Fi wan ting, Ai mi bileev dat Ah shuda du evriting Ah kud fi goh gens di naym a Jeezas di Nazareen.
10 Ahn dis da egzakli weh Ah mi du da Jeroosalem. Ah mi geh atariti fahn di cheef prees dehn fi lak op wahn lata di hoali wan dehn eena prizn. Ai mi agree fi mek dehn kil dehn.
11 Ah mi gaahn fahn sinagag tu sinagag fi ponish dehn, an Ah mi chrai foas dehn fi disoan dehn fayt. Ah eevn gaan da ada sitiz fi persikyoot dehn bikaaz Ah mi hayt dehn soh bad.
12 “Bot wahn taim, Ah mi-di goh da Damaskos bikaaz di cheef prees dehn gi mi atariti fi goh du di saym ting deh.
13 Yu Majesti, wail Ah mi deh pahn di road, Ah si wahn brait lait rong mid-day. Ih mi braita dan di son an ih flash aal rong mee ahn di man dehn weh mi-di chravl wid mi.
14 Ahn wen aala wi jrap dong, Ah hyaa wahn vais seh tu mi eena Heebroo: ‘Saal, Saal, da wai yu di persikyoot mi? Yu di hert yu oanself wen yu fait gens mi.’*
15 Bot Ai seh: ‘Da hoo yoo, Laad?’ Hihn tel mi: ‘Ai da Jeezas; Ai da di wan weh yoo di persikyoot.
16 Bot get op ahn stan op pahn yu fut dehn. Ah apyaa tu yu bikaaz Ah chooz yu az wahn servant fi preech bowt di tingz weh yu don si ahn bowt di tingz weh yu wahn si, tingz weh ga fi du wid mee.
17 Ai wahn reskyu yu fahn dis peepl ahn fahn di peepl weh da noh Jooz weh Ah di sen yu tu.
18 Ah di sen yu fi oapm dehn aiy soh dat dehn ku ton weh fahn di daaknis tu di lait, ahn fahn deh anda di powa a Saytan tu Gaad. Ahn bikaaz dehn ga fayt eena mee, Gaad wahn fergiv dehn sinz, ahn Hihn wahn riwaad dehn ahn set dehn wan said fi hoali servis, saym laik how ih du wid ih ada faytful servants.’
19 “Soh King Agripa, Ah mi obay weh Jeezas mi koman wen ih mi apyaa tu mi fahn hevn.
20 Fers, Ah gaahn preech tu di peepl dehn da Damaskos ahn den tu di peepl da Jeroosalem, den Ah gaan aal oava di konchri a Judeeya, ahn tu di peepl fahn ada nayshanz. Ah preech tu dehn fi ripent, ahn fi wership Gaad, ahn fi du tingz weh shoa dat dehn ripent.
21 Dat da wai di Jooz mi ares mi eena di templ ahn chrai fi kil mi.
22 Bot wid Gaad help, dong tu dis day Ah di preech tu di smaal wan dehn ahn tu di grayt wan dehn. Ah onli tel dehn weh di prafit dehn mi rait ahn weh Moaziz mi seh mi wahn hapm; dehn mi seh
23 dat Krais mi wahn sofa ahn bee di fers wan fi rezorek fahn di ded, ahn dat hihn wahn preech ahn gi lait tu di Jooz ahn tu peepl fahn di ada nayshan dehn.”
24 Now wail Paal mi-di difen ihself, Festos hala aata ahn: “Yoo di geh krayzi, Paal! Yu stodi soh moch dat ih di mek yu geh krayzi!”
25 Bot Paal tel ahn: “Ai noh krayzi, Yu Ekselensi Festos, kaaz weh Ai di seh da chroo an ih mek sens.
26 Soh Ah noh hoal bak fahn taak tu di king bowt dehnya tingz bikaaz hihn noa bowt dehnya tingz gud gud, kaaz non a dehn neva tek plays eena wahn kaana.
27 King Agripa, yoo bileev di prafit dehn? Ai noa yu bileev weh di prafit dehn seh.”
28 Agripa seh tu Paal: “Yu noa how fi kanvins peepl; wahn lee wail moa ahn yu wuda kanvins mee fi bee wahn Kristyan.”
29 Paal seh: “Ah pray tu Gaad dat weda eena wahn shaat taim er lang taim, noh onli yoo bot evribadi weh lisn tu mi tudeh wuda bee jos laik mee, bot widowt dehnya prizn chayn.”
30 Den di king get op fan ih seet ahn lef, ahn di govna ahn Bernees ahn di man dehn weh mi deh wid dehn gaahn tu.
31 Bot az dehn mi-di waak weh, dehn seh tu wan anada: “Dis man neva du notn fi dizerv fi ded er fi goh da prizn.”
32 Den Agripa tel Festos: “Dis man kuda mi geh ih freedom if ih neva aks fi goh tu Seeza.”
Futnoat
^ Er “wen yu kik gens di metal stik.” Dis rifaa tu wahn paintid stik weh dehn yooz fi gaid wahn animal.
