Ester 1:1-22
1 King Ahazuweeros* da-mi di roola oava 127 dischrik fahn Indya tu Eetiyopya.* An eena dehndeh dayz,
2 hihn mi ga ih raiyal chroan eena ih palis da Shooshan.*
3 Hihn mi ga wahn speshal paati fi aala ih hai ofishal* an ih ada ofishal dehn joorin di terd yaa wen hihn mi-di rool az king. Di aami fahn Perzha ahn Meedya, di hai ofishal dehn, ahn di dischrik govna dehn mi dehdeh.
4 Fi 180 dayz, ih shoa dehn how rich fi hihn kingdom ahn how grayt ahn wandaful fi hihn gloari.
5 Afta dat, di king mi ga wahn speshal paati fi sevn dayz eena di gyaadn da di king palis da Shooshan. Evribadi weh mi deh da di palis, fahn di moas impoatant tu di lees impoatant, mi deh da di paati.
6 Dehn mi dekorayt di koatyaad eena di gyaadn wid sohn kertn weh mek owta linen, gud kwaliti katn, ahn bloo klaat. Dehn mi yooz sohn roap weh mek owta gud klaat ahn som weh mek owta perpl wul fi tai op di kertn dehn tu sohn silva ring weh mi deh pahn sohn maabl kolom. Anda dat dehn mi ga sohn soafa weh mek owta goal ahn silva, ahn di floa mi mek owta wait maabl, perl, blak maabl, ahn red stoan wid wait spekl.
7 Dehn serv wain eena goal kop, ahn no too kop mi luk di saym. Dehn mi ga lata raiyal wain, kaaz da onli di king kuda mi afoad fi giv soh moch wain.
8 Nobadi mi-di foas enibadi fi jrink. Dat da-mi di rool fi dis okayzhan, kaaz di king mi mek wahn araynjment wid ih ofishal dehn eena ih palis dat eech persn shuda du weh ih waahn.
9 Ahn Kween Vashtai mi ga wahn paati fi aal di laydi dehn fahn King Ahazuweeros palis.
10 Pahn di sevent day wen di king mi deh eena wahn gud mood kaaz a aal di wain weh ih mi jrink, ih sen sevn a ih koat ofishal, hoo da-mi Mehooman, Bizta, Harboana, Bigta, Abagta, Zeetar, ahn Karkas, hoo da-mi aalso ih persnal servant dehn,
11 fi bring Kween Vashtai tu ahn jres op wid ih raiyal vayl.* Ih mi waahn shoa di peepl ahn di hai ofishal dehn how priti shee priti, kaaz shee da-mi wahn veri byootiful wuman.
12 Soh di koat ofishal mi tel Kween Vashtai di king koman, bot shee rifyooz fi obay. Wen di king hyaa dat, ih geh beks bad.
13 Soh di king gaahn taak tu di waiz man dehn weh mi noa di kostom a da taim. (Da soh dehn mi noa how fi giv advais bikaaz dehn mi noa di laa ahn how di koat mi deel wid sichuwayshan laik dat bifoa.
14 Ahn di man dehn weh mi kloas tu ahn da-mi di sevn prins eena Perzha ahn Meedya, hoo da-mi Karsheena, Sheetar, Admayta, Tarshish, Meeres, Marseena, ahn Memookan. Dehn mi ga permishan fi si di king ahn dehn mi ga di haiyis atariti eena di kingdom.)
15 Den di king aks: “Weh di laa seh wi fi du tu Kween Vashtai bikaaz shee neva obay di aada weh Ai, King Ahazuweeros, giv ahn chroo di koat ofishal dehn?”
16 Den Memookan seh fronta di king ahn di hai ofishal dehn: “Kween Vashtai noh jos ofen di king, bot shee ofen aal di hai ofishal dehn an aal di peepl eena aala King Ahazuweeros dischrik.
17 Bikaaz aal di waif dehn wahn hyaa weh di kween du ahn dehn wahn disrispek dehn hozban ahn seh, ‘King Ahazuweeros sen fi Kween Vashtai, bot shee rifyooz fi gaan.’
18 Wen di waif a di hai ofishal dehn fahn Perzha ahn Meedya hyaa bowt how di kween mi bihayv, dehn wahn taak tu dehn hozban bowt it, an ih wahn kaaz lata hayt ahn lata disrispek aal rong.
19 If ih aarait wid di king, mek ih gi wahn raiyal aada ahn mek ih rait it dong an ad it tu di laa fi Perzha ahn Meedya weh kyaahn chaynj, dat Vashtai ku neva kohn bak fronta di king. Ahn mek di king gi fi shee raiyal pozishan tu wahn beta wuman.
20 Ahn wen evribadi eena di kingdom hyaa di koman weh di king giv, aala di waif dehn wahn aana dehn hozban, noh mata hoo dehn.”
21 Dat mi song gud tu di king ahn di hai ofishal dehn, ahn soh di king mi du weh Memookan seh.
22 Soh ih sen wahn leta tu evri raiyal dischrik eena fi dehn oan raitin ahn tu aal di peepl eena dehn oan langwij, ahn di leta mi seh mek evri hozban bee di maasta* a ih oan hows ahn fi mek ih taak fi hihn peepl langwij.
Futnoat
^ Peepl tink dis da Xerxes I, hoo da-mi di son a Darius the Great (Darius Hystaspis)
^ Er “Kush.”
^ Er “Soosa.”
^ Lit., “prins.”
^ Er “terban.”
^ Er “prins.”
