Ester 7:1-10
7 Soh di king ahn Hayman gaahn da Kween Ester speshal dina.
2 Wen dehn mi-di jrink wain joorin di sekant dina, di king tel Ester: “Kween Ester, wateva yu waahn, Ai wahn gi yu. Yu jos need fi tel mi. Eevn if yu aks fi haaf a mi kingdom, Ah wahn gi yu!”
3 Kween Ester ansa ahn: “Mi king, if yu hapi wid mi an if ih aarait wid yoo, Ah aks yu fi pleez sayv mi laif,* an Ah bayg yu fi pleez sayv mi peepl.
4 Kaaz dehn sel mee ahn mi peepl owt. If dehn mi sel wi az slayv Ah mi wahn kip kwaiyet, bot dehn sel wi soh dat dehn ku kil wi. Dis da wahn terabl sichuwayshan, kaaz ih wahn bee bad fi di king.”
5 Den King Ahazuweeros tel Kween Ester: “Hoo wuda ga di nerv fi du sohnting laik dat? Wehpaat ih deh? Tel mi!”
6 Ester seh: “Di enimi da dis wikid man Hayman.”
Den Hayman geh frayd fi di king ahn di kween.
7 Di king mi beks bad, soh ih get op ahn gaan owt eena di palis gyaadn. Hayman mi riyalaiz dat di king mi wahn ponish ahn noh mata wat, soh ih get op fi bayg Kween Ester fi ga mersi pan ahn.
8 Den di king kohn bak een fahn di gyaadn ahn gaahn tu wehpaat dehn mi-di jrink wain, an ih si Hayman pahn di soafa wehpaat Ester mi deh. Di king hala: “Ih wahn rayp di kween eena mi hows tu?” Az soon az di king seh dat, dehn kova Hayman fays.
9 Den Harboana, wan a di king koat ofishal, seh: “Hayman mi aalso set op wahn 73 fut* hai stayk kloas tu ih hows fi heng Mordekai, hoo mi gi wahn waanin weh mi sayv di king laif.” Den di king seh: “Heng hihn pan it.”
10 Soh dehn heng Hayman pahn di stayk weh ih mi put op fi Mordekai, ahn di king kaam dong.
Futnoat
^ Er “soal.” Si di Glasari, “Soal.”
^ Lit., “50 kyoobit.” Wahn kyoobit da 17.5 inchiz. Si Apendiks B14.
