Ester 5:1-14
5 Pahn di terd day Ester put aan ih raiyal roab ahn stan op eena di koatyaad kraas fahn di king hows. Ahn di king mi-di sidong pan ih chroan eena di raiyal hows kraas fahn di doa.
2 Az soon az di king noatis Kween Ester di stan op eena di koatyaad, hihn mi hapi fi si ahn. Soh ih hoal owt ih goal rad fi Ester, ahn shee toch di tap a di rad.
3 Den di king aks ahn: “Da weh hapm, Kween Ester? Tel mi weh yu need. Eevn if yu aks fi haaf a mi kingdom, Ah wahn gi yu!”
4 Ester seh: “Mi king, if ih aarait wid yu, mek yoo ahn Hayman kohn da di speshal dina weh Ah pripyaa fi yu tudeh.”
5 Soh di king tel ih servant dehn: “Goh ahn tel Hayman fi hori kohn, bikaaz Ester di aks far ahn.” Soh di king ahn Hayman gaahn da di speshal dina weh Ester mi pripyaa.
6 Wen dehn mi-di jrink wain, di king tel Ester: “Wateva yoo waahn, Ai wahn gi yu. Yu jos need fi tel mi. Eevn if yu aks fi haaf Ah mi kingdom, Ai wahn giv it tu yu!”
7 Ester mi ansa di king ahn seh: “Mi king, dis da weh Ah waahn:
8 If yu hapi wid mi an if yu agree fi du weh Ah aks, den mek yoo ahn Hayman kohn da wahn nada speshal dina weh Ah wahn pripyaa fi unu tumaaro. Ahn den tumaaro Ai wahn tel di king weh Ah waahn.”
9 Da day Hayman gaan owt an ih mi hapi. Bot wen ih si Mordekai da di king gayt ahn dat Mordekai neva get op an ih neva frayd far ahn, Hayman geh beks bad.
10 Bot Hayman mi kanchroal ih anga ahn gaahn hoam. Den ih sen fi ih fren dehn an ih waif Zeeresh.
11 Hayman boas bowt how rich ih rich, ahn bowt aala ih son dehn, ahn bowt how di king promoat hihn ahn giv ahn wahn haiya pozishan dan di hai ofishal dehn an aala di king servant dehn.
12 Den Hayman seh: “Pahn tap a dat, Kween Ester invait mee, onli mee, fi goh wid di king da wahn speshal dina weh shee mi pripyaa. An ih invait mi agen fi eet wid shee ahn di king tumaaro.
13 Bot non a dis noh wahn mek mi hapi az lang az Ai stil haftu si da Jooish man Mordekai di sidong da di king gayt.”
14 Soh Zeeresh ih waif an aala ih fren dehn tel ahn: “Put op wahn stayk weh 73 fut* hai, an eena di maanin, tel di king fi heng Mordekai pan it. Den goh wid di king an injai yuself da di speshal dina.” Hayman mi laik dis aidyaa, soh ih mek dehn set op di stayk.
Futnoat
^ Lit., “50 kyoobit.” Wahn kyoobit da 17.5 inchiz. Si Apendiks B14.
