Filipiyanz 3:1-21
3 Soh den, mi bradaz ahn sistaz, kantinyu fi rijais bikaaz unu da wan wid di Laad. Ah noh geh taiyad a rait tu unu bowt di saym tingz weh Ah rait tu unu bifoa, kaaz da fi unu oan protekshan.
2 Wach owt fi di daag dehn, fi peepl weh hert ada peepl, ahn fi dehn wan weh kot di flesh.
3 Bikaaz da wee ga di reel serkomsizhan sins wi di wership wid di help a Gaad spirit, wi boas bowt Krais Jeezas, ahn wi noh put wi chros eena hyooman tingz.
4 Eevn soh, Ai ga reezn fi chros eena hyooman tingz moa dan enibadi els,
5 bikaaz Ah geh serkomsaiz ayt dayz afta Ah baan. Ah kohn fahn di nayshan a Izrel, fahn di chraib a Benjamin. Ai da wahn Heebroo ahn mai payrents da-mi Heebroo tu. Ai da-mi wahn Farisee weh mi fala di Laa.
6 An Ah mi persikyoot di kangrigayshan wid aala mi haat, an Ah mi du egzakli weh di Laa seh fi du.
7 Aala dehn ting yoostu bee impoatant tu mi, bot now sayka Krais, dehn noh wert notn tu mi.*
8 Pahn tap a dat, di nalij a Krais Jeezas mi Laad reeli preshos, soh tu mee, evriting els noh wert notn. Sayka hihn, Ai mi wilin fi giv op evriting, an Ah luk pahn dehn tingz az if dehn da loan gyaabij,* soh dat Ah ku ga wahn kloas rilayshanship wid Krais*
9 ahn bee wan wid hihn. Ai noh raichos sayka weh Ah du evriting rait akaadn tu di Laa. No, Ah raichos bikaaz Ah du weh rait bays pahn fayt eena Krais, soh Gaad aksep mi az wahn raichos persn bikaaz a mi fayt.
10 Mai goal da fi noa hihn ahn di powa weh rayz ahn op fahn di ded, ahn fi sofa laik hihn, ahn fi ded laik hihn,
11 ahn fi si if Ah ku bee paat a di fers rezorekshan fahn di ded.
12 Da noh weh Ah don geh di praiz er dat Ah perfek aredi, bot Ah di schrech faawod fi si if Ah ku geh weh Krais Jeezas pik mi fa.
13 Mi bradaz ahn sistaz, Ai noh tink Ah geh di praiz aredi, bot wan ting Ah ku tel unu: Ah di ferget di tingz weh Ah lef bihain, an Ah di schrech faawod tu weh deh heda mi.
14 Ah di push faawod fi reech mi goal, fi geh di praiz a laif da hevn, weh Gaad kaal mi fi geh chroo Krais Jeezas.
15 Soh den, mek aala wee weh ga schrang fayt tink laik dat. An if unu noh tink dis way, Gaad wahn shoa unu how fi tink laik dis.
16 Eena eni kays, wateva proagres wi don mek, mek wi kantinyu eena di saym way a laif.
17 Mi bradaz ahn sistaz, aala unu mos stik tugeda ahn fala mai egzampl. An unu mos kip di pay atenshan tu di egzampl a enibadi weh liv eena di saym way laik wee, ahn fala dehn egzampl.
18 Lata peepl deh weh Ah yoostu menshan aal di taim, bot now Ah krai wen Ah menshan dehn, bikaaz dehn di liv laik dehn da enimi a di taacha stayk* a di Krais.
19 Dehn wahn en op di geh dischrai, dehn beli da dehn gaad, dehn prowd a tingz weh shuda mek dehn feel shaym, ahn dehn onli tink bowt tingz a di werl.
20 Bot wee da sitizn a hevn, ahn wi di wayt wid eeganis fi wi sayvya fahn hevn, di Laad Jeezas Krais.
21 Hihn ga di powa fi rool oava evriting, ahn hihn wahn yooz da grayt powa fi chaynj fi wee hombl badi fi bee laik fi hihn wandaful badi.
Futnoat
^ Dis ku aalso bee “sayka Krais, Ah wilin fi gi dehn op.”
^ Er “robish.”
^ Er “ku gayn Krais;” dis meen fi geh di blesinz az wan a Krais falowaz.
^ Si di Glasari, “Taacha stayk.”
