Aks 4:1-37
4 Wail Peeta ahn Jan mi-di taak tu di peepl, di prees dehn gaan op tu dehn, lang wid di kyaptin a di templ, ahn di Sadyusee dehn.
2 Dehn neva laik dat di apasl dehn neva hoal bak fahn teech di peepl dat Jeezas mi rezorek fahn di ded.
3 Soh dehn ares dehn ahn kehr dehn da prizn til di neks day, kaaz da mi don eevnin aredi.
4 Bot lata peepl weh mi lisn tu weh dehn seh staat tu bileev, da mi bowt 5,000 a dehn.
5 Di neks day di roola dehn, di Jooish rilijos leedaz, ahn di skraibz gyada tugeda da Jeroosalem,
6 lang wid Anas di cheef prees, Kaiyafas, Jan, Alegzanda, an aala di relitiv a Anas di cheef prees.
7 Dehn put Peeta ahn Jan rait fronta evribadi ahn staat tu kweschan dehn: “Da hoo giv unu di atariti fi du dis?”
8 Den Peeta geh ful op wid hoali spirit ahn tel dehn:
“Roolaz a Izrel ahn Jooish rilijos leedaz,
9 tudeh unu waahn wi tel unu bowt di gud weh wi mi du fi di man weh mi kripl ahn bowt how hihn mi geh heel.
10 Unu an aala di peepl a Izrel need fi noa dat dis man weh di stan op rait ya fronta unu mi geh heel eena di naym a Jeezas Krais di Nazareen, di saym wan weh unu mi kil pahn di stayk, bot hoo Gaad mi rayz op bak fahn di ded. Yes, da kaaz a hihn dis man di stan op ya helti fronta unu.
11 Jeezas da ‘di stoan weh unu, di bildaz, neva waahn; hihn en op fi bee di moas impoatant kaanastoan.’*
12 Unu need fi noa dis tu: hihn da di onli wan weh ku sayv wi, nobadi els ku du dat, kaaz no ada naym deh pahn ert weh Gaad chooz fahn monks peepl fi sayv wi.”
13 Now wen dehn si dat Peeta ahn Jan mi-di taak wid korij ahn dat dehn da-mi man wid onli wahn baysik ejukayshan,* dehn mi sopraiz. Ahn dehn riyalaiz dat dehn yoostu goh rong goh preech wid Jeezas.
14 Wen dehn luk pahn di man weh di too disaipl dehn mi heel, dehn neva ga notn fi seh.
15 Soh dehn koman dehn fi goh owtsaida di Jooish Sopreem Koat* wail dehn staat taak tingz oava wid wan anada.
16 Dehn mi-di seh: “Weh wi shuda du wid dehnya man? Bikaaz dehn jos shoa evribadi ya da Jeroosalem wahn amayzin sain weh wi kyaahn haid; wi kyaahn dinai it.
17 Soh mek wi chretn dehn soh dat dehn noh taak eena da man naym* nohmoh, kaaz wi noh waahn moa peepl noa bowt hihn.”
18 Wid dat dehn kaal dehn bak eensaid an aada dehn fi stap taak bowt Jeezas naym.
19 Bot Peeta ahn Jan tel dehn: “Wel, if unu bileev dat Gaad tink ih raichos fi lisn tu unu insteda hihn, dat op tu unu.
20 Bot az tu wee, wi kyaahn stap taak bowt di tingz wi mi si ahn hyaa.”
21 Soh afta dehn chretn dehn lee bit moa, dehn let dehn goh, kaaz dehn kudn fain wahn reezn fi ponish dehn. Dehn mi frayd bikaaz di peepl mi-di prayz Gaad
22 sayka weh di man weh mi jos geh heel mi moa dan 40 yaaz oal.
23 Afta di disaipl dehn mi geh free, dehn gaan da di ada disaipl dehn ahn tel dehn weh di cheef prees ahn Jooish rilijos leedaz mi tel dehn.
24 Wen aala dehn hyaa dis, dehn staat tu pray tugeda tu Gaad ahn seh:
“Sovrin Laad, yoo da di Wan weh mek di hevn ahn di ert ahn di see an evriting els.
25 Chroo Dayvid, yu servant, yu mi yooz yu hoali spirit fi seh: ‘Wai di nayshan dehn noh ga no aada monks dehnself? Ahn wai di peepl dehn tink bowt loan wotlis tingz?
26 Di king dehn a di ert di pripyaa dehnself fi stan op gens Jehoava ahn gens fi hihn anointid wan,* ahn di roola dehn kohn tugeda az wan gens dehn.’
27 Dis mi reeli hapm wen Herod ahn Ponchos Pailat, lang wid peepl fahn ada nayshanz ahn di peepl a Izrel, mi gyada tugeda eena dis siti gens yu hoali servant Jeezas, yu anointid wan.
28 Dehn mi kohn tugeda fi du weh yoo mi prafesai. Dehnya tingz mi hapm bikaaz yoo ga di powa ahn bikaaz da mi akaadn tu yu wil.
29 Ahn now, Jehoava, pleez hyaa how dehn di chretn wi, ahn gi yu slayv dehn di korij fi neva stap taak bowt yu werd tu adaz,
30 wail at di saym taim yu yooz yu schrent fi heel, ahn wail sainz an amayzin tingz hapm eena di naym a yu hoali servant Jeezas.”
31 Ahn wen dehn don poar owt dehn haat tu Gaad eena pryaa, di hows weh dehn mi deh staat tu shayk, an aala dehn geh ful op wid di hoali spirit ahn dehn mi-di taak di werd a Gaad wid korij.
32 Moroava, di hoal groop a disaipl mi ga di saym way a tinkin ahn di saym feelin. Non a dehn mi eevn tink fi seh dat di tingz weh dehn oan da-mi onli fi dehnself, bot dehn mi shayr evriting weh dehn mi gat wid wan anada.
33 Ahn di apasl dehn mi kantinyu fi ga sokses di gi wahn witnis bowt di rezorekshan a di Laad Jeezas. Ahn Gaad mi kantinyu fi shoa grayt kainis* tu aala dehn.
34 In fak, nobadi mi need eniting monks dehn, kaaz aala dehn weh mi oan lan er hows mi sel dehn ahn bring di moni
35 tu di apasl dehn. Den dehn mi shayr owt di moni monks di bradaz akaadn tu weh eech persn mi need.
36 Wan a di bradaz mi oan wahn pees a lan. Hihn mi naym Joazef, ahn di apasl dehn mi aalso kaal ahn Baarnabas; (fi hihn naym mi meen “Son a Komfert”). Hihn da-mi wahn Leevait weh mi baan da Saipros.
37 Joazef mi sel ih pees a lan ahn kehr di moni tu di apasl dehn.
Futnoat
^ Lit., “di hed a di kaana.”
^ In ada werdz, di apasl dehn neva gaan da di rilijos skoolz weh di skraibz ahn Farisee dehn mi gaahn tu.
^ Lit., “Sanhejrin.” Si di Glasari, “Sanhejrin.”
^ Dis di rifaa tu Jeezas naym.
^ Er “fi hihn Krais.”
^ Si di Glasari, “Grayt kainis.”
