Eksodos 15:1-27
15 Rong da saym taim, Moaziz ahn di Izrelait dehn mi sing wahn sang tu Jehoava weh seh:
“Mek wi sing tu Jehoava, bikaaz hihn win di vikchri.
Hihn chroa di haas ahn di wan weh raid di haas eena di see.
2 Jah da mai schrent ahn mai protekshan bikaaz ih sayv mi.
Hihn da mai Gaad, an Ah wahn prayz ahn. Hihn da di Gaad a mi ansesta dehn, an Ah wahn giv ahn aala di aana.
3 Jehoava da wahn powaful wariya, ahn fi hihn naym da Jehoava.
4 Hihn chroa Fayro* chariyat dehn ahn di aami eena di see,An ih bes soalja dehn sink eena di Red See.
5 Di wayv fahn di see mi kova dehn, ahn dehn mi sink deep dong eena di waata laik wahn stoan.
6 Oa Jehoava Gaad, yu veri powaful,Oa Jehoava Gaad, yu shoa dat yu powaful wen yu dischrai yu enimi dehn.
7 Yu soh powaful dat yu ku chroa dong enibadi weh stan op gens yu;Yu anga da laik faiya, ahn yu bon yu enimi op laik jrai graas.
8 Yu mi breed owt ahn di waata faam wahn waal,Yu mi mek di waata stay eena wan plays, ahn yu mi hoal bak di waata.Eena di midl a di see, di waata mi stap moov.
9 Wi enimi dehn mi seh: ‘Mek wi goh afta dehn ahn kech op wid dehn!
Wi wahn tek weh bilangz tu dehn; wi wahn tek evriting weh wi waahnt.
Wi wahn yooz wi soad fi kil dehn!’
10 Yu breed owt ahn yu kil dehn;Dehn sink laik led eena di powaful see.
11 Jehoava, no ada gaad ku kompyaa tu yoo.
Yoo hoali ahn no ada gaad da laik yoo.
Yoo dizerv lata rispek ahn peepl fi sing sohn sang fi prayz yu. Yoo da di Wan weh di du lata wandaful tingz.
12 Yu schrech owt yu rait han ahn di see mi swala dehn op.
13 Yu mi shoa lata lov* wen yu mi leed di peepl weh yu reskyu.Yu wahn yooz yu powa fi gaid dehn tu yu hoali plays.
14 Peepl wahn hyaa bowt yu ahn dehn wahn chrimbl,Ahn di peepl weh liv da Filistya wahn sofa.
15 Rong da taim, di cheef dehn da Eedom wahn geh frayd,Ahn di roola dehn da Moawab wahn chrimbl.
An evribadi weh liv da Kaynan wahn geh diskorij.
16 Dehn wahn feel fraitn.
Ahn bikaaz a yu grayt powa, dehn wahn kyaahn moov jos laik wahn stoanTil di Izrelait dehn paas chroo di teritori a di nayshan dehn, Oa Jehoava,Til yu peepl weh yu chooz don paas.
17 Jehoava mi Gaad, gaid dehn soh dat dehn ku liv eena fi yoo mongtin.Da plays da wehpaat yu liv ahn weh yu chooz fi yuself.Oa Jehoava, da plays da wahn hoali plays weh yu set op.
18 Jehoava wahn rool az king fareva an eva.
19 Wen Fayro haas an ih waar chariyat dehn ahn di soalja dehn weh raid haas gaan eena di see,Jehoava mek di waata fahn di see kova dehn,Bot di Izrelait dehn mi waak chroo di see pahn jrai grong.”
20 Den di prafites, Miryam, weh da-mi Ayron sista, staat tu play di tambareen an aala di laydi dehn staat tu fala shee ahn play di tambareen tu ahn dehn staat tu daans.
21 Miryam mi ansa bak di man dehn wid wahn sang weh seh:
“Sing tu Jehoava, bikaaz hihn win di vikchri.
Hihn chroa di haas dehn ahn di wan dehn weh mi-di raid haas eena di see.”
22 Moaziz ahn di Izrelait dehn lef fahn di Red See, ahn dehn gaan eena di wildanes* weh naym Shur. Ahn dehn mi chravl fi chree dayz eena di wildanes bot dehn neva fain no waata.
23 Dehn mi reech da Mayra, bot dehn kudn jrink di waata da Mayra bikaaz ih mi bita. Dat da wai hihn mi naym it Mayra.*
24 Soh di peepl staat tu komplayn gens Moaziz, ahn dehn seh: “Da weh wi wahn jrink?”
25 Den Moaziz aks Jehoava fi help. Soh Jehoava mi shoa ahn wahn smaal chree. Den Moaziz chroa it eena di waata ahn di waata geh sweet.
Rait deh Gaad mi gi dehn wahn laa an ih mi shoa dehn weh fi du. Ahn hihn mi waahn noa weh deh eena fi dehn haat.
26 Hihn mi seh: “Ai da Jehoava unu Gaad, an if unu obay evri singl ting weh Ah tel unu fi du, an if unu du weh Ai seh da di rait ting fi du, an if unu obay aala mi komanment ahn mi laa dehn, den Ah noh wahn ponish unu wid aal kaina difrent siknis laik how Ah mi ponish di Ijipshan dehn. Ai, Jehoava, da di wan weh wahn kip unu helti.”
27 Afta dat dehn mi reech da Eelim, ahn 12 waata spring ahn 70 paam chree mi dehdeh. Soh dehn mi set op dehn tent bai di waata.
Futnoat
^ Si di Glasari, “Fayro.”
^ Er “Yu mi shoa mi laayal lov.” Si di Glasari, “Laayal lov.”
^ Si di Glasari, “Wildanes.”
^ Dis naym meenz “Bita.”
