Ester 6:1-14
-
Di king aana Mordekai (1-14)
6 Da sayhn nait di king kudn sleep, soh hihn sen fi mek dehn bring di hischri buk a da taim ahn dehn mi reed it tu ahn.
2 Ahn di hischri buk mi shoa dat Mordekai da-mi di wan weh mi ripoat Bigtayna ahn Teeresh. Dehn da-mi too a di king koat ofishal weh gyaad di doa ahn weh mi-di plan fi kil king Ahazuweeros.
3 Di king aks: “How wi mi aana ahn riwaad Mordekai fi weh ih mi du?” Ahn di king persnal atendant tel ahn: “Wi noh du notn far ahn.”
4 Laytaraan di king seh: “Da hoo deh owtsaid?” Hayman mi deh eena di koatyaad owtsaida di sekshan a di palis weh di king stay, bikaaz ih mi waahn taak tu di king bowt di planz weh ih mi ga fi heng Mordekai pahn di stayk weh ih mi don set op far ahn.
5 Di king servant dehn tel ahn: “Da Hayman di stan op owtsaid.” Soh di king seh: “Mek ih kom een.”
6 Wen Hayman kom een, di king tel ahn: “Weh Ah shuda du fi di persn weh Ah waahn shoa aana tu?” Den Hayman seh tu ihself: “Hoo els di king wuda waahn aana moa dan mee?”
7 Soh Hayman tel di king: “If yu waahn aana wahn man,
8 mek dehn bring di raiyal kloaz weh di king wayr ahn di haas weh di king raid, ahn di haas fi gat aan di raiyal hed pees pan ih hed.
9 Ahn put wan a di king haiyis ofishal in chaaj a di kloaz ahn di haas, ahn mek dehn put di kloaz pahn di man weh yu waahn aana, ahn mek ih raid rong di poblik ayrya a di siti pahn di haas. Dehn shuda hala owt: ‘Dis da weh di king du fi di man weh ih waahn aana!’”
10 Rait away di king tel Hayman: “Hori goh geh di kloaz ahn di haas, ahn du evriting weh yu jos seh fi Mordekai di Joo weh di sidong da di king gayt, ahn noh lef owt notn.”
11 Soh Hayman tek di kloaz ahn di haas, an ih put di kloaz pahn Mordekai ahn mek ih raid rong di poblik ayrya a di siti, an ih hala owt: “Dis da weh di king du fi di man weh ih waahn aana!”
12 Afta dat, Mordekai gaahn bak da di king gayt, bot Hayman hori gaahn bak da ih hows wid ih hed kova op bikaaz ih mi sad ahn shaym.
13 Wen Hayman tel ih waif Zeeresh an aala ih fren dehn weh mi hapm tu ahn, ih advaiza dehn an ih waif Zeeresh tel ahn: “If Mordekai da wahn Joo an ih don ga wahn haiya pozishan dan yoo, yu noh wahn win gens hihn. Dat wahn bee it fi yoo.”
14 Wail dehn stil mi-di taak tu ahn, di king koat ofishal dehn kohn get Hayman fi kehr ahn da di speshal dina weh Ester mi pripyaa.
