Ester 9:1-32
9 Pahn di 13th day a Aydar,* weh da di 12th mont, da wen evriting weh di king seh an ih laa weh ih mek mi fi hapm. Da day da-mi wen di Jooz enimi dehn mi-di hoap fi kanka dehn, bot di opozit mi hapm. Di Jooz mi kil aal dehn wan weh mi hayt dehn.
2 Di Jooz fahn aala King Ahazuweeros dischrik gyada tugeda eena aala dehn siti. Dehn kohn tugeda fi chrai fait dehn wan weh mi-di chrai kil dehn, ahn nobadi kuda mi stan op gens dehn, bikaaz evribadi mi frayd fi dehn.
3 An aala di dischrik hai ofishal, di king haiyis ofishal, di govna dehn, an aala di peepl weh deel wid mataz weh kansaan di king mi-di sopoat di Jooz kaaz dehn mi frayd fi Mordekai.
4 Mordekai mi geh moa atariti eena di king hows, ahn peepl fahn aala di dischrik dehn mi-di hyaa bowt ahn, bikaaz Mordekai mi-di geh moa ahn moa powaful.
5 Di Jooz mi kanka aala dehn enimiz. Dehn mi kil dehn wid soad ahn dischrai dehn. Dehn mi du wateva dehn mi waahn tu di peepl weh mi hayt dehn.
6 Eena di palis da Shooshan* di Jooz mi kil ahn dischrai 500 peepl.
7 Dehn mi aalso kil Parshandayta, Dalfon, Aspayta,
8 Porayta, Adayliya, Aridayta,
9 Parmashta, Arisai, Aridai, ahn Vaizayta.
10 Fi dehn pa da-mi Hamadayta son Hayman, hoo da-mi di Jooz enimi. Bot afta di Jooz kil dehn, dehn neva tek non a dehn bilanginz.
11 Pahn da day dehn mi tel di king humoch peepl di Jooz mi kil da di palis da Shooshan.
12 Di king tel Kween Ester: “Da di palis da Shooshan di Jooz kil 500 peepl ahn Hayman ten son. Da weh dehn du eena di res a di dischrik dehn? Now tel mi weh yu waahn an Ah wahn gi yu. An eniting els weh yu need, Ah wahn get it don.”
13 Ester ansa: “Mi king, if ih aarait wid yu, den alow di Jooz weh deh eena Shooshan fi difen dehnself tumaaro jos laik how dehn mi du tudeh. Ahn mek dehn heng Hayman ten son pahn di stayk.”
14 Soh di king gi di aada fi mek dehn du dat. Dehn mi mek it wahn laa da Shooshan ahn dehn mi heng Hayman ten son.
15 Den di Jooz weh mi deh da Shooshan kohn tugeda agen pahn di 14th a Aydar ahn kil 300 man da Shooshan, bot dehn neva tek non a dehn bilanginz.
16 Di res a di Jooz eena di king dischrik dehn aalso gyada tugeda fi difen dehnself ahn dehn mi geh rid a dehn enimi. Dehn mi kil 75,000 a di peepl weh mi hayt dehn, bot dehn neva tek non a dehn bilanginz.
17 Dat mi hapm pahn di 13th a Aydar, ahn dehn mi res op pahn di 14th ahn selibrayt da day.
18 Di Jooz da Shooshan mi gyada tugeda pahn di 13th ahn pahn di 14th, ahn dehn mi res pahn di 15th ahn dehn selibrayt di day di eet ahn jrink ahn rijais.
19 Dat da wai di Jooz fahn di ada siti dehn selibrayt pahn di 14th a Aydar. Dehn selibrayt ahn dehn rijais ahn dehn eet, jrink, ahn shayr food wid wan anada.
20 Mordekai mi rait dong evriting weh hapm an ih sen ofishal letaz tu aala di Jooz eena aala King Ahazuweeros dischrik, tu dehn wan weh mi deh kloas ahn tu dehn wan weh mi deh faar.
21 Ih tel dehn mek dehn selibrayt di 14th ahn di 15th a Aydar eech an evri yaa,
22 bikaaz dat da-mi wen di Jooz dehn stap fait dehn enimi, an insteda feel sadnis ahn saro dehn mi rijais ahn selibrayt. Dehn mi fi selibrayt dehndeh dayz an eet ahn jrink ahn rijais, ahn dehn mi fi shayr food wid wan anada ahn giv gif tu dehn wan weh mi poa.
23 Ahn di Jooz mi agree fi kantinyu di selibrayshan weh dehn mi staat ahn fi du evriting weh Mordekai tel dehn fi du.
24 Aala dis hapm bikaaz Hayman, hoo da Hamadayta son an Aygag disendant, mi plan fi kil owt aala di Jooz kaaz hihn da-mi fi dehn enimi. Soh hihn mi chroa Pur, er di Lat, fi fraitn dehn ahn dischrai dehn.
25 Bot wen Ester gaahn fronta di king, hihn mi mek dehn rait dong dehnya koman: “Mek di saym wikid tingz weh ih mi waahn du tu di Jooz hapm tu hihn saym wan.” Ahn dehn mi heng hihn an ih son dehn pahn di stayk.
26 Soh dat da wai dehn mi kaal dehnya dayz Purim, afta di naym a di Pur.* Soh, bikaaz a weh mi deh eena di leta ahn weh dehn mi si ahn weh mi hapm tu dehn,
27 di Jooz mi mek shoar dat dehn ahn dehn disendant an evribadi weh mi deh lang wid dehn aalwayz selibrayt dehnya too dayz, ahn dehn mi fi du weh di leta seh da di set taim eech an evri yaa.
28 Evri jenarayshan bai dehn famili, dischrik, ahn siti mi fi selibrayt ahn memba dehnya dayz ahn di Jooz shudn stap selibrayt di dayz a Purim, ahn dehn disendant shuda neva stap selibrayt it needa.
29 Laytaraan dehn mi rait wahn sekant leta bowt Purim, an Ester di kween, hoo da-mi Abihayl daata, ahn Mordekai di Joo mi yooz dehn atariti fi aproov it.
30 Hihn mi rait wahn ofishal leta, wid werdz weh frenli an aanis, tu aala di Jooz eena di 127 dischrik eena King Ahazuweeros kingdom,
31 fi kanferm di selibrayshan a di dayz a Purim da di set taim, jos laik weh Mordekai di Joo ahn Kween Ester mi tel dehn fi du, ahn jos laik weh dehn seh dehn mi wahn mek dehn ahn dehn disendant dehn du. Dis inklood wen dehn mi fi faas* ahn pray tu Gaad wid aala dehn haat.
32 Ahn di koman weh Ester mi gi bowt di Purim mi rimain di Jooz dat dehn need fi selibrayt dehndeh dayz. An aala dat mi geh rait dong eena wahn buk.
Futnoat
^ Si Apendiks B15.
^ Er “Soosa.”
^ “Pur” meenz “Lat.” Di plooral fi Pur da “Purim.” Dat da di naym a di festival weh di Jooz selibrayt eena di 12th mont a di hoali kalinda. Si Apendiks B15.
^ Si di Glasari, “Faas.”
