Eksodos 23:1-33
23 “Unu noh fi spred rong sohnting weh da noh chroo. An unu noh fi bee wahn witnis weh waahn hert sombadi els jos fi help wahn bad persn.
2 Unu noh fi du bad tingz jos bikaaz dat da weh evribadi els di du. Ahn wen unu goh da wahn koat kays, unu noh fi tel lai jos fi mek evribadi els hapi.
3 Wen unu di handl wahn prablem weh involv sombadi weh poa, unu noh fi tek fi hihn said jos bikaaz ih poa.
4 “If unu fain wahn bul er wahn dongki weh schray weh an ih bilangz tu unu enimi, unu fi kehr it bak tu ahn.
5 If unu si wahn dongki di bak wahn hevi load an ih jrap dong ahn kyaahn get op, unu noh fi ak laik unu noh si notn ahn lef di dongki deh. Eevn if di dongki bilangz tu sombadi weh hayt unu, unu fi stil help dehn tek di load aafa di dongki.
6 “Wen unu di handl wahn kays weh involv wahn poa persn, unu fi mek wahn fyaa disizhan.
7 “If dehn akyooz sombadi a sohnting weh ih neva du, unu noh fi tek paat eena dat. Unu noh fi kil sombadi weh inosent er weh raichos, bikaaz Ah noh wahn kansida di wan weh eevl fi bee raichos.
8 “Unu noh fi aksep wahn braib, bikaaz wahn braib ku korop wahn persn weh joj eena wahn waiz way an ih ku eevn mek wahn raichos persn chaynj ih disizhan.
9 “Unu noh fi mek wahn farina sofa. Unu noa how ih feel fi bee wahn farina,* bikaaz unu yoostu bee farinaz da Eejip.
10 “Unu fi plaant pahn unu lan, an unu fi gyada op di food weh groa pahn unu lan fi siks yaaz.
11 Bot eena di sevent yaa, unu noh fi plaant notn an unu noh fi yooz unu lan. Di poa peepl weh liv monks unu wahn eet wateva food dehn gyada fahn unu lan, ahn di animal dehn wahn eet wateva lefoava. Dat da weh unu fi du wid di grayp ahn di aliv dehn weh unu plaant.
12 “Unu fi werk fi siks dayz, bot unu noh fi du no kaina werk pahn di sevent day, soh dat unu bul an unu dongki ku res ahn soh dat di farina dehn ahn di pikni dehn fahn unu slayv gyal ku res tu.
13 “Unu fi mek shoar dat unu du evriting weh Ah tel unu fi du an unu noh fi kaal pahn di naym a ada gaadz. Unu fi mek shoar dat dehn naym noh kom owta unu mowt.
14 “Eech yaa unu fi ga chree selibrayshan fi wership mi.
15 Unu wahn selibrayt di Festival a Bred Widowt Ees.* An unu wahn eet bred widowt ees fi sevn dayz, jos laik weh Ah mi koman unu fi du. Unu fi du dis da di prapa taim eena di mont a Aybib,* bikaaz joorin da taim unu mi kom owta Eejip. Nobadi noh fi kohn fronta mi widowt sohnting eena dehn han.
16 Unu fi selibrayt di Haavis Festival* wen unu haavis di fers froot dehn fahn unu feel. Ahn da di en a di yaa, wen unu gyada op di tingz weh groa pahn di lan sayka di haad werk weh unu mi du, unu fi selibrayt di Festival a di En a di Haavis Seezn.*
17 Ai da unu Laad Jehoava. Ahn chree taimz a yaa, aala di man dehn fi kohn fronta mee.
18 “Unu noh fi aafa op di blod fahn di sakrifais weh bilangz tu mee lang wid eniting weh gat een ees. Ahn non a di fat weh unu aafa op joorin mai festival dehn fi stay owt til di neks maanin.
19 “Wen unu don haavis di tingz weh groa pahn unu lan, unu fi kehr di bes tingz da di hows weh bilangz tu mee, Jehoava, unu Gaad.
“An unu noh fi bail wahn yong goat eena ih ma milk.
20 “Ah di sen wahn aynjel heda unu fi protek unu ahn fi kehr unu da di plays weh Ah mi pripyaa fi unu.
21 Lisn tu ahn an obay ahn. Hihn di kohn eena mai naym, soh noh ribel gens ahn, bikaaz ih noh wahn fergiv unu fi di bad tingz weh unu du.
22 Bot if unu obay ahn an du evriting weh Ah di tel unu fi du, Ah wahn fait unu enimi dehn an Ah gwehn gens enibadi weh goh gens unu.
23 Mai aynjel gwehn heda unu, an ih wahn kehr unu da di lan a di Amorait dehn, di Hitait dehn, di Perizait dehn, di Kaynanait dehn, di Haivait dehn, ahn di Jebyusait dehn, an Ai wahn dischrai aala dehn.
24 Unu noh fi bow dong tu dehn gaadz, an unu noh fi waahn serv dehn. Unu noh fi praktis di saym tingz weh dehn mi du, an unu fi dischrai aala dehn aidol ahn dehn poal weh dehn yooz fi wership.
25 Ai da Jehoava unu Gaad an unu fi serv mee. Ai wahn bles unu wid food ahn waata, an Ah wahn geh rid a eni siknis weh unu gat.*
26 Di laydi dehn eena unu lan wahn ku ga pikni, ahn dehn noh wahn looz non a dehn baybi wail dehn pregnant. An Ah wahn mek unu liv til unu geh oal.
27 “Wen peepl hyaa bowt mi, dehn wahn frayd fi mi, an Ah wahn mek aala di nayshan dehn weh fait gens unu geh kanfyooz. Unu wahn win gens unu enimi dehn an Ah wahn mek dehn ron weh fahn unu.
28 Bifoa unu reech, Ah wahn mek unu enimi dehn geh fraitn, an Ah wahn mek aala di Haivait dehn, di Kaynanait dehn, ahn di Hitait dehn lef fahn dehn lan.
29 Ah noh wahn jraiv dehn owta dehn lan eena di fers yaa soh dat di lan noh lef abandan ahn di wail animal dehn noh ful op di lan.
30 Lee bit bai lee bit, Ah wahn jraiv dehn owt fahn dehn lan. Ah wahn du dis til unu ga lata pikni ahn til di taim kohn fi mek unu inherit di lan.
31 “Ah wahn mek di boada fahn unu lan goh fahn di Red See aal di way tu di see a di Filisteen dehn ahn fahn di wildanes* tu di Yoofraytis Riva. Ahn wen unu fait gens unu enimi dehn, Ah wahn help unu win gens dehn an unu wahn chays dehn owt fahn dehn lan.
32 Unu noh fi mek wahn kovenant* wid dehn an unu noh fi pramis fi serv fi dehn gaadz.
33 Dehn noh fi liv monks unu eena unu lan bikaaz dehn wahn mek unu sin gens mi. If unu wership* fi dehn gaadz, dat wahn bee wahn chrap fi unu.”
Futnoat
^ Er “how wahn farina liv.”
^ Si di Glasari, “Festival a Bred Widowt Ees.”
^ Si Apendiks B15.
^ Dehn aalso kaal dis selibrayshan di Festival a Weeks er Pentikaas.
^ Dehn aalso kaal dis selibrayshan di Tach Shed Festival.
^ Er “Ah wahn protek unu fahn siknis.”
^ Si di Glasari, “Wildanes.”
^ Si di Glasari, “Kovenant.”
^ Lit., “serv.”