Filipiyanz 1:1-30
1 Dis leta da fahn mee, Paal, ahn fahn Timoti. Di too a wi da slayv a Krais Jeezas, ahn wi di rait dis leta tu aala di hoali peepl da Filipai weh da wan wid Krais Jeezas, ahn tu di oavaseeya dehn ahn di ministeeryal servant dehn.
2 Ah pray dat Gaad wi Faada ahn di Laad Jeezas Krais shoa unu grayt kainis* ahn giv unu pees.
3 Ah aalwayz tank mi Gaad wen Ah memba unu,
4 ahn wid aala mi haat, Ah gi tanks fi aala unu wen Ah pray. Evritaim Ah pray wid aala mi haat, Ah hapi
5 bikaaz a aala di kanchribyooshan dehn weh unu mek tu* di gud nyooz fahn di fers day unu aksep it op tu now.
6 Kaaz Ah shoar dat bai di day a Krais Jeezas, Gaad wahn finish di gud werk weh ih mi staat eena unu.
7 Ih onli rait dat Ah tink da way bowt aala unu, sins Ah ga soh moch lov fi unu eena mi haat. Unu sopoat mi wail Ah deh eena prizn, an unu help mi fi difen di gud nyooz ahn yooz di laa fi geh di rait fi preech di gud nyooz. Eena da way, mee an unu di benifit fahn Gaad grayt kainis.
8 Gaad noa dat Ah reeli waahn si aala unu, bikaaz Ah ga lata kompashan fi unu jos laik how Krais Jeezas ga kompashan fi unu.
9 Ah kantinyu fi pray dat unu lov groa moa ahn moa bikaaz unu ga ful nalij a di chroot an andastandin a Gaad wil.
10 An Ah pray dat unu mek shoar a di moa impoatant tingz, soh dat unu ku ga wahn aanis haat, ahn soh dat unu noh mek enibadi looz dehn fayt* wail unu wayt fi wen Krais kohn bak,
11 ahn soh dat unu ku bayr lata raichos froot weh kohn chroo Jeezas Krais, ahn dat wahn bring aana ahn prayz tu Gaad.
12 Mi bradaz ahn sistaz, Ah waahn unu noa dat sayka aal weh hapm tu mee, di gud nyooz spred aal oava,
13 kaaz aala di soalja dehn weh gyaad di king, an evribadi els, noa dat Ai deh da prizn fi di sayk a Krais.
14 Ahn bikaaz Ah deh eena prizn, moas a di bradaz weh di serv di Laad feel inkorij, ahn dehn di preech di werd a Gaad moa ahn moa widowt frayd.
15 Da chroo dat som peepl di preech bowt Krais bikaaz dehn jelos ahn laik kwaaril, bot ada peepl di preech fi di rait reezn.
16 Dehn wan weh di preech bowt di Krais fi di rait reezn du it owta lov, bikaaz dehn noa dat Ai mi geh apointid fi difen di gud nyooz.
17 Dehn wan weh jelos ahn laik kwaaril noh di preech bowt Krais fi di rait reezn, kaaz dehn onli di chrai mek chrobl fi mi wail Ah deh eena prizn.
18 Ahn weh hapm sayka dat? Wel, peepl di hyaa di mesij bowt Krais weda peepl preech fi di rait reezn er nat, an Ah rijais oava dat. In fak, Ah wahn kantinyu fi rijais oava dat.
19 Bikaaz Ai noa dat sayka unu pryaaz ahn di help a di hoali spirit weh Jeezas Krais gi mi, Ah wahn geh sayv.
20 Ah ga hoap ahn kanfidens dat Ah noh wahn feel shaym fi no reezn. Bot dat chroo mi badi, weda Ah liv er Ah ded, Ah wahn aana Krais wen Ah taak widowt frayd.
21 If Ah liv, Ah yooz mi laif fi Krais, an if Ah ded, da mee benifit.
22 Az lang az Ah alaiv eena dis badi, Ah wahn ku werk moa fi di Krais. Bot Ah noh wahn mek unu noa weh Ah wuda chooz fi miself.
23 Ah noh noa wich wan fi chooz owta dehndeh too tingz, bikaaz Ah reeli waahn goh ahn bee wid Krais, weh faar beta fi shoar.
24 Bot ih beta fi unu if Ah kantinyu liv eena dis badi.
25 Ah shoar a dat, soh Ai noa dat Ah wahn stay alaiv an Ah wahn kantinyu wid aala unu soh dat unu wahn ku mek proagres an unu wahn ku ekspeeryens di jai weh kohn lang wid unu fayt.
26 Den wen Ah kohn bak tu unu, unu wahn ga moa jai bikaaz unu da falowaz a Krais Jeezas.
27 Unu mos liv* akaadn tu di gud nyooz bowt di Krais, soh dat weda Ah vizit unu er nat, Ah wahn hyaa dat unu di stan op schrang wid wan spirit ahn wid wan soal,* ahn dat unu di werk haad tugeda fi di fayt a di gud nyooz.
28 An unu noh fi frayd fi unu enimi dehn. Aala dat proov dat peepl weh di persikyoot wi wahn geh dischrai, ahn dat unu wahn geh sayv, ahn da proof kohn fahn Gaad.
29 Unu geh di privilij noh onli fi bileev eena Krais, bot aalso fi sofa far ahn.
30 Kaaz unu di fays di saym schrogl weh Ai don gaahn chroo ahn weh Ah stil di goh chroo.
Futnoat
^ Si di Glasari, “Grayt kainis.”
^ Er “bikaaz unu mi tek paat eena di werk fi spred.”
^ Er “mek enibadi stombl.”
^ Er “Unu mos bihayv laik sitiznz.”
^ Er “ahn dat unu yoonaitid.”
