Filipiyanz 2:1-30
2 Soh den, eni wan a unu ga eni inkorijment fi gi chroo Krais, er eni komfert fi giv owta lov, er eni kansaan, er eni waam afekshan ahn kompashan?
2 Wel den, unu mos shoa dat unu ga di saym tinkin ahn di saym lov. An unu mos gree wid wan anada* ahn ga di saym main. Da way deh, unu wahn mek mai jai kompleet.
3 Unu mosn du notn owta praid er sayka laik kwaaril. Insteda dat, unu mos bee hombl ahn kansida ada peepl fi bee moa impoatant dan unu.
4 Unu mos kantinyu fi shoa kansaan fi ada peepl, noh jos fi unu oanself.
5 Unu mos kip aan di tink di saym way laik Krais Jeezas.
6 Eevn doa hihn da-mi laik Gaad, hihn neva eevn tink fi bee eekwal tu Gaad eena no kaina way.
7 No, bot hihn mi giv op evriting weh ih mi gat ahn mek ihself bee laik wahn slayv wen hihn mi ton hyooman.*
8 Moa dan dat, wen hihn mi kohn pahn di ert az wahn hyooman, hihn mi hombl ihself an ih mi en op di bee obeedyant eevn op til wen ih ded, yes, ih mi ded pahn wahn taacha stayk.*
9 Dat da wai Gaad mi lif ahn op tu wahn haiya pozishan ahn giv ahn wahn naym weh haiya dan evri ada naym.
10 Sayka dat, evribadi da hevn, pahn di ert, an anda di grong* wahn ben dehn nee eena di naym a Jeezas,
11 an evribadi wahn seh wid dehn oan mowt dat Jeezas Krais da Laad, fi di gloari a Gaad di Faada.
12 Ahn soh, mi dyaa bradaz ahn sistaz, unu mos aalwayz obay, noh onli wen Ah dehdeh wid unu, bot eevn moa wen Ah noh dehdeh. An unu mos kip aan di werk owt unu oan salvayshan wid lata rispek ahn fyaa.
13 Kaaz Gaad di du weh pleez hihn wen ih giv unu di dizaiya ahn di powa fi du weh hihn waahn.
14 Unu mos kantinyu fi du evriting widowt grombl an aagyu.
15 Eena da way, unu ku bee kleen an inosent az chiljren a Gaad widowt wahn faalt, monks wahn jenarayshan weh krukid ahn korop. Ahn monks dehn, unu ku shain laik wahn brait lait eena dis werl,
16 an unu ku kantinyu hoal aan tait tu di werd a laif. Den Ah ku ga reezn fi rijais pahn di day wen Krais kohn bak, kaaz Ah noa dat Ah neva ron fi notn ner werk haad fi notn.
17 Bot eevn if Ah di poar owt miself az Ah tek paat eena di hoali minischri,* di saym way how dehn poar owt wahn jrink aafrin pahn di alta, Ah rijais lang wid unu, bikaaz fi unu fayt da weh kaaz unu fi serv dis way tu.
18 Saym way soh, unu shuda bee hapi ahn rijais lang wid mi.
19 Now if da di Laad Jeezas wil, Ah di hoap fi sen Timoti tu unu soon, soh dat Ah ku feel inkorij wen ih tel mi bowt unu.
20 Kaaz Ah noh ga nobadi els fi sen hoo da laik Timoti. Hihn wahn reeli tek kayr a unu.
21 Evribadi els di tink bowt weh dehn waahn, noh weh Jeezas Krais waahn.
22 Bot unu noa dat Timoti da noh laik dat, bikaaz hihn slayv wid mi fi spred di gud nyooz, jos laik how wahn pikni werk lang wid ih pa.
23 Soh den, hihn da di wan weh Ah di hoap fi sen az soon az Ah fain owt weh wahn hapm tu mi.
24 If da di Laad wil, Ah wahn kohn si unu soon tu.
25 Bot rait now Ah tink ih impoatant dat Ah sen mi brada Epafrodaitos bak tu unu. Hihn werk lang wid mee, ahn hihn da wahn soalja a Krais jos laik mee. Unu mi sen ahn az wahn servant fi help tek kayr a mi.
26 Hihn reeli waahn si aala unu an ih dipres bikaaz unu mi hyaa dat ih geh sik.
27 Da chroo, hihn mi geh sik soh bad dat ih nayli ded. Bot Gaad mi ga mersi pan ahn. Akchwali, noh onli pahn hihn bot pahn mee tu, soh dat Ah noh feel moa sad dan how Ah don feel.
28 Soh den, Ah soh eega fi sen ahn, soh dat wen unu si ahn unu ku rijais agen, an Ai ku ga les woriz tu.
29 Soh welkom ahn wid lata jai di way unu yoozhwali welkom falowaz a di Laad. Aalwayz aana bradaz laik hihn
30 bikaaz hihn mi nayli ded sayka di werk a di Krais.* Hihn put ih laif eena daynja* fi help mi owt sins unu neva deh ya.
Futnoat
^ Er “unu mos jain tugeda az wan soal.”
^ Lit., “hihn mi kohn fi bee laik wahn man.”
^ Si di Glasari, “Taacha stayk.”
^ Dis di rifaa tu di wan dehn weh wahn kohn bak tu laif.
^ Er “di poblik servis.”
^ Dis ku aalso bee “sayka di Laad werk.”
^ Er “Hihn ekspoaz ih soal tu daynja.”
