Aks 28:1-31
28 Afta wi mek it sayf da shoar, wi fain owt dat di ailan mi naym Malta.
2 Di peepl fahn di ailan mi veri kain tu wi. Ih mi-di rayn an ih mi koal, soh dehn mek wahn faiya fi wi ahn dehn welkom wi ahn chreet wi wid kainis.
3 Bot Paal gaahn geh sohn faiyawud fi put pahn di faiya, ahn wen ih mi-di put di wud pahn di faiya wahn paiznos snayk kom owt fahn monks di stik dehn sayka di heet ahn bait Paal pan ih han an ih mi-di heng aan pan ih han.
4 Wen di peepl fahn di ailan si how di snayk mi-di heng fahn Paal han, dehn seh tu wan anada: “Dis man da mosi wahn merdara, kaaz eevn doa ih mek it sayf ya fahn di see, Jostis* neva alow ahn fi kantinyu liv.”
5 Bot Paal jos shayk aaf di snayk rait intu di faiya ahn notn neva hapm tu hihn.
6 Bot di peepl mi-di ekspek Paal fi swel op er jos jrap dong ded. Soh afta dehn mi wayt wahn lang taim ahn si dat notn neva hapm tu ahn, dehn chaynj dehn main ahn staat tu seh dat hihn da wahn gaad.
7 Now kloas tu weh dis mi hapm, dehn mi ga wahn man weh mi naym Poblyos. Hihn da-mi di roola a di ailan an ih mi oan sohn lan. Hihn mi welkom wi fi stay deh fi chree dayz an ih mi chreet wi gud.
8 Now Poblyos pa mi sik eena bed wid feeva ahn daiyareeya, soh Paal gaahn tu ahn an pray far ahn. Den ih lay ih han pan ahn an heel ahn.
9 Afta dis mi hapm, evribadi pahn di ailan weh mi sik kohn tu Paal, ahn hihn heel dehn.
10 Ahn fi shoa dehn apreeshiayshan, dehn gi wi lata gif; dehn gi wi evriting weh wi mi need ahn dehn load op di ship fi wi jerni.
11 Afta wi spen chree monts pahn di ailan wi lef pahn wahn ship weh mi ga di stachu a di son dehn a Zoos pahn di fronta it. Di ship da-mi fahn Alegzanjriya an ih mi dak da di ailan fi di winta.
12 Wen wi dak da Sirakyoos, wi stay deh fi chree dayz;
13 fahn deh wi kantinyu wi jerni ahn reech da Reegyom. Wahn day layta, wahn breez fahn di sowt staat tu bloa ahn wi mek it da Puteeyolai eena too dayz.
14 Rait deh wi fain sohn bradaz ahn dehn bayg wi fi stay wid dehn fi sevn dayz. Afta dat wi gaan da Roam.
15 Wen di bradaz fahn Roam mi geh fi hyaa dat wi mi-di kom, dehn kohn way da di Maakit a Apyos ahn da di Chree Inz fi meet wi. Wen Paal si dehn, ih tank Gaad fi dehn an ih mi tek korij.
16 Wen wi fainali reech Roam, dehn mi alow Paal fi stay bai ihself wid di soalja weh mi-di gyaad ahn.
17 Chree dayz layta Paal mi kaal di impoatant man dehn fahn di Jooz tugeda. Wen dehn mi gyada tugeda, hihn tel dehn: “Mi bradaz, aldoa Ai neva du eniting gens wi peepl er disobay di kostom dehn a wi ansestaz, dehn stil ares mi da Jeroosalem ahn han mi oava tu di Roamanz.
18 An afta di Roamanz egzamin mi kays, dehn mi waahn let mi goh, kaaz dehn neva fain no reezn fi kil mi.
19 Ahn wen di Jooz neva agree wid dat, Ah neva ga no ada chois dan fi aks fi goh tu Seeza, bot Ah noh ga notn gens mi peepl.
20 Ahn dat da wai Ah aks fi si unu ahn taak tu unu. Ai ga dis chayn rong mi bikaaz a di wan weh Izrel di hoap fa.”
21 Dehn tel ahn: “Wee neva geh no leta fahn Judeeya bowt yoo. Ahn non a wi bradaz weh kohn fahn deh ga eniting fi seh bowt yu, ahn non a dehn seh eniting bad bowt yu.
22 Bot wee waahn hyaa fahn yoo ahn si weh yoo tink, kaaz peepl aal oava di plays di taak gens dis nyoo rilijan.”
23 Soh dehn set wahn day fi meet wid ahn, an dis taim lat moa peepl kohn tu wehpaat Paal mi-di stay. Ahn fahn maanin til eevnin hihn eksplayn di mata tu dehn; hihn eksplayn tu dehn gud gud bowt di Kingdom a Gaad. Ih yooz di Laa a Moaziz ahn weh di prafit dehn rait fi chrai kanvins dehn fi aksep Jeezas.
24 Som a dehn mi bileev weh ih seh, bot adaz neva bileev.
25 Soh di peepl staat tu lef kaaz dehn kudn agree wid wan anada. Soh Paal tel dehn:
“Di hoali spirit mi karek wen ih seh tu unu ansesta dehn chroo di prafit Aizaiya;
26 ih seh, ‘Goh tel dehnya peepl: “Unu wahn hyaa bot unu noh wahn geh di sens a it, an unu wahn luk bot unu noh wahn si notn.
27 Kaaz dehnya peepl haat onli haad. Dehn hyaa wid dehn ayz bot dehn noh lisn, ahn dehn kova dehn aiy ahn dehn kyaahn si. Dehn kloaz dehn aiy ahn dehn ayz, soh dat dehn noh si notn ner hyaa notn. Sayka dat, dehn noh andastan weh Ah waahn dehn du, ahn soh dehn noh kohn bak tu mi fi mek Ah heel dehn.”’
28 Soh unu need fi noa dat di mesij bowt how Gaad bring salvayshan wahn geh preech tu di nayshan dehn, ahn dehn wahn lisn.”
29 *——
30 Soh fi hoal a too yaaz, Paal stay deh da wahn hows weh ih rent an ih mi welkom enibadi weh kohn tu ahn.
31 Hihn preech tu dehn bowt di Kingdom a Gaad an ih neva frayd fi teech dehn* bowt di Laad Jeezas Krais, ahn nobadi neva chrai fi stap ahn.
Futnoat
^ Di Greek werd da Di′ke. Dis praabli di rifaa tu di feemayl gaad a jostis.
^ Si di futnoat da Machyu 17:21.
^ Er “ahn wid korij ih teech dehn.”
