Eksodos 21:1-36
21 “Dehnya da di laa weh yu fi tel dehn:
2 “If sombadi bai wahn Heebroo slayv, di slayv wahn werk fi ih maasta az wahn slayv fi siks yaaz, bot eena di sevent yaa, di maasta fi set ahn free ahn di slayv noh wahn haftu pay notn.
3 If da onli hihn mi kohn wen ih staat werk fi ih maasta az wahn slayv, den wen ih lef, da onli hihn fi goh. Bot if hihn mi kohn wid ih waif, den wen hihn lef, ih waif haftu goh wid ahn.
4 If di maasta mi gi di slayv wahn waif ahn shee ga pikni far ahn, eevn wen di slayv lef, di waif ahn di pikni wahn stil bilang tu di maasta ahn onli di slayv wahn haftu goh.
5 Bot if di slayv seh, ‘Ah noh waahn goh* bikaaz Ah lov mi maasta, mi waif, ahn mi pikni dehn,’
6 den ih maasta fi mek ih stan op gens di doa er di doa poas, an ih fi boar ih ayz wid wahn tool weh dehn yooz fi mek hoal. Di chroo Gaad wahn si dis,* ahn di slayv wahn kantinyu fi serv ih maasta fi di res a ih laif.
7 “If wahn man sel ih daata az wahn slayv, dehn noh wahn let shee goh di saym way how dehn wuda let goh wahn slayv man.
8 If fi shee maasta noh hapi wid ahn an if hihn noh waahn shee az wahn nada waif,* an ih mek sombadi els bai ahn, den hihn kyaahn sel ahn tu wahn farina bikaaz ih don bichray ahn aredi.
9 If hihn pik shee az wahn waif fi ih son, den shee ga di rait fi geh evriting weh wahn daata sopoas tu get.
10 If hihn geh marid tu wahn nada laydi, den ih fers waif fi stil geh di saym amonk a food ahn kloaz, an ih noh fi stap ga sekshwal rilayshanz wid shee needa.
11 Bot if hihn noh waahn giv ahn dehndeh chree tingz, den shee free fi goh, an ih noh haftu pay ahn no moni.
12 “Dehn fi kil enibadi weh hert wahn man soh bad dat ih en op di ded.
13 Bot if ih neva meen fi kil di man, ahn di chroo Gaad mi alow it fi hapm, den Ah wahn set op wahn plays wehpaat di persn ku ron tu.
14 If wahn man geh reeli beks an ih kil sombadi an ih mi meen fi kil da persn, den dehn fi kil da man, eevn if ih goh da mi alta fi protekshan.
15 Dehn fi kil enibadi weh beet dehn ma ahn dehn pa.
16 “If enibadi kidnap wahn man ahn sel ahn er if dehn kech ahn wid di man weh ih kidnap, den da persn fi ded.
17 “Dehn fi kil enibadi weh seh dat dehn waahn mek bad tingz hapm tu dehn ma er dehn pa.*
18 “If sohn man kwaaril wid wan anada ahn wan a dehn beet di neks wan wid ih han* er wid wahn stoan, ahn di persn noh ded bot ih haftu stay eena ih bed, den dis da weh fi hapm:
19 If laytaraan ih ku get op an ih ku waak owtsaid wid wahn stik, den dehn noh fi ponish di wan weh mi beet ahn. Bot ih fi kip pay di man fi di taim weh di man kyaahn werk sayka weh ih geh hert. Ih fi du dat til di man geh beta.
20 “If wahn man beet ih slayv man er ih slayv gyal wid wahn stik ahn di slayv ded wail dehn di beet ahn, den di maasta fi geh ponish sayka weh ih kil ih slayv.
21 Bot if di slayv liv fi wan er too dayz ahn den ih ded, dehn noh fi ponish di maasta bikaaz di maasta don looz di slayv weh ih mi bai wid ih moni.
22 “If sohn man di fait wid eech ada ahn dehn hert wahn pregnant laydi ahn shee ga di baybi bifoa di taim wen ih mi fi baan,* bot di baybi ner ih ma neva ded,* den di wan weh mi hert di pregnant laydi fi pay bak eniting weh di laydi hozban chaaj ahn. Hihn fi pay it bak akaadn tu di disizhan weh di joj dehn mek.
23 Bot if di ma er di baybi ded, den di persn weh kil ahn fi ded tu.*
24 If wahn persn hert sombadi aiy er if ih brok dehn teet, han, er fut, den dehn fi du di saym ting tu da persn.
25 An if ih bon sombadi er ih hert dehn er nak dehn, den dehn fi du di saym ting tu ahn tu.
26 “If wahn maasta nak ih slayv man er ih slayv gyal aiy ahn di slayv geh blain eena da saym aiy, den di maasta fi set di slayv free. Dat wahn bee di payment fi di slayv sayka weh ih mi looz ih aiy.
27 An if wahn maasta nak ih slayv man er ih slayv gyal an ih mek wan a dehn teet jrap owt, den ih fi set di slayv free ahn dat wahn bee di payment fi di slayv sayka weh ih mi looz wan a ih teet.
28 “If wahn man er wahn laydi ded sayka weh wahn bul stab wan a dehn, den dehn fi stoan di bul til ih ded, ahn dehn noh fi eet di meet. Bot dehn noh fi ponish di oana a di bul.
29 Bot if di bul mi kip di hert peepl ahn dehn mi don tel di oana bowt weh mi hapm an ih neva du notn bowt it, an if di bul kil wahn man er wahn laydi, den dehn fi stoan di bul til ih ded, ahn dehn fi kil di oana tu.
30 Bot if peepl waahn mek di oana pay wahn ransom* soh dat dehn noh kil ahn, den di oana haftu pay eniting weh dehn chaaj ahn.
31 If di bul kil wahn lee gyal er wahn lee bwai, dehn fi handl di mata akaadn tu weh di Laa seh.
32 If di bul kil wahn slayv man er wahn slayv gyal, di oana a di bul fi pay 30 pees a silva* tu di maasta weh oan di slayv, ahn den dehn fi stoan di bul ahn kil it.
33 “If wahn man dig wahn hoal an ih neva kova it, ahn wahn bul er wahn dongki jrap eena it,
34 an ih ded, di persn weh dig di hoal wahn haftu pay di oana a di ded animal, ahn di ded animal wahn bilangz tu hihn.
35 If sombadi bul hert sombadi els bul an ih ded, den dehn fi sel di bul weh alaiv ahn dehn fi split di moni eena haaf, ahn dehn fi divaid op di ded bul tu.
36 Er if peepl noa dat wahn bul kip di kil ada animalz ahn di oana noh du notn bowt it, den di oana fi gi fi hihn bul tu di oana a di ded animal, ahn di ded animal wahn bee fi hihn.
Futnoat
^ Er “Ah noh waahn mek dehn set mi free.”
^ Er “Hihn wahn bring ahn kloas tu di chroo Gaad.”
^ Lit., “wahn kankyubain.” Si di Glasari, “Kankyubain.”
^ Er “weh kers dehn ma er dehn pa.” Si di Glasari, “Kers.”
^ Dis ku aalso bee “wid wahn tool.”
^ Lit., “ahn fi shee pikni kom owt.”
^ Er “geh hert bad.”
^ Er “di persn weh kil ahn fi pay wid ih laif.”
^ Si di Glasari, “Ransom.”
^ Lit., “30 silva shekl.” Wahn shekl mi way 11.4 gramz. Si Apendiks B14.
