Aks 5:1-42
-
Ananaiyas ahn Safaira (1-11)
-
Di apasl dehn mi du wahn lata sain ahn mirakl (12-16)
-
Dehn ares di apasl dehn bot wahn aynjel free dehn (17-21a)
-
Dehn mek dehn stan op fronta di Jooish Sopreem Koat agen (21b-32)
-
“Wi haftu obay Gaad az fi wee roola insteda man” (29)
-
-
Di advais weh Gamalyel mi giv (33-40)
-
Di disaipl dehn preech fahn hows tu hows (41, 42)
5 Bot wahn man weh mi naym Ananaiyas, lang wid ih waif Safaira, mi sel wahn pees a lan.
2 Bot ih hoal bak som a di moni, an onli ih waif mi noa bowt it, ahn den ih kehr di res a di moni tu di apasl dehn.
3 Bot Peeta seh: “Ananaiyas, wai yoo alow Saytan fi mek yu lai tu di hoali spirit ahn hoal bak som a di moni weh yu mi geh fahn di pees a lan weh yu sel?
4 Di lan da fi yoo eena di fers plays, rait? Ahn wen yu sel it, yoo kuda mi du wateva yu waahnt wid di moni! Soh how yu kuda mi eevn tink fi du soch a wikid ting? Yu neva jos lai tu man, yu lai tu Gaad tu.”
5 Wen Ananaiyas hyaa dehndeh werdz, ih jrap dong ded. An evribadi weh hyaa bowt weh hapm staat tu fyaa Gaad.
6 Den som a di yong man weh mi dehdeh kom ahn rap ahn op eena klaat, kehr ahn owt, ahn beri ahn.
7 Now afta bowt chree owaz Ananaiyas waif kom een, bot shee neva noa weh mi jos hapm.
8 Peeta tel ahn: “Tel mi sohnting, dis da aala di moni weh unu geh fahn di pees a lan weh unu sel?” Shee seh: “Yes, evriting dehdeh.”
9 Peeta tel ahn: “Wai di too a unu agree fi lai tu di spirit a Jehoava? Di man dehn weh beri yu hozban deh da di doa, ahn dehn wahn kehr yoo owt.”
10 Ahn saym taim shee jrap dong fronta Peeta ahn ded. Wen di yong man dehn kom een, dehn fain ahn ded, soh dehn kehr ahn owt ahn beri ahn langsaid ih hozban.
11 Bikaaz a dat, di hoal kangrigayshan an evribadi weh mi hyaa dehnya tingz staat tu fyaa Gaad.
12 Ahn di apasl dehn mi kantinyu fi du wahn lata sainz ahn miraklz, an aala dehn wuda meet tugeda pahn Salaman Waakway.*
13 Bot ada peepl neva ga di korij fi jain dehn, eevn doa dehn mi-di seh loan gud tingz bowt dehn.
14 Ahn di nomba a di wan dehn weh mi bileev eena di Laad mi kip aan di groa; ahn dat mi inklood man an uman.
15 Peepl mi eevn bring owt di wan dehn weh sik ahn put dehn fi lidong pahn sohn smaal bed ahn schrecha eena di mayn schreet dehn, soh dat az Peeta di goh lang, at lees ih shado wuda paas oava som a dehn ahn heel dehn.
16 Aalso, wahn krowd a peepl fahn di siti dehn rong Jeroosalem mi kip aan di bring peepl weh mi sik ahn peepl weh mi ga deemon eena dehn, an aala dehn geh kyoar.
17 Bot di hai prees an aala di peepl weh mi deh wid ahn, weh da-mi fahn di rilijos groop a di Sadyusee dehn, mi jomp op fahn weh dehn mi-di sidong kaaz a weh dehn mi soh beks, ahn dehn mi onli jelos.
18 Ahn dehn ares di apasl dehn ahn chroa dehn eena di poblik jayl.
19 Bot joorin di nait, Jehoava aynjel oapm di prizn doa, kehr dehn owt, ahn tel dehn:
20 “Goh da di templ, ahn kantinyu fi shayr di gud mesij bowt evalastin laif wid di peepl.”
21 Afta dehn hyaa dis, dehn gaan eena di templ az maanin kom, ahn dehn staat tu teech.
Now wen di hai prees ahn di wan dehn weh mi deh wid ahn reech, dehn kaal di Jooish Sopreem Koat* ahn di Jooish rilijos leedaz fahn di nayshan a Izrel tugeda, ahn dehn sen di gyaad dehn da di jayl fi bring di too apasl fronta dehn.
22 Bot wen di gyaad dehn get deh, dehn neva fain dehn eena di prizn. Soh dehn gaahn bak ahn ripoat it;
23 dehn seh: “Wi mi fain di jayl lak an ih mi sikyoar; di gyaad dehn mi-di stan op bai di doa, bot wen wi oapm it, wi neva fain nobadi eensaid.”
24 Wel, wen di kyaptin a di templ ahn di cheef prees dehn hyaa dis, dehn mi wel ahn kanfyooz, ahn dehn mi-di wanda wat mi wahn hapm neks.
25 Bot saym taim, sombadi kom een ahn tel dehn: “Di man dehn weh unu put eena prizn deh da di templ di teech peepl.”
26 Den di kyaptin gaahn wid ih aafisa dehn ahn bring een di apasl dehn, bot dehn neva hert di apaslz kaaz dehn mi frayd dat di peepl wuda mi stoan dehn tu det.
27 Soh dehn bring een di apasl dehn ahn mek dehn stan op fronta di Jooish Sopreem Koat. Den di hai prees
28 aks dehn: “Wee neva giv unu schrik aadaz fi noh teech bowt da man naym?* Ahn now luk weh unu gaahn du, unu ful op di hoal a Jeroosalem wid unu teechin! Wai unu insis fi blaym wi fi dis man det?”
29 Den Peeta ahn di ada apasl dehn seh: “Wi haftu obay Gaad az fi wee roola insteda man.
30 Di Gaad a fi wee ansesta dehn mi rayz op bak Jeezas fahn di ded, di wan weh unu mi kil wen unu heng ahn pahn di stayk.*
31 Gaad mi kehr hihn da hevn an apoint ahn az di Cheef Leeda ahn Sayvya, an Ih mek ih sidong da ih rait han said. Gaad mi du dis soh dat di peepl a Izrel kuda ripent ahn geh fergivnis fi dehn sinz.
32 Ahn wi mi si dehnya tingz. Ahn di hoali spirit, weh Gaad gi tu peepl weh obay ahn, help wi fi gi wahn witnis bowt dis tu.”
33 Wen dehn hyaa dis, dehn geh beks, ahn dehn mi waahn kil dehn.
34 Bot wahn Farisee weh mi naym Gamalyel stan op fi taak; hihn da-mi wahn teecha a di Laa, an evribadi mi rispek hihn. Ih tel dehn fi mek di apasl dehn wayt owtsaid fi wahn lee wail.
35 Den ih seh: “Peepl a Izrel, unu haftu bee kyaaful bowt weh unu waahn du wid dehnya man.
36 Fi egzampl, sohn taim agoa dehn mi ga dis man weh mi naym Toodas, ahn hihn mi-di kaal ihself wahn impoatant persn, ahn lata ada man, bowt 400 a dehn, mi jain ih groop. Bot sohn peepl kil ahn, an evribadi weh mi-di fala hihn skyata ahn di groop kohn tu notn.
37 Den dehn mi ga Joodas, weh da-mi fahn Gyalilee; hihn mi ribel gens di roolaz wen dehn mi-di du di sensos fi rejischrayshan. Hihn mi kanvins wahn lata peepl fi fala ahn. Hihn mi ded tu, an evribadi weh mi-di fala hihn skyata aal oava di plays.
38 Soh now bays pahn dat, Ah di tel unu, noh du eniting tu dehnya man, bot lef dehn loan. Kaaz if weh dehn di du da fahn man, ih noh wahn laas,
39 bot if da fahn Gaad, unu wahn kyaahn du notn bowt dehn. Unu bee kyaaful, bikaaz unu mait fain unuself di fait gens Gaad.”
40 Wel, dehn tek ih advais. Soh dehn kaal bak di apasl dehn eensaid, beet dehn, aada dehn fi stap preech bowt Jeezas, ahn den dehn let dehn goh.
41 Soh di apasl dehn lef di Jooish Sopreem Koat di rijais bikaaz dehn mi feel dat da mi wahn privilij fi sofa shaym sayka Jeezas naym.
42 An evri day eena di templ ahn fahn hows tu hows dehn mi kantinyu fi teech widowt stap ahn fi shayr di gud nyooz bowt Jeezas, hoo da di Krais.
Futnoat
^ Lit., “Salaman Kolonayd.” Si di Glasari, “Salaman Kolonayd.”
^ Lit., “Sanhejrin.” Si di Glasari, “Sanhejrin.”
^ Dis di rifaa tu Jeezas naym.
^ Er “chree.”
