Faileeman 1:1-25
1 Dis leta da fahn mee, Paal, wahn prizna fi di sayk a Krais Jeezas, ahn fahn Timoti wi brada, tu Faileeman, wi dyaa brada weh di werk lang wid wi,
2 ahn tu Apfiya wi sista, ahn tu Arkipos hoo da wahn soalja fi Krais lang wid wi, ahn tu di kangrigayshan weh meet da yu hows:
3 Wi pray dat unu ga pees fahn Gaad wi Faada ahn fahn di Laad Jeezas Krais ahn dat unu ga fi dehn grayt kainis.*
4 Ah aalwayz tank mi Gaad wen Ah menshan yu eena mi pryaaz,
5 bikaaz Ah aalwayz di hyaa bowt yu fayt ahn di lov weh yu ga fi* di Laad Jeezas ahn fi* aala di hoali wan dehn.
6 Ah pray, mi dyaa brada, dat di fayt weh yoo ahn di ada bileevaz gat wahn help yu fi tink bowt aala di blesinz weh wi ga chroo Krais.
7 Ih mek Ah feel reeli hapi an ih gi mi lata komfert wen Ah hyaa bowt yu lov, bikaaz a yoo, mi brada, di hoali wan dehn feel hapi tu.
8 Soh den, bikaaz Ai da wahn apasl fi Krais, Ai ga di freedom fi tel yu fi du di rait ting,
9 bot Ah wuda rada bayg yu fi du dis bikaaz a yu lov, ahn bikaaz Ai da wahn oalda man, ahn now bikaaz Ai da wahn prizna fi di sayk a Krais Jeezas.
10 Ah di bayg yu fi help owt Onesimos. Hihn kohn fi bee laik wahn son tu mi wail Ah mi deh eena prizn.
11 Ai noa dat hihn neva helpful tu yoo az wahn slayv sins ih mi ron weh fahn yu, bot now ih yoosful tu di too a wi.
12 Ah di sen ahn bak tu yu, di wan weh Ah onli lov wid mi hoal haat.*
13 Ah wuda mi waahn kip ahn ya fi chroo kaaz ih di help mi owt wail Ah deh eena prizn fi di sayk a di gud nyooz. Hihn deh ya insteda yoo.
14 Bot Ah neva waahn du notn weh yu wudn agree wid, bikaaz Ah wuda mi waahn yu du dis lee fayva fi mi, noh bikaaz yu haftu, bot bikaaz yu waahn du it.
15 Maybi dat da wai ih mi ron weh fahn yu fi wahn lee wail,* soh dat ih kuda deh bak wid yoo fareva,
16 noh jos az wahn slayv, bot moa dan wahn slayv, az wahn dyaa brada. Ah lov ahn wahn lat, an Ah noa yoo wahn lov ahn eevn moa now az wahn slayv an az wahn felo bileeva eena di Laad.
17 Soh if Ai da reeli yu fren,* pleez aksep ahn bak wid kainis, di saym way yu wuda aksep mee.
18 Moroava, if hihn mi du eniting rang er oa yu eniting, noh wori, Ai wahn pay yu bak.
19 Da mee, Paal, yu fren, di rait dis leta miself: Ah wahn pay yu bak; ahn noh ferget, yoo oa mi eevn moa dan weh hihn oa yoo.
20 Soh, mi brada, pleez du dis lee fayva fi di sayk a di Laad; mek Ah feel hapi bikaaz Ai da wan a Krais falowaz.
21 Ah ga kanfidens eena yu; Ah noa dat yu wahn du moa dan weh Ah di aks yu fi du, dats wai Ah di rait yu dis leta.
22 Bot lang wid dat, pleez geh wahn room redi fi mek Ah stay wen Ah get owt, kaaz Ah di hoap dat bikaaz a unu pryaaz Ah wahn get bak mi freedom an Ah wahn kohn si unu.
23 Epafras, weh da aalso wahn prizna fi di sayk a Krais Jeezas seh heloa,
24 aalso di ada bradaz weh werk lang wid mi laik Maak, Aristarkos, Deemas, ahn Look seh heloa tu.
25 Ah pray dat di Laad Jeezas Krais bles unu wid fi hihn grayt kainis bikaaz a di wilin atichood weh unu shoa.
Futnoat
^ Si di Glasari, “Grayt kainis.”
^ Er “tuwaadz.”
^ Er “tuwaadz.”
^ Er “di wan weh Ah ga afekshan fa.”
^ Lit., “wan owa.”
^ Er “paadna.”
